ރާއްޖެއަށް ކަނޑައަޅާފައިވާ ހަކުރު ކޯޓާއިން ބައެއް މަދުވިޔަސް ސަޕްލައި ހިފެހެއްޓޭނެ: އެސްޓީއޯ

އިންޑިއާއިން ރާއްޖެއަށް ކަނޑައަޅާފައިވާ ހަކުރު ކޯޓާއިން ބައެއް، އެ ތަކެއްޗާ ހަވާލުވެ ތިބި ބައެއް ފަރާތްތަކުން ގަވާއިދާ ހިލާފަށް ސްރީ ލަންކާއަށް ފޮނުވި ނަމަވެސް، ސަޕްލައިއަށް ބުރޫ ނާރާނެ ކަމަށް އެސްޓީއޯއިން ބުނެފި އެވެ.

ވީ ކިހިނެއް؟ - ހާއްސަ އެއްބަސްވުމެއްގެ ދަށުން އިންޑިއާއިން ރާއްޖެއަށް ފޮނުވި 70 ޓަނުގެ ހަކުރު ރާއްޖެ ނުގެނެސް، އެ ތަކެއްޗާ ހަވާލުވެ ތިބި ބައެއް ފަރާތްތަކުން ގަވާއިދާ ހިލާފަށް ސްރީ ލަންކާއަށް ގެންދިޔަ ކަމަށް ބުނާ މައްސަލައެއް ފެންމަތިވެ، އިންޑިއާގެ ސަރުކާރުން ތަހުގީގު ކުރަން ފަށާފައިވާ ކަމަށް އެ ގައުމުގެ ބައެއް ނޫސްތަކުން ވަނީ ރިޕޯޓުކޮށްފަ އެވެ.

ބުނީ ކީކޭ؟ - މިކަމާ ގުޅޭ ގޮތުން އެސްޓީއޯގެ އޮފިޝަލަކު މިއަދު 'ދައުރު'އަށް ވިދާޅުވީ މަދުވެގެން އުޅެނީ އިންޑިއާއިން ރާއްޖެއަށް ކަނޑައަޅާފައިވާ ހަކުރު ކޯޓާއިން ބައެއް ކަމަށެވެ. އެސްޓީއޯއަކީ މިކަމުގައި ރާއްޖެ އާއި އިންޑިއާގެ އިންޓަމީޑީއަރީ ނުވަތަ މެދުވެރިޔާ އެވެ.

ނަމަވެސް، އޮފިޝަލް ވިދާޅުވީ އޭގެ ސަބަބުން އާންމުންނަށް އެއްވެސް ދައްޗެއް ކުރިމަތިނުވާނެ ކަމަށެވެ. އަދި މެނޭޖު ނުކުރެވޭ ފަދަ ހާލަތެއް ނޫން ކަމަށާއި ސަޕްލައިއަށް ބުރޫ ނާރާނެ ކަމުގެ ޔަގީންކަން އެބައޮތް ކަމަށް އޭނާ ވިދާޅުވި އެވެ.

މައްސަލައިގެ ފެށުން - އިންޑިއާގެ އިގްތިސާދީ ވުޒާރާގެ ދަށުން ހިންގާ ދި ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ)އާ ހަވާލާދީ އިންޑިއާ ޝިޕިން ނިއުސްގައި ބުނެފައިވަނީ މިދިޔަ 25 އޮކްޓޫބަރުގައި އެ މައްސަލަ ފެންމަތިވެގެން ރިޕޯޓްކޮށްފައިވާ ކަމަށެވެ.

އެ ނޫހުން ރިޕޯޓްކޮށްފައިވާ ގޮތުގައި، ޑީޖީއެފްޓީން މިހާރު އަންނަނީ އެ މައްސަލަ ތަހުގީގްކުރަމުންނެވެ. އަދި ރާއްޖެއަށް ހަކުރު އެެކްސްޕޯޓްކުުރުން ވެސް ވަނީ މަޑުޖައްސާލާފަ އެވެ.

އެ ނޫހުން ބުނެފައިވަނީ:

ފާހަގަކޮށްލެވޭ ކަމެއް - އިންޑިއާއިން ރާއްޖެއަށް ހަކުރު އެކްސްޕޯޓު ކުރުމުގެ މަޑުޖައްސާލާފައިވާ ކަމަށް އެ ގައުމުގެ ނޫސްތަކުން ރިޕޯޓުކުރި ނަމަވެސް، އެސްޓީއޯއިން ބުނީ ހަކުރު ލިބުމުގައި އެއްވެސް ދައްޗެއް ނެތް ކަމަށެވެ.

އެނގުން މުހިންމު - މައްސަލަ ދިމާވެގެން އުޅެނީ މިދިޔަ 5 އޭޕްރީލްގައި ރާއްޖެ އާއި އިންޑިއާ އިން ހެދި ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވަން ނިންމާފައިވާ ޖުމްލަ 64،494.33 ޓަނުގެ ހަކުރުގެ ތެރޭގައި ހިމެނޭ 70 ޓަނުގަ އެވެ. އެ އެއްބަސްވުމުގެ ދަށުން، ހަކުރުގެ އިތުރުން ހަނޑޫ، ފުށް، މުގު، ބިސް، ފިޔާ އަދި އަލުވި އިންޑިއާ އިން ރާއްޖެއަށް އިމްޕޯޓްކުރަން ވަނީ ނިންމާފަ އެވެ.

މިދިޔަ އަހަރުގެ ސެޕްޓެމްބަރުން މިދިޔަ އޮކްޓޫބަރުގެ ނިޔަލަށް އިންޑިއާ އިން އާންމު ގޮތެއްގައި ހަކުރު އެކްސްޕޯޓް ނުކުރަން ނިންމާފައިވީ ނަމަވެސް، ރާއްޖެއަށް އެ ތަކެތި ގެނައީ ދެ ގައުމުގެ ދެމެދު ހެދި ހާއްސަ އެއްބަސްވުމުގެ ދަށުންނެވެ. މި ސީޒަންގައި އިންޑިއާ އިން ހަކުރު އެކްސްޕޯޓްކުރަން ހުއްދަ ދިނީ މުންދްރާ، ޓުޓުކޮރިން އަދި ނާވާ ޝީވާ ޕޯޓު މެދުވެރިކޮށެވެ.