ސަރުކާރުގެ ގިނަ އޮފީސްތަކެއް ހިންގާ ވެލާނާގެ. (ދައުރު ފޮޓޯ/ އަބްދުﷲ އަނޫފް ޖުނައިދް)
މުސާރަ އާއި އިނާޔަތްތަކުގެ ހަރަދު ބޮޑުވެ 10.2 ބިލިއަނަށް އަރައިފި
ސަރުކާރު މުވައްޒަފުންގެ މުސާރަ އާއި އިނާޔަތްތައް މިދިޔަ އަހަރަށްވުރެ ބޮޑުވެ، 10.2 ބިލިއަން ރުފިޔާއަށް އަރައިފި އެވެ.
ވީ ކިހިނެއް؟ - ގާތްގަނޑަކަށް ހަތަރު މަހުގެ މެދުކެނޑުމަކަށްފަހު ސަރުކާރުގެ ހަރަދާއި އާމްދަނީގެ ތަފާސްހިސާބުތައް ނެރެން ފެށީ އިއްޔެ އެވެ.
ތަފްސީލު - ފިނޭންސްގެ 'ވީކްލް ފިސްކަލް ޑިވެލޮޕްމަންޓް' ރިޕޯޓުން ދައްކާ ގޮތުގައި މިއަހަރަށް ބަޖެޓުކުރި 49.8 ބިލިއަން ރުފިޔާގެ ބަޖެޓުން އޮކްޓޫބަރު 24ގެ ނިޔަލަށް 39.7 ބިލިއަން ރުފިޔާ ވަނީ ހަރަދުކޮށްފަ އެވެ. އެއީ މިދިޔަ އަހަރުގެ އެ މުއްދަތާ އަޅާބަލާއިރު ގާތްގަނޑަކަށް 700 މިލިއަން ރުފިޔާ އިތުރު އަދަދެކެވެ.
އެ މުއްދަތުގައި ސަރުކާރުގެ ރީކަރަންޓް ހަރަދުތައް އިތުރުވި ނަމަވެސް، ކެޕިޓަލް ހަރަދުތައް ވަނީ ކުޑަކޮށްފަ އެވެ. އެގޮތުން:
-
ރީކަރަންޓް ހަރަދު - މިއަހަރު 27.2 ބިލިއަން ރުފިޔާ (މިދިޔަ އަހަރު 25.1 ބިލިއަން ރުފިޔާ)
-
ކެޕިޓަލް ހަރަދު - މިއަހަރު 10.4 ބިލިއަން ރުފިޔާ (މިދިޔަ އަހަރު 11.8 ބިލިއަން ރުފިޔާ)
ރީކަރަންޓް ހަރަދުގެ ބައިން މުސާރަ، އިނާޔަތްތައް، ޕެންޝަން، އިދާރީ އަދި ހިންގުމުގެ ހަރަދުތައް ވެސް ވަނީ މިދިޔަ އަހަރާ އަޅާބަލާއިރު ބޮޑުވެފަ އެވެ. އެގޮތުން:
-
މުސާރަ - މިއަހަރު 4.5 ބިލިއަން ރުފިޔާ؛ މިދިޔަ އަހަރު 3.9 ބިލިއަން ރުފިޔާ
-
އެލަވަންސްތައް - މިއަހަރު 4 ބިލިއަން ރުފިޔާ؛ މިދިޔަ އަހަރު 3.5 ބިލިއަން ރުފިޔާ
-
ޕެންޝަން - މިއަހަރު 1.6 ބިލިއަން ރުފިޔާ؛ މިދިޔަ އަހަރު 1.3 ބިލިއަން ރުފިޔާ
އިދާރީ އަދި ހިންގުމުގެ ހަރަދުގެ ބައިން މިދިޔަ އަހަރާ އަޅާބަލާއިރު 1.1 ބިލިއަން ރުފިޔާ އިތުރަށް ހަރަދުކުރިއިރު އޭގެ ތެރެއިން ބޮޑު އިތުރުވުމެއް ފާހަގަވާ ބައިތަކަކީ:
-
އެޑްމިނިސްޓްރޭޓިވް ސަޕްލައިސް - 1.1 ބިލިއަން ރުފިޔާ (500 މިލިއަން ރުފިޔާގެ އިތުރުވުމެއް)
-
އާސަންދަ - 1.7 ބިލިއަން ރުފިޔާ (200 މިލިއަން ރުފިޔާގެ އިތުރުވުމެއް)
-
ކައުންސިލްތަކުގެ ގްރާންޓަށް - 1.8 ބިލިއަން ރުފިޔާ (200 މިލިއަން ރުފިޔާގެ އިތުރުވުމެއް)
ސަބްސިޑީ، މަރާމާތު، ތަމްރީން، އިދާރީ ހިދުމަތްތައް އަދި އޮޕަރޭޝަނަލް ކޮންސިއުމަބަލްސްއަށް ކުރި ހޭދަ މިދިޔަ އަހަރާ އަޅާބަލާއިރު ވަނީ ކުޑަކޮށްފަ އެވެ.
އެނގުން މުހިންމު - ފިނޭންސުން ހަތަރު މަހަށްފަހު މާލީ ހިސާބުތައް އާންމުކުރަން ފެށި ނަމަވެސް އެ ހިސާބުތަކުގެ ރީކޮންސިލިއޭޝަން މަސައްކަތްތައް އަދިވެސް ކުރިއަށްދާތީ، ހަރަދުގެ އަދަދުތަކަށް ބަދަލެއް އަތުވެދާނެ ކަމަށް އެ ރިޕޯޓުގައި ލިޔެފައިވެ އެވެ.
ފަސްމަންޒަރު - ސަރުކާރު މުވައްޒަފުންގެ މުސާރަ އާއި އިނާޔަތްތަކަށް އެއް ބިލިއަނަށް ވުރެ ގިނަ ރުފިޔާ އިތުރަށް ހަރަދުކޮށްފައިވާއިރު، ސިޔާސީ މުވައްޒަފުންގެ ސީދާ އަދަދު ސަރުކާރުން ހާމަނުކުރެ އެވެ.
ސިޔާސީ މުވައްޒަފުންގެ އަދަދު 700ގައި ހިފަހައްޓާނެ ކަމަށް ރައީސް މުހައްމަދު މުއިއްޒު ވައުދުވެވަޑައިގަތް ނަމަވެސް، އިދިކޮޅުން ތުހުމަތުކުރަނީ އެ އަދަދު 2،000އަށްވުރެ ގިނަވާނެ ކަމަށެވެ. ނަމަވެސް ސީދާ އަދަދުތައް ހާމަނުކުރާތީ އެއީ ސައްހަ އަދަދެއްކަން ކަށަވަރުނުވެ އެވެ.
މާލީ އިސްލާހީ ފިޔަވަޅުތަކުގެ ދަށުން ދައުލަތުގެ ހަރަދު ކުޑަކުރުމަށް، ސިޔާސީ މަގާމުތަކުގައި ތިއްބެވި ބޭފުޅުންގެ ތެރެއިން 228 މުވައްޒަފުން ދެ ހަފްތާ ތެރޭ ވަކިކުރަން ނިންމަވާފައިވާކަން ރައީސް މުއިއްޒު ވަނީ 15 އޮކްޓޫބަރުގައި އިއުލާންކުރައްވާފަ އެވެ.
އެ މުއްދަތު އިއްޔެއަށް ހަމަވި ނަމަވެސް އެކަމާ ބެހޭ އިތުރު ތަފްސީލެއް ސަރުކާރުން އަދި ހާމަނުކުރެ އެވެ.
ކޮމެންޓް