އައްޑޫ ފަތުރުވެރިކަމުގެ އާ ސަފުހާއެއް: އަމިއްލަ ބްރޭންޑް އައިޑެންޓިޓީއަކާ އެކު ބައިނަލްއަގްވާމީ ސްޓޭޖަށް

ފަތުރުވެރިކަމުގެ އަމިއްލަ ބްރޭންޑް އައިޑެންޓިޓީއަކާ އެކު ބޭރު ދުނިޔޭގައި އައްޑޫ އިޝްތިހާރުކުރަން ފަށައިފި އެވެ.

ވީ ކިހިނެއް؟ - އައްޑޫގެ ޓޫރިޒަމް ބްރޭންޑްގެ ޓެގްލައިން ކަމަށްވާ 'އައްޑޫ: ބިޔޯންޑް ދި އީކުއޭޓާ' އާއި ޓޫރިޒަމް އައިޑެންޓިޓީ އިފްތިތާހުކޮށް ބައިނަލްއަގްވާމީ ޕްލެޓްފޯމްތަކުގައި އެ އަތޮޅު އިޝްތިހާރުކުރަން ފެށީ އިނގިރޭސިވިލާތުގައި މިހާރު ކުރިއަށްދާ ޑަބްލިއުޓީއެމް ފެއާގެ ތެރެއިންނެވެ.

ބްރޭންޑް އިފްތިތާހުކޮށްދެއްވީ:

އައްޑޫ ފަތުރުވެރިކަމަށް ހާއްސަ ބްރޭންޑް އިފްތިތާހުކޮށްދެއްވުމަށްފަހު އެ ތިން ބޭފުޅުން ދެއްކެވި ވާހަކައިގައި ވެސް އައްޑޫއަށް މި ސިނާއަތުގައި ކުރިއަރަން ގިނަ ފުރުސަތުތަކެއް ހުރިކަން ފާހަގަކުރެއްވައި، އެ އަތޮޅުގެ މުސްތަގްބަލާ މެދު ދެކޭ ގޮތް ހިއްސާކުރެއްވި އެވެ.

ބުނީ ކީކޭ؟ - މޭޔަރު ނިޒާރު ވިދާޅުވާ ގޮތުގައި ބައިނަލްއަގްވާމީ ސްޓޭޖަށް އައްޑޫ ނުކުތުމަކީ އެ އަތޮޅަށް ބޮޑު ބަދަލެއް ގެންނާނެ ކަމެކެވެ. އަދި އައްޑޫ: ބިޔޯންޑް ދަ އީކުއޭޓާ ޓެގްލައިނުން ދޭހަކޮށްދެނީ، އޭނާ ވިދާޅުވި ގޮތުގައި އެ އަތޮޅުގެ މުއްސަނދި ސަގާފަތާއި ތާރީހާއި ގުދުރަތީ ރީތިކަމެވެ.

އެމްއެމްޕީއާރުސީގެ އެމްޑީ ޝިއުރީ ވިދާޅުވީ އައްޑޫއަކީ ރާއްޖެއިން އާންމުކޮށް ލިބޭ ތަޖުރިބާތަކާ ތަފާތު، ރާއްޖޭގައި ތާރީހީ ގޮތުން މުއްސަނދި މަންޒިލެއް ތަޖުރިބާކޮށްލަން ފަތުރުވެރިންނަށް ފުރުސަތު ލިބޭ ތަނެއް ކަމަށެވެ.

އެ ކުންފުނީގެ ޗެއާމަން ގިޔާސް ވިދާޅުވި ގޮތުގައި އައްޑޫގެ އާ ބްރޭންޑިންއަކީ އެ ކުންފުނިން މުޅި ރާއްޖެ އިޝްތިހާރުކުރަން ކުރާ މަސައްކަތާ ވެސް ގުޅޭ ބްރޭންޑިންއެއް ކަމަށެވެ. އަދި އައްޑޫއަކީ ފަތުރުވެރިންނަށް ކަމުދާނެ ގިނަ އަދި ތަފާތު ކަންކަން ހުރި ތަނެއް ކަމަށާއި އެ އަތޮޅު އިޝްތިހާރުކުރުމުގައި އެހީވުމަކީ ލިބޭ ފަހުރެއް ކަމަށް އޭނާ ވިދާޅުވި އެވެ.

ތަފްސީލު - އައްޑޫ ޑެސްޓިނޭޝަން މެނޭޖްމަންޓު އޮފީސް (އޭޑީއެމްއޯ)އިން ބުނީ ޑަބްލިއުޓީއެމް ފެއާގެ ތެރެއިން ބޭރުގެ ޓުރިއާ އޮޕަރޭޓަރުންނާއި ޓްރެވަލް އެޖެންޓުންނާ ބައްދަލުކޮށް، އައްޑޫގެ ފަތުރުވެރިކަމާ ބެހޭ މުހިންމު މައުލޫމާތު ހިއްސާކުރާނެ ކަމަށެވެ.

އައްޑޫގެ ޓޫރިޒަމް ބްރޭންޑް ލަންޑަން ޑަބްލިއުޓީއެމްގައި އިފްތިތާހުކުރަން ނިންމީ، އޭޑީއެމްއޯއިން ބުނި ގޮތުގައި ދެ ވަނަ ބޮޑު ހަނގުރާމައިގެ ދުވަސްވަރާއި އޭގެ ފަހުން އެ އަތޮޅާއި އިނގިރޭސިންނާ އޮތް ގުޅުމުގެ ސަބަބުންނެވެ.

އައްޑު އަތޮޅު ގަމަކީ އިނގިރޭސި ރޯޔަލް އެއާފޯސްގެ މަރުކަޒެއް ހިންގި ތަނެކެވެ. އައްޑޫއިން އިނގިރޭސިން ފައިބައިގެން ދިޔަ ނަމަވެސް އެ މީހުންގެ ތާރީހީ ބައެއް ތަންތަނާއި ހަނދާންތައް އަދިވެސް އައްޑޫގައި ފެންނަން އެބަހުއްޓެވެ.

"މިއީ ޕްރޮމޯޝަނަލް ފުރުސަތަކަށް ވުރެ ބޮޑަށް މުޅި ދުނިޔެއަށް އަޅުގަނޑުމެން ދޭ ދައުވަތެއް. ވަކިން ހާއްސަކޮށް އިނގިރޭސި ފަތުރުވެރިންނަށް، އެ މީހުންގެ ތާރީހާއި އައްޑުއާ ގުޅިފައިވާ ގޮތް ބަލައިލަން ދެވޭ ދައުވަތެއް،" އޭޑީއެމްއޯއިން ނެރުނު ބަޔާނެއްގައިވެ އެވެ.

ފާހަގަކޮށްލެވޭ ކަމެއް - މިއީ ރާއްޖޭގެ ވަކި ސަރަހައްދެއް ފަތުރުވެރިކަމުގެ މަންޒިލެއްގެ ގޮތުގައި ބައިނަލްއަގްވާމީ ގޮތުން އިފްތިހާހުކުރި ފުރަތަމަ ފަހަރެވެ.