މާލޭގައި ކުއްލިއަކަށް ފުލުފުލުން ނައިޓް މާކެޓްތައް

ޒަމާނުއްސުރެ މާލޭގައި މަގުމަތީ ބާޒާރު ނުވަތަ ނައިޓް މާކެޓު ބާއްވަމުން އައީ އަހަރަކު އެއް ފަހަރު އެވެ. އެއީ އާންމުންގެ އިންތިޒާރާ ގުޅިފައި އޮތް ވިޔަފާރީގެ އީދެއް ފަދަ ކަމެކެވެ. ކޮވިޑާ ގުޅިގެން ދޮޅު އަހަރެއްހާ ދުވަހު ނައިޓް މާކެޓްތައް ނުފެނި ދިއުމަށް ފަހު މިހާރު ޖެހިޖެހިގެން ހަތަރު ވަނަ ނައިޓް މާކެޓަކަށް މިވަނީ ތައްޔާރުވެފަ އެވެ. 

އެކަމަކު ބައެއް އާންމުން ދެކެނީ އަވަސް އަވަހަށް މިހާ ގިނައިން ބާއްވާތީ ނައިޓް މާކެޓްގެ ހާއްސަކަން ގެއްލެން ފަށައިފި ކަމެވެ.

ނިމެމުން މިދާ ޑިސެމްބަރު މަސް ފެށުނީ ނައިޓް މާކެޓަކުންނެވެ. އޭގެ ފަހުން މިއަދާ ހަމައަށް ތިން ނައިޓް މާކެޓެއް ބާއްވައިފި އެވެ. ހުޅުމާލެ ރުށްގަނޑު ސަރަހައްދުގައި ފުލުފުލުގައި ބޭއްވި ދެ ނައިޓް މާކެޓަކާއި ދަރުބާރުގޭގެ އިރުމަތީގައި އޮންނަ ހުސް ބިމުގައި ބޭއްވި ނައިޓް މާކެޓެވެ. 

މި އަހަރުގެ ފަހު ނައިޓް މާކެޓު ކަމަށް ވާ "ސިޓީ ނައިޓް މާކެޓު" މިރޭ، ރަސްފަންނުގައި ފަށާނެ އެވެ. ޖުމްލަ ދިހަ ދުވަހުގެ މުއްދަތަކަށް ބާއްވާ އެ ނައިޓް މާކެޓް ވާނީ މިއަހަރު ބާއްވާ އެންމެ ބޮޑު ނައިޓް މާކެޓަށް ވެސް މެ އެވެ.

ސިޓީ ނައިޓް މާކެޓް އިންތިޒާމުކުރާ ޕްރިޒަމް ހޯލްޑިންސްގެ މެނޭޖިން ޕާޓްނަރު ހުސައިން ފަޔާޒު "ދައުރު"އަށް ވިދާޅުވީ މި މާކެޓްގައި 200އާ ގާތްކުރާ އަދަދަކަށް މޭޒު ވިކިފައިވާ ކަމަށެވެ. އަދި ނައިޓް މާކެޓް އިންތިޒާމްކޮށްފައި ވަނީ ކޮވިޑް-19ގެ ރައްކާތެރިކަމުގެ ފިޔަވަޅުތަކާ އެކު ކަމަށް ވެސް ވިދާޅުވި އެވެ.

"ރައްކާތެރިކަމުގެ ފިޔަވަޅެއްގެ ގޮތުން އާންމުންނަށް ސްޓޯލްތަކަށް ނުވަދެވޭ ގޮތަށް މާކެޓު ކުރިއަށްދާނީ،" ފަޔާޒު ވިދާޅުވި އެވެ.

އެ މާކެޓުގައި ވިޔަފާރިވެރިންނަށް ދޫކޮށްފައިވަނީ ގާތްގަނޑަކަށް އަށް ފޫޓު އަށް ފޫޓުގެ ގޮޅިތަކެވެ. މަގުގެ ދެ ފަޅީގައި ގޮޅިތައް ޖަހާފައި ހުރިއިރު، ބައެއް ސަރަހައްދުތަކުގައި މީހުން ހިނގާބިނގާވެ އުޅެން އޮންނަ ޖާގައިގެ ފުޅާ މިނުގައި ވެސް އަށް ފޫޓު ހަމައެއް ނުވެ އެވެ.

ސިޓީ ނައިޓް މާކެޓު ފަށާ ރެއަށް ވާތީ މިރޭ އޮންނާނީ ރޭގަނޑު 8:00 އިން 12:00 އަށެވެ. އެހެން ދުވަސްދުވަހު 4:00 އިން ރޭގަނޑު 12:00 އާ ހަމައަށެވެ.

އަހަރުގެ އެންމެ ފަހު ނައިޓް މާކެޓް މި ބާއްވަނީ ކޮވިޑް-19ގެ ކޭސްތައް އިތުރުވަމުން ދާތީ ގިނަ މީހުން އެއްވެ އުޅޭ ފަދަ ހަރަކާތްތައް މަދުކުރަން އެދިފައި އޮތް ދަނޑިވަޅެއްގަ އެވެ. ކޮވިޑްގެ އާ ވޭރިއަންޓް އޮމިކްރޮންގެ ސަބަބުން މުޅި ދުނިޔޭގައި އަލުން ކޮވިޑްގެ ބަލިމަޑުމަން ދަނީ މައްޗަށެވެ.

އިތުރަށް ކިޔާލަން