'ބިގް ބޮސް' އިން ސާޖިދު ބޭރުކުރަން ގޮވަނީ
'ބިގް ބޮސް'ގެ އާ ސީޒަނުގައި ފިލްމު ޕްރޮޑިއުސަރު/ޑައިރެކްޓަރު ސާޖިދު ހާން ބައިވެރިކުރާތީ އެކަމާ ނުރުހި، ޝޯ އިން އޭނާ ބޭރުކުރަން ގޮވާލާ އަޑުތައް ގަދަވެއްޖެ އެވެ.
މި މަހުގެ ފުރަތަމަ ދުވަހު ފަށާފައިވާ 16 ވަނަ ސީޒަންގައި ސާޖިދަކީ ވެސް 'ބިގް ބޮސް'ގެ ގޭތެރޭގައި އުޅޭ ބައިވެރިއެކެވެ. ސާޖިދު ޝޯ އިން ބޭރުކުރަން ގޮވާލަމުންދަނީ 2018 ގައި ފެށުނު 'މީޓޫ' ހަރަކާތުގެ ތެރެއިން އޭނާގެ މައްޗަށް ޖިންސީ ފުރައްސާރައިގެ ތުހުމަތު ކޮށްފައިވާތީ އެވެ.
އިންޑިއާގެ ގިނަ އަދަދެއްގެ އަންހެން ފަންނާނުން ވަނީ އެ ދުވަސްވަރު ސާޖިދުއާ ދެކޮޅަށް ވާހަކަ ދައްކައިފަ އެވެ. އަދި އެމީހުންނާ މެދު އޭނާ ކަންކުރި ގޮތުގެ ވާހަކަތައް އޭރު ދައްކާފައިވެ އެވެ.
އެހެންވެ ސާޖިދު ޝޯ އިން ބޭރުކުރަން ގޮވާލައި ޓްވިޓާގައި ގިނަ ބަޔަކު ދަނީ ވާހަކަ ދައްކަމުންނެވެ. ހާއްސަކޮށް 'ބިގް ބޮސް' ފަދަ ޝޯއެއްގައި ބައިވެރި ކުރަންވާނީ ފަސްބައި ސާފު ތުހުމަތުތަކުން ބަރީއަވެގެންވާ މީހުން ކަމަށް ދަނީ ބުނަމުންނެވެ. އަދި އޭނާ ޝޯ އިން ބޭރުކުރަން ގޮވާލާ ޕެޓިޝަނެއްގައި ސޮއިކުރަން ވެސް ވަނީ ފަށައިފަ އެވެ.