ޖޭލޯ އާއި ބެން އެފްލެކް ކައިވެނީގެ އުފަލުގައި އަގުބޮޑު ހަފްލާއެއް ބާއްވައިފި

ލަވަކިޔުންތެރިޔާ ޖެނިފާ ލޯޕޭޒް އާއި ފިލްމީ ތަރި ބެން އެފްލެކްގެ ކައިވެނީގެ އުފަލުގައި ބޮޑު ހަފްލާއެއް ބާއްވައިފި އެވެ.

މި ދެ މީހުން ކައިވެނި ކުރީ މާ ގިނަ ބަޔަކު ބައިވެރިނުކޮށް މިދިޔަ މަހު އެވެ. ނަމަވެސް، އެކުވެރިންނާއި އާއިލާގެ ގިނަ ބަޔަކު ބައިވެރިކޮށްގެން، މިދިޔަ ހޮނިހިރު ދުވަހު މި ދެ މީހުން ވަނީ އަލުން ކައިވެނީގެ ރަސްމިއްޔާތަކާ އެކު ބޮޑު ހަފްލާއެއް ބާއްވައިފަ އެވެ.

ޖޯޖިއާގައި ބޭއްވި ހަފްލާގައި ހޮލީވުޑްގެ ގިނަ އަދަދެއްގެ ތަރިން ބައިވެރިވި އެވެ. އެ މެހުމާނުންނަށް ޖެނިފާ އާއި ބެންގެ ފަރާތުން އަގުބޮޑު ހަދިޔާ ދިން ކަމަށްވެ އެވެ. ކައިވެނީގެ ހަފްލާގެ ބައެއް ފޮޓޯތައް އިންޓަނެޓުގައި މިހާރު އާންމުވެފައިވީ ނަމަވެސް ޖެނިފާގެ ދެމަފިރިން އަދި އެއްވެސް ފޮޓޯއެއް އާންމެއް ނުކުރެ އެވެ.

މި ދެ ތަރިން ޖުލައި މަހު ކައިވެނި ކުރީ މިދިޔަ އެޕްރީލް މަހު އެންގޭޖްވުމަށް ފަހު އެވެ. އޭގެ ކުރިން 2002 ގައި ވެސް ޖެނިފާ އާއި ބެން އެންގޭޖުވި އެވެ. އެކަމަކު ކައިވެންޏާ ހަމައަށް ނުގޮސް ދެ އަހަރު ފަހުން އެންގޭޖުމެންޓް ރޫޅުނީ އެވެ.

އޭގެ 18 އަހަރު ފަހުން އަލުން ދެ މީހުން ދިމާވެ ރައްޓެހިވެގެން އުޅޭތާ މަސްތަކެއް ފަހުން ކައިވެނިކުރި އިރު ޖެނިފާ ބުނީ 20 އަހަރަށް ފަހު އެންމެ ފަހުން ކައިވެނި ކުރެވިއްޖެ ކަމަށާއި ލޯބި ހާސިލްވީ ކެތްތެރިކަމާ އެކު ކުރި މަސައްކަތުން ކަމަށެވެ. އަދި އެއީ އުފާވެރި، ތަފާތު އިހުސާސެއް ކަމަށް ވެސް އޭނާ ބުންޏެވެ.

މި ދެ މީހުން ވެސް ކުރިން ވަނީ އެހެން މީހުންނާ ކައިވެނިކޮށްފަ އެވެ. މިއީ ޖެނިފާ، 52، ގެ ހަތަރުވަނަ ކައިވެންޏެވެ. އަދި ބެން، 49، ގެ ދެވަނަ ކައިވެންޏެވެ.