ރާޖު އަދި ޝިލްޕާ
ފާޑުކިޔާ މީހުންގެ ހަބަރެއް ނުވާތީ ވެސް ރާޖު ކަންބޮޑުވެއްޖެ
ޝިލްޕާ ޝެޓީގެ ފިރިމީހާ، ވިޔަފާރިވެރިޔާ ރާޖު ކުންދުރާގެ މައްޗަށް ތުހުމަތު ކުރެވުނު ބަދުއަހުލާގީ ވީޑިއޯ އުފެއްދުމުގެ މައްސަލާގައި އޭނާ އަށް ފާޑުކިޔައި މަލާމަތް ކުރަމުން އުޅުނު މީހުންގެ ހަބަރެއް ނުވާތީ ރާޖު ކަންބޮޑުވެއްޖެ އެވެ.
އެ މައްސަލާގައި އޭނާ ހައްޔަރު ކުރި ނަމަވެސް ކަފާލާތުގެ ދަށުން ދޫކޮށްލީ އެވެ. އޭގެ އަހަރެއް ފަހުން ސޯޝަލް މީޑިއާގައި ހަރާކާތްތެރިވާން ފަށާފައިވާ ރާޖު ކުރި ޓްވީޓެެއްގައި ވަނީ އޭނާ އަށް ފާޑުކިޔާ މީހުން ކޮބައިތޯ ސުވާލުކޮށް އޭނާ ދޫކޮށްލާފައި ނުދާން އެދިފަ އެވެ.
ސޯޝަލް މީޑިއާގައި ހަރަކާތްތެރިވާން ފެށި ނަމަވެސް އާންމު ތަންތަނުގައި އޭނާ އުޅޭތަން ފެންނަނީ ވަރަށް ސިއްރުންނެވެ. އެގޮތުން މީހުން ގިނަ ތަންތަނުގައި މޫނު ފޮރުވައިގެން އުޅޭކަން ފާހަގަ ކުރެވެ އެވެ.
ބަރަހަނާ ކޮންޓެންޓު އުފެއްދި ކަމަށް ބުނާ މައްސަލާގައި އޭނާ ހައްޔަރު ކުރީ 2021 ވަނަ އަހަރުގެ ޖުލައި މަހު އެވެ. އޭގެ ދެ މަސް ފަހުން ކަފާލާތުގެ ދަށުން ރާޖު ދޫކޮށްލި އިރު އެ މައްސަލަ ހިލުނުތާ އަހަރެއް ފަހުން ރާޖު ވަނީ އޭނާ ފްރޭމް ކުރީ ކަމަށާއި އޭނާ އަށް އިންސާފު ލިބޭނެ ދުވަހެއް އަންނާނެ ކަމަށް ބުނެފަ އެވެ.