ދެކޮޅު ނުޖެހޭ ކަމަށް ބުނެ ޓެކްސީ ޑްރައިވަރުން އަގުބޮޑު ކުރަން މަސައްކަތް ފަށައިފި

ރާއްޖޭގައި ތެޔޮ ވިއްކާ އަގު މިދިޔަ ހަފުތާގައި ވަރަށް ބޮޑަށް ބޮޑު ކުރުމާ ގުޅިގެން ޓެކްސީ ޑްރައިވަރުންގެ އާމްދަނީއަށް ނޭދެވޭ އަސަރުތަކެއް ކުރަމުންދާ ކަމަށް ބުނެ، އެ ހިދުމަތުގެ އަގު ބޮޑުކުރުމުގެ މަސައްކަތް ޑްރައިވަރުން ފަށައިފި އެވެ. ބައެއް ޑްރައިވަރުން މިހާރު ވަނީ ފިއުލް ސާޗާޖުގެ ނަމުގައި ދަތުރުގެ އަގަށް އަމިއްލައަށް 5ރ. އިތުރުކުރަން ވެސް ފަށާފަ އެވެ.

ވީ ކިހިނެއް؟ - އެސްޓީއޯ އިން ރާއްޖޭގައި ތެޔޮ ވިއްކާ އަގު އެންމެ ފަހުން ބޮޑު ކުރީ މިދިޔަ މަހުގެ 24ގަ އެވެ. އެ ފަހަރު ގެނައި ބަދަލާ އެކު ޕެޓްރޯލް އަދި ޑީސަލް ލީޓަރަކުން ގާތްގަނޑަކަށް 2ރ. ވަނީ ބޮޑުކޮށްފަ އެވެ. މިހާރު އެސްޓީއޯ އިން ތެޔޮ ވިއްކަނީ:

ބުނީ ކީކޭ؟ - ތެލުގެ އަގުބޮޑުވުމާ ގުޅިގެން ޑްރައިވަރުންގެ ފަރާތުން 'ދައުރު'އާ ކަންބޮޑުވުން ހިއްސާކުރި މީހަކު ބުނީ ތެލަށް ކުރާ ހޭދަ ބޮޑުވުމުގެ ސަބަބުން ލިބޭ އާމްދަނީން ދިރިއުޅުމުގެ ހަރަދުތައް މިހާރު ދެކޮޅު ނުޖެއްސޭ ކަމަށެވެ. އޭނާ ބުނި ގޮތުގައި، މިހާރު ތެލުގެ އަގު ހުރި ގޮތުން ޑްރައިވަރުންނަށް ދުވާލަކަށް 500-700ރ. ލިބިގެން ހަރަދަށް ކަނޑާފައި އެއްޗެއް ނޯވެ އެވެ.

"މިސާލަކަށް ޓަޔަރެއް ފަޅައިގެން ދިޔައީ ނޫނީ އިންޖީނަށް މައްސަލައެއް ދިމާވީ، އެކަން ރަނގަޅު ކުރަން ހޭދަކުރާ ވަގުތަކީ ލިބޭ އާމްދަނީ ހަމަ ހުއްޓިފައި އޮންނަ ވަގުތު،" އޭނާ ބުންޏެވެ.

"ކާރުގެ އޭސީއަށް މައްސަލައެއް ދިމާވެއްޖެއްޔާ 8،000ރ. ނޫނީ 12،000ރ. ވަރު އެބަދޭ އެކަން ރަނގަޅު ކުރަން."

ބައެއް ޑްރައިވަރުން ބުނާ ގޮތުގައި، އެ މައްސަލަ ހައްލުކުރަން 16،000ރ. ވެސް ބައެއް ފަހަރު ހަރަދުވެ އެވެ.

ޑްރައިވަރުން ފާހަގަކުރި ދެ ވަނަ ކަމަކީ ކާރުގެ ވެރިފަރާތަށް ކޮންމެ ދުވަހަކު ދައްކަން ޖެހޭ ފައިސާ އެވެ.

"ހުރިހާ ޓެކްސީ ޑްރައިވަރުން ދުއްވަނީ އަމިއްލަ ކާރެއް ނޫން. އެހެންވެ، ކޮންމެ ދުވަހަކު ވެސް ކާރަށް އަރާފައި ފުރަތަމަ ހަމަކުރަނީ ވެރިފަރާތަށް ދޭން ޖެހޭ އަދަދު،" ޑްރައިވަރަކު ބުންޏެވެ.

"ވެރިފަރާތަށް އެބަ ޖެހޭ ދުވާލަކު [އާންމުކޮށް] 300-350ރ. ދޭން. އެ ފައިސާ އާއި ތެލަށް ހަރަދުވާ ފައިސާ ހަމަކޮށްފައި އަސްލު އެ މީހަކަށް އެއްޗެއް ލިބެނީ."

އޭނާ ބުނި ގޮތުގައި، ކާރެއްގެ ޕެޓްރޯލް ޓޭންކް ފުރަން:

އެހެން ޑްރައިވަރަކު ބުނި ގޮތުގައި، މިހާރު ތެލުގެ އަގު ހުރި ގޮތުން ޓެކްސީ ހިދުމަތުގެ އަގުބޮޑު ނުކޮށް އެކަން ކުރެވޭނެ ގޮތެއް ނެތެވެ.

"އަގުބޮޑު ނުކޮށް ވޯތެއް ނޫން މިކަން ކުރާކަށް. އެހެންވެ މިހާރުވެސް ބައެއް ޑްރައިވަރުން، ކަސްޓަމަރުންނާ ވާހަކަ ދައްކައިގެން ދެ ފަރާތުން އެއްބަސްވެގެން [ސަރުކާރުން ކަނޑައެޅި ރޭޓަށް ވުރެ] ބޮޑު އަގެއް ނަގާ،" އޭނާ ބުންޏެވެ.

އޭނާ ވެސް ބުނީ މި ހިދުމަތް ދޭން ކޮންމެހެން ކުރަން ޖެހޭ ހަރަދުތައް ކުރުމަށް ފަހު މާ ރަނގަޅު އާމްދަނީއެއް މިހާރު ނުލިބޭ ކަމަށެވެ.

"އިއްޔެ ހަވީރު 5 އިން ފަތިހު 5އާ ހަމައަށް ލިބުނީ ގާތްގަނޑަކަށް 1،100ރ. އޭގެން 500ރ.އަށް ޕެޓްރޯލް އެޅިން. ވެރިމީހާއަށް 250ރ. ދޭން ޖެހޭ ދުވާލަކަށް،" އޭނާ ބުންޏެވެ.

ޓެކްސީ ޑްރައިވަރުން ތަމްސީލު ކުރާ 'ޓެކްސީ ޑްރައިވާސް އެސޯސިއޭޝަން'ގެ ރައީސް އަބްދުﷲ އިބްރާހިމް ވިދާޅުވީ ޓެކްސީ ހިދުމަތުގެ އަގަށް ބަދަލު ގެނައުމާ ގުޅޭ ގޮތުން ޓްރާންސްޕޯޓް މިނިސްޓްރީއާ އެކު މަޝްވަރާ ކުރަން ރާވާފައިވާ ކަމަށެވެ. އޭނާ ވިދާޅުވީ ޓެކްސީ ހިދުމަތުގެ އަގުތަކަށް އަދި އެއްވެސް ބަދަލެއް ގެނެސްފައިވާ ނުވާ ކަމަށެވެ. ނަމަވެސް އިތުރު ތަފްސީލެއް ނުދެއްވަ އެވެ.

ޓެކްސީ ޑްރައިވަރުން ތަމްސީލު ކުރަން މިދިޔަ މަހުގެ 13ގައި 'ޑްރައިވާސް އެސޯސިއޭޝަން އޮފް މޯލްޑިވްސް'ގެ ނަމުގައި ޖަމިއްޔާއެއް ވެސް ވަނީ އުފައްދާފަ އެވެ. އެ ޖަމިއްޔާގެ ވަގުތީ ހިންގީ ކޮމެޓީގެ އިންތިޒާމު ސެކެޓްރީ އަހްމަދު ޝަމާލް ވިދާޅުވީ ޓެކްސީ ހިދުމަތުގެ އަގާ މެދު ޖަމިއްޔާ ފެންވަރުގައި މަޝްވަރާ ކުރަމުން އަންނަ ކަމަށެވެ.

"ކުރިން [މާޗު މަހު] ތެޔޮ އަގުބޮޑުވެގެން ކުރި މަޝްވަރާތަކުގައި ޓްރާންސްޕޯޓް މިނިސްޓްރީން ބުނި އަގަށް ރަނގަޅު ބަދަލެއް ހަމަޖައްސައިދޭނަމޭ. އެކަން ނުކޮށްދީ އޮއްވައި މިފަހަރު އަނެއްކާ ތެލުގެ އަގު މި ބޮޑުވީ،" އޭނާ ވިދާޅުވި އެވެ.

ގުޅުންހުރި ކަމެއް - މީގެ ކުރިން މިދިޔަ މާޗު މަހުގެ ތެރޭގައި ވެސް ތެލުގެ އަގު އުފުލުމުން ޓެކްސީ ހިދުމަތުގެ އަގަށް ބަދަލު ގެންނަން ޑްރައިވަރުން މަސައްކަތްތަކެއް ކުރި އެވެ. އެގޮތުން:

އެނގުން މުހިންމު - މިދިޔަ ހަފްތާގައި ތެލުގެ އަގު ބޮޑުކުރުމާ އެކު އެކި ދާއިރާތަކުން ހިދުމަތްތަކުގެ އަގުތައް ދަނީ އުފުލެމުންނެވެ. އެގޮތުން:

ތެލުގެ އަގާ އެކު އެހެން ދާއިރާތަކުން ދޭ ހިދުމަތްތަކުގެ އަގަށް ބަދަލު ގެންނަމުން ދާއިރު، ޓެކްސީ ޑްރައިވަރުން ބުނާ ގޮތުގައި އެ ހިދުމަތަށް ހިނގާ ހަރަދަށް ނުބަލައި އެ ހިދުމަތުގެ އަގު ކޮންޓްރޯލް ކޮށްފައި އޮތުމަކީ އެންމެ ރަނގަޅު ގޮތެއް ނޫނެވެ.