ހަނިމާދޫ އެއާޕޯޓް ނިމެން ވާއިރަށް ހދ.އަށް 4،000 އެނދު ގެންނަން މަސައްކަތް ކުރަނީ

އިންޑިއާގެ އެގްޒިމް ބޭންކުގެ ލޯނު ފައިސާ އިން ކުރިއަށް ގެންދާ ހދ. ހަނިމާދޫ އިންޓަނޭޝަނަލް އެއާޕޯޓްގެ މަސައްކަތް ނިމޭއިރަށް އެ އަތޮޅުގައި 4،000 އެނދު ތަރައްގީ ކުރަން މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެ އެވެ.

ވީ ކިހިނެއް؟ - ފައިސަލް މިހެން ވިދާޅުވީ މަޖިލީހުގެ މިއަދުގެ ޖަލްސާއަށް ހާޒިރުވެވަޑައިގެން، ވައިކަރަދޫ ދާއިރާގެ އެމްޑީޕީގެ މެންބަރު ހުސެން ޒިޔާދު ކުރެއްވި ސުވާލަކަށް ޖަވާބުދެއްވަމުންނެވެ. މިއީ މަޖިލީހުގެ ޖަލްސާއަކަށް ފައިސަލް ހާޒިރުކުރި ފުރަތަމަ ފަހަރެވެ.

ތަފްސީލް - މިއަދުގެ ޖަލްސާގައި ޒިޔާދު ކުރެއްވި ސުވާލަކީ ހަނިމާދޫ އެއާޕޯޓުގެ މަސައްކަތް ނިމެންވާއިރަށް ހދ. އަތޮޅުގައި ޓޫރިސްޓް އެނދު އިތުރުކުރުމަށް މި ސަރުކާރުން އެއްވެސް މަސައްކަތެއް ކުރުމަށް ރާވާފައިވޭތޯ އެވެ. އެ ސުވާލަށް ޖަވާބު ދެއްވަމުން ފައިސަލް ވިދާޅުވީ ހދ. އަތޮޅުގައި ރިސޯޓް ތަރައްގީކުރެވޭނެ ރަށްތައް ފާހަގަކުރައްވައި އެ ރަށްތަކުގެ މައުލޫމާތު އިންވެސްޓަރުންނާ ހިއްސާކުރަމުން އަންނަ ކަމަށެވެ.

"... ހަނިމާދޫ އިންޓަނޭޝަނަލް އެއާޕޯޓް ނިމެންވާއިރަށް އެ ތަނަށް 4،000 ވަރަކަށް އެނދު ގެނައުމުގެ މަސައްކަތް މި ދަނީ ކުރަމުން،" ފައިސަލް ވިދާޅުވި އެވެ.

ހަނިމާދޫ އެއާޕޯޓްގެ މަސައްކަތް ނިމޭނެ ކަމަށް ލަފާކުރަނީ އަންނަ މާޗުގެ ނިޔަލަށެވެ.

ފައިސަލް އިތުރަށް ވިދާޅުވީ:

ފައިސަލް ވިދާޅުވި ގޮތުގައި، ހދ. އަތޮޅުގައި މިވަގުތު ރަޖިސްޓްރީކޮށްގެން ހިންގަނީ 460 އެނދެވެ. އެހެންވެ، އެ އަތޮޅުގެ އިތުރު ތިން ރަށެއް ފަތުރުވެރިކަމަށް ދޫކޮށް، 1،886 އެނދު ތަރައްގީ ކުރުމުގެ މަސައްކަތް މިހާރު ކުރިއަށް އެބަދާކަން ވެސް އޭނާ ފާހަގަކުރެއްވި އެވެ.

ފާހަގަކޮށްލެވޭ - ހދ. އަތޮޅުގައި މިވަގުތު ހިންގަމުންދަނީ އެންމެ ދެ ރިސޯޓެވެ. އެއީ މިއަހަރުގެ ކުރީކޮޅު ހުޅުވި ސޮނޭވާ ސީކްރެޓް ރިސޯޓާއި ހޮނޑާފުށި އައިލެންޑް ރިސޯޓެވެ.

ހދ. އަތޮޅުގެ އެތައް ރަށެއް އެތައް އަހަރެއް ކުރިން ރިސޯޓް ހަދަން ދޫކޮށްފައިވީ ނަމަވެސް، އެ ރިސޯޓްތަކުގެ މަސައްކަތް ކުރިއަކަށް ނުދެ އެވެ. މި ސަރުކާރުން ވަނީ އެ ރިސޯޓްތަކުގެ މަސައްކަތް ކުރިއަށް ގެންގޮސް ހދ. އަތޮޅުގައި ގިނަ ރިސޯޓްތައް ހުޅުވަން މަސައްކަތް ކުރާނެ ކަމަށް ވައުދު ވެފަ އެވެ.