ޝިމާދުގެ ތަސައްވުރު: ބޭރު ފައިސާއަށް ބަރޯސާވުން ކުޑަކޮށްދިނުން

އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް އެ ކުންފުނީގެ މެނޭޖިން ޑިރެކްޓަރު ކަމާ ހަވާލުވިތާ އެއް އަހަރު ފުރުނީ އެވެ. މިދިޔަ އެއް އަހަރުގެ ތެރޭގައި އޭނާ އެ މަގާމުގައި ހުންނަވައިގެން ކުރެއްވި މަސައްކަތްތަކާއި ރައްޔިތުންގެ ވިޔަފާރި ކުންފުނި އެސްޓީއޯ ގެންދަވަން ބޭނުންވާ މިސްރާބު އޭނާ ވަނީ 'ދައުރު'އަށް މިދިޔަ ބުރާސްފަތި ދުވަހު ދެއްވި އިންޓަވިއުއެއްގައި ވިދާޅުވެފަ އެވެ. 

އެސްޓީއޯއަށް މި އަހަރު 60 އަހަރު ފުރޭކަން ފާހަގަކުރައްވާ ޝިމާދު ވިދާޅުވީ އޭނާއަށް އޮތް އެންމެ ބޮޑު ހިތްހަމަޖެހުމަކީ މިދިޔަ އެއް އަހަރު ތެރޭ ކުރެވުނު މަސައްކަތުން ރައްޔިތުންނަށް ބޭނުންވާ ތަކެތި ހުސްނުވާނޭ މިންވަރަށް ރާއްޖެ ގެނެސް އެތަކެތީގެ އަގު ބާޒާރުގައި އެއްވަރެއްގައި ހިފަހައްޓައި ދިނުމަށް އެސްޓީއޯއަށް ކުރެވުނު މަސައްކަތްތައް ކަމަށެވެ. 

މިސާލު ނަންގަވަމުން އޭނާ ވިދާޅުވީ އެސްޓީއޯގެ އެމްޑީކަމާ ހަވާލުވިތާ ދެތިން ހަފްތާ ތެރޭގައި އިންޑިއާގެ ދަނޑުތަކަށް ލިބުނު ގެއްލުމަކާ ގުޅިގެން ފިޔާ ބޭރުކުރުން އެ ގައުމުން ކޮންޓްރޯލް ކުރި ކަމަށެވެ. ރާއްޖެއަށް ވެސް ކަނޑައަޅާފައި އޮންނަ ހާއްސަ ކޯޓާގެ ދަށުން ފިޔާ ބޭރުކުރެވޭނީ ސަރުކާރުގެ ހިއްސާ އޮންނަ އެސްޓީއޯ ފަދަ ކުންފުންޏަކަށް އެކަނި ކަމަށް ނިންމި އެވެ. އެސްޓީއޯއިން އާންމުކޮށް ފިޔާ އެތެރެ ނުކުރި ނަމަވެސް އެ ވަގުތު އެސްޓީއޯއިން އެ މަސައްކަތް ފަށައި ފިޔާގެ އަގު ބާޒާރުގައި ހިފަހައްޓައިދިންކަން އޭނާ ފާހަގަކުރެއްވި އެވެ. 

"އަޅުގަނޑުމެން ހެދި ގޮތަކީ އެތެރެކުރި ފިޔާ ކުރީ ބައިގައި އޯޑަރު ނަގާފައި ނޫނީ ވިޔަފާރިވެރިންނަށް ދޫނުކުރާ އުސޫލަށް ނޫނީ ކޮންމެ ވިޔަފާރިއަކަށް ވެސް ވަކި ވަރަކަށް ކޯޓާއެއްގެ ދަށުން ފިޔާ ވިއްކާ ގޮތަށް ހަމަޖެއްސީ. އެހެންވީމާ އެއާ ގުޅިގެން އަޅުގަނޑުމެނަށް ރޯދަ މަހު އަދި ހާއްސަކޮށް ރޯދަ މަސް ނޫނަސް އިންޑިއާއިން އެ މައްސަލަ ހައްލުވަންދެން ފިޔާގެ އަގު ހިފަހައްޓައި ދެވުނު،" ޝިމާދު ވިދާޅުވި އެވެ. 

މީގެ އިތުރަށް އޭނާ ވިދާޅުވީ ކޮންމެ އަހަރެއްގެ ވެސް ރޯދަ މަހާ ދިމާކޮށް އަގުބޮޑުވާ ތަކެތި ބަލާ އެތަކެތި ދުރާލާ އެސްޓީއޯއިން ރާއްޖެ ގެނެސް އަގު ހެޔޮކޮށް ބާޒާރަށް ނެރޭ ކަމަށެވެ. އެކަމުގެ ސަބަބުން ރައްޔިތުންނަށް ތަކެތީގެ އަގު ބޮޑުވުމުގެ ތަކުލީފު ކުޑަކޮށްދެވޭ ކަމަށް އޭނާ ވިދާޅުވި އެވެ.  

"މުދަލުގެ އަގު ހިފެހެއްޓުމާއި އެވައިލެބިލިޓީ އެންޝުއާކޮށްދިނުން އެކަން ހިފެހެއްޓޭ ކަމީ އެއީ އަޅުގަނޑުމެންނަށް މިއަދު ވެސް ހޯދޭ އެންމެ ބޮޑު ކާމިޔާބީ،" ޝިމާދު ވިދާޅުވި އެވެ. 

މީގެ އިތުރަށް އެސްޓީއޯއަކީ އެންމެ ކޯޕަރޭޓް ގަވަނެންސް ރަނގަޅު ސަރުކާރު ކުންފުނީގެ ގޮތުގައި ދެމެހެއްޓުމަކީ ވެސް ލިބުނު ކާމިޔާބެއްގެ ގޮތުގައި އޭނާ ފާހަގަކުރެއްވި އެވެ. އޭނާ ވިދާޅުވީ އެސްޓީއޯގެ އެތެރޭގައި ގާއިމްވެފައިވާ ހަރުދަނާ ކޯޕަރޭޓް ގަވަނަންސް ނިޒާމްތަކާއި ފާރަވެރިވުމުގެ ނިޒާމުތައް އެގޮތުގައި ދަމަހައްޓައިގެން ކުންފުނީގެ ވިޔަފާރި ކުރިއަށް ގެންދަން އިސްކަންދެއްވާ ކަމަށެވެ. 

ޝިމާދު ވިދާޅުވީ އޭނާގެ އެމްޑީކަމުގައި މިހާރު އަމާޒު ހިފާފައި ވަނީ ރާއްޖެއަށް އަބަދުވެސް ކުރިމަތިވެފައިވާ ޑޮލަރު ތަދުވުމުގެ މައްސަލަ ހައްލުކުރުމަށް ރާއްޖޭގެ އެންމެ ބޮޑު ވިޔަފާރި ކުންފުނީގެ ހައިސިއްޔަތުން ސަރުކާރަށް އެހީތެރިވެދިނުމަށް ކަމަށެވެ. އެގޮތުން އޭނާ ވިދާޅުވީ: 

"ބޭރު ފައިސާގެ އެވައިލަބިލިޓީއަށް އަޅުގަނޑުމެންނަށް ކުރެވެނީ ކޮން ކަންތައްތަކެއްްތޯ ބަލައި އެއަށް އެޑްރެސްކުރަން އަޅުގަނޑު މި މަސައްކަތްކުރަނީ. އިމްޕޯޓަށް ބަރޯސާވާ ގައުމަކަށް ވާތީ އަޅުގަނޑުމެންނަށް ލިބޭ ބޭރު ފައިސާ އެއްކޮށް މިދަނީ ރާއްޖެއިން ބޭރަށް މުދާ އެތެރެކުރަން. ފޮރިން ރިޒާވުން މި ހޭދަކުރާ އެންމެ ބޮޑު އެއްޗެއް ވެސް މި ދަނީ ތެލަށް. އެ ހަރަދުތައް ކުޑަކުރަން އެޑްރެސްކުރަން މި އިސްކަން ދެނީ،" ޝިމާދު ވިދާޅުވި އެވެ. 

ޝިމާދު ވިދާޅުވީ ކުންފުނީގެ ހިއްސާދާރުންނަށް އޭނާ ދެއްވާނީ އެސްޓީއޯއަކީ ރައްޔިތުންނަށް އަސާސީ އެތައް ހިދުމަތެއް އަތްފޯރާ އަގުގައި ފޯރުކޮށްދޭ ކުންފުންޏަކަށް ވީ ނަމަވެސް ހިއްސާދާރުންނަށް ލިބޭ ފައިދާ ކުޑަވެގެން ނުދާނޭ ކަމުގެ ޔަގީންކަން ކަމަށެވެ. އެސްޓީއޯއިން ކުރާނީ ފައިދާ ވެސް ނެރެވޭ އަދި މުސްތަގުބަލުގައި ރައްޔިތުންނާއި ކުންފުންޏަށް ވެސް ފައިދާވާނޭ ވިޔަފާރިތައް ކަމަށް އޭނާ ވިދާޅުވި އެެވެ. 

"ހިއްސާދާރުންނަށް ލިބޭ ޑިވިޑެންޑު އެއް އަހަރުން އަނެއް އަހަރު އިރާދަކުރެއްވިއްޔާ އިތުރު ވެގެންދާނީ. ބެއްލެއްވީމާ ފާހަގަކުރެވޭނެ ހަމަ ވޭތުވެދިޔަ ކުރު މުއްދަތުގެ ތެރޭގައި އެސްޓީއޯގެ ހިއްސާ ވާނެ ހަމަ ވަރަށް ބޮޑު ތަނުން މައްޗަށް ގޮއްސަ. 400ރ. އިން 450ރ.އަށް އަދި މިހާރު ބާޒާރުގައި އެ ހުރީ 1،400ރ.އަށް ވުރެ ވެސް މަތީގައި. އެހެންވީމާ އެއީ އަޅުގަނޑު ގަބޫލުކުރަނީ ވަރަށް ބޮޑު ކާމިޔާބީ އެއް ކަމަށް. އަޅުގަނޑު ދޭ ޔަގީންކަމަކީ އިރާދަކުރެވިއްޔާ މި ޓްރެންޑް ކޮންޓިނިއުކުރެވޭނޭ،" ޝިމާދު ވިދާޅުވި އެވެ.