19 ރަށެއްގައި އެމްއައިބީގެ އޭޓީއެމް ހިދުމަށް ފެށުމަށް، އެއްބަސްވުމުގައި އިކޮނޮމިކް މިނިސްޓަރު މުހައްމަދު ސައީދު (ކ) އަދި އެމްއައިބީގެ ސީއީއޯ ސޮއިކުރައްވަނީ - (ފޮޓޯ/ ރައީސް އޮފީސް)
19 ރަށެއްގައި އެމްއައިބީގެ އޭޓީއެމް ހިދުމަތް ފެށުމަށް ސޮއިކޮށްފި
މީހުން ދިރިއުޅޭ އިތުރު 19 ރަށެއްގައި މޯލްޑިވްސް އިސްލާމިކް ބޭންކް (އެމްއައިބީ)ގެ އޭޓީއެމް ހިދުމަތް ފެށުމަށް ދިވެހި ސަރުކާރާ އެކު އެ ބޭންކުން މިއަދު އެއްބަސްވުމެއްގައި ސޮއިކޮށްފި އެވެ.
ވީ ކިހިނެއް؟ - މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. އަދި އިސްލާމިކް ބޭންކުގެ ފަރާތުން ސޮއިކުރެއްވީ އެ ބޭންކުގެ ސީއީއޯ މުފައްދަލް އިދުރީސް އެވެ.
ތަފްސީލް - އެއްބަސްވުމުގައި ސޮއިކުރެއްވުމަށް ފަހު އެމްއައިބީގެ ސީއީއޯ ދެއްކެވި ޕްރެޒެންޝޭނުން ދައްކާ ގޮތުގައި، އަންނަ އަހަރު އެ ބޭންކުންގެ އޭޓީއެމް ބަހައްޓަން މަސައްކަތް ފަށާނެ ރަށްރަށަކީ:
-
ހއ. އިހަވަންދޫ، ހދ. ހަނިމާދޫ، ށ. ފުނަދޫ
-
ރ. ހުޅުދުއްފާރު، ރ. އުނގޫފާރު، ރ. ދުވާފަރު
-
ބ. ކެންދޫ، ބ. ތުޅާދޫ، ބ. ގޮއިދޫ
-
ކ. ހިންމަފުށި، އއ. ތޮއްޑޫ، އދ. މާމިގިލި
-
މ. މުލައް، މ. ދިއްގަރު، ދ. މީދޫ
-
ލ. ފޮނަދޫ، ލ. އިސްދޫ-ކަލައިދޫ
-
ގދ. ފަރެސްމާތޮޑާ، ސ. ހުޅުމީދޫ
ސީއީއޯ މުފައްދަލް އިދުރީސް ވިދާޅުވި ގޮތުގައި، އެ ބޭންކުން ކުރިން ވެސް ކުރަމުން ދިޔަ މަަސައްކަތްތަކާއި ދިވެހި ސަރުކާރާއެކު އެއްބަސްވި މަސައްކަތް ނިމުމުން އެމްއައިބީގެ ޖުމުލަ 62 އޭޓީއެމެއް 16 އަތޮޅެއްގެ 37 ރަށެއްގައި އޮޕަރޭޓް ކުރަމުން ދާނެ އެވެ.
"އަޅުގަނޑުމެން ދިވެހި ސަރުކާރަށް ވައުދުވެފައި ވެސް ވާނެ، މި އެއްބަސްވި ވަރާއި އަޅުގަނޑުމެންގެ 2025ގެ ޕްލޭނުން މި ފެންނަ ވަރަށް ވުރެ ވެސް އަދި އިތުރަށް [އޭޓީއެމް] ބެހެއްޓުމަށް މަސައްކަތްކުރާނެ ކަމަށް،" ސީއީއޯ ވިދާޅުވި އެވެ.
ފާހަގަކޮށްލެވޭ - އެމްއައިބީގެ ހިދުމަތް މިހާރު ލިބޭ ރަށްރަށަކީ:
-
ހއ. ދިއްދޫ، ހދ. ކުޅުދުއްފުށި
-
ބ. އޭދަފުށި، ބ. ދަރަވަންދޫ، ޅ. ނައިފަރު
-
މާލެ، ކ. މާފުށި، އދ. މަހިބަދޫ
-
ލ. ގަން، ލ. ކައްދޫ އެއާޕޯޓު، ދ. ކުޑަހުވަދޫ
-
ގއ. ވިލިނގިލި، ގދ. ތިނަދޫ
-
ފުވައްމަލައް އަދި ސ. ހިތަދޫ
ކޮމެންޓް