މަސައްކަތާ ހުރެ ވިކީއާ އެކު ހޭދަކުރާނެ ވަގުތެއް ނުލިބޭ: ކެޓްރީނާ

މަސައްކަތް ހުންނަ ގޮތުން، ދެމަފިރިން އެކަކު އަނެކަކާ އެކު ހޭދަކުރާނެ ވަގުތު ލިބޭލެއް މަދު ކަމަށް ކެޓްރީނާ ކެއިފް ބުނެފި އެވެ.

ކެޓްރީނާ އާއި ވިކީ ކޯޝަލް ކައިވެނި ކުރީ މިދިޔަ އަހަރުގެ ޑިސެމްބަރު މަހު އެވެ. ކައިވެންޏަށް ފަހު ވެސް ދެ މީހުން އުޅޭތަން ފެންނަނީ ބުރަކޮށް މަސައްކަތުގަ އެވެ. ކެޓްރީނާ ބުނީ އެކަކު އަނެކަކަށް ވަގުތު ދެވޭލެއް މަދުވި ނަމަވެސް ވިކީ އަކީ ވަރަށް ރަނގަޅު ފިރިއެއް ކަމަށާއި އޭނާ އަށް އަޅާލުމާއި ލޯބި ދޭ ކަމަށެވެ.

އޭނާ ބުނީ ކައިވެންޏާ އެކު ދިރިއުޅުން ބަދަލުވާ ކަމަށާއި މީހަކާ އެކު މުޅި ދިރިއުޅުން ހިއްސާ ކުރަން ވާ ވައުދަކަށް ކައިވެނިވާ ކަމަށް ގަބޫލުކުރާ ކަމަށެވެ. އެއާއެކު ކެޓްރީނާ ބުނީ ކައިވެންޏާ މެދު ހިތްހަމަޖެހި އުފާކުރާ ކަމަށާއި އެކަމަކު އޭނާ އާއި ވިކީ ވެސް ގިނަ ވަގުތު އުޅެން ޖެހެނީ ބުރަކޮށް މަސައްކަތުގައި ކަމަށެވެ.

އެކަމަކު ވިކީ ކަހަލަ ފިރިއެއް ލިބުމަކީ ނަސީބެއް ކަމަށް ގަބޫލު ކުރާ ކަމަށް ކެޓްރީނާ ބުންޏެވެ.

ކެޓްރީނާ މިހާރު އުޅެނީ އޭނާގެ ފިލްމު 'ފޯން ބޫތު'ގެ ޕްރޮމޯޝަނުގަ އެވެ. އެ ފިލްމުގައި އޭނާ ފެންނާނީ ޖިންނިއެއްގެ ރޯލުންނެވެ. ސިދާންތު ޗަތުރުވެދީ އާއި އިޝާން ކައްތަރު ވެސް ފެންނާނެ އެ ފިލްމުގެ އިތުރުން ދެން ކެޓްރީނާގެ ކުރިއަށް ހުރި ފިލްމުތަކުގެ ތެރޭގައި 'ޓައިގާ 3' އަދި 'ޖީލޭ ޒަރާ' ހިމެނެ އެވެ.

ވިކީގެ ކުރިއަށް ހުރި ފިލްމުތަކުގެ ތެރޭގައި 'ގޯވިންދާ ނާމް މޭރާ'، 'ސާމް ބަހާދޫރް'، 'ދަ ގްރޭޓް އިންޑިއަން ފެމެލީ' އަދި ލަކްޝްމަން އުތޭކަރުގެ ފިލްމެއް ވެސް ހިމެނެ އެވެ.