ސްޓެމް ތައުލީމުގެ ޝައުގުވެރިކަން ތަޖުރިބާކޮށްލަން ދަރަޖަ ލާނިން ސެންޓަރުން ފުރުސަތެއް

ސައިންސް، ޓެކްނޮލޮޖީ، އިންޖިނިއަރިން އަދި މެތަމެޓިކްސް (ސްޓެމް) އަކީ ރޮބޮޓިކްސްގެ ދާއިރާގައި ޑައިނަމިކް ތައުލީމީ ތަޖުރިބާއެއްގެ ބިންގަލެވެ.

ދަރަޖަ ލާނިން ސެންޓަރު (ޑީއެލްސީ)އިން އެސްސީސީއައިޕީ ޖަޕާން އަދި އެސްސީސީއައިޕީ މޯލްޑިވްސް ގުޅިގެން ސްޓެމް ތައުލީމަށް އަމާޒުކޮށް މާދަމާ ހާއްސަ ވޯކްޝޮޕެއް ބޭއްވުމަށް ވަނީ ނިންމާފަ އެވެ.

ސަލްޓަން ޕާކުގައި މާދަމާ ހަވީރު 4 އިން 6 ޖަހަންދެން ބާއްވާ މި ވޯކްޝޮޕް ޝަރަފުވެރިކޮށްދެއްވާނީ ހެލްތު މިނިސްޓަރު އަބްދުﷲ ނާޒިމް އިބްރާހިމް އާއި ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޓަކެއުޗީ މިޑޮރީ އެވެ.

ކުދިންގެ މެދުގައި ސްޓެމްގެ މާއްދާތަކަށް ޝައުގުވެރިކަން އުފައްދައި، ޒަމާނީ ޓެކްނޮލޮޖީ ތައާރަފްކޮށްދީ މިކަމާ ގުޅުންހުރި ފުރުސަތުތައް ފަހިކޮށްދިނުމުގެ މަގްސަދުގައި ބާއްވާ މި ވޯކްޝޮޕްގައި ޕްރައިމަރީ ސްކޫލްތަކުގެ ދަރިވަރުންނަށް އަމަލީ ގޮތުން ބައިވެރިވެވޭ މަޖާ ހަރަކާތްތަކެއްގެ ތެރެއިން ރޮބޮޓިކްސް ތަޖުރިބާކޮށްލުމުގެ ފުރުސަތު ފަހިވާނެ އެވެ. އެގޮތުން:

މާދަމާގެ އިވެންޓްގައި އެެއް މަހުގެ ހިލޭ ތަމްރީންތައް އިފުތިތާހު ކުރުން އޮންނާނެ އެވެ. އަދި ހިލޭ ރަޖިސްޓްރޭޝަނާއި އެންރޯލް ކުރުން ވެސް އޮންނާނެ އެވެ. ރަޖިސްޓްރީ ކުރުމަށް ދަރިވަރުގެ ނަމާއި ވައިބާ ނަމްބަރާއި ކޮން ސްކޫލެއްގެ ކޮން ގްރޭޑެއްގެ ކޮން ދަރިވަރެއްކަން އެނގޭ ގޮތަށް 9450990 އަށް މެސެޖު ކުރުމުން ރަޖިސްޓްރީކޮށްދެ އެވެ.

ރޮބޮޓިކްސް ތަޖުރިބާތައް ފަރުމާކޮށްފައިވަނީ ލެގޯއާ ކުޅުން ފަދަ ގޮތަކަށް ވުމުން މިއީ ކުދިންނަށް ވަރަށް މަޖާ އަދި ދޭހަވާން ފަސޭހަ ކަމެކެވެ. އަދި ލެގޯ ބްރިކްސް، ރޮބޮޓިކްސް ކިޓުތައް އަދި ހާއްސަ ސޮފްޓްވެއާތައް ފަދަ ޝައުގުވެރިކަން ހުރި ވަސީލަތްތައް ސްޓެމްގެ މުގައްރަރުގައި ހިމެނުމާ އެކު ދަސްކުރުމުގެ ތަޖުރިބާއަކީ އިންޓަރެކްޓިވް އަދި އަމަލީ ތަޖުރިބާއެއްކަން ކަށަވަރުކޮށްދެ އެވެ.

މި ފިޔަވަހިތަކުގެ މަތިން ކުރިއަށްދާ މަޝްރޫއުތަކަކީ ކުޑަކުދިންގެ ގޮތުން ފެށިގެން ހައި ސްކޫލް ދަރިވަރުންނަށް އެކަށޭނަ އަދި ސްކޫލް ގަޑީގައި ނުވަތަ ސްކޫލުން ބޭރުގައި ވެސް ކުރިއަށްގެންދެވޭނެ ކަންކަމެވެ.

ރޮބޮޓުތައް ބިނާކޮށް ތަޖުރިބާ ކުރުމުގެ ތެރެއިން ފާޑުކިޔުމުގެ ވިސްނުމާއި ގުޅިގެން މަސައްކަތް ކުރުމާއި މައްސަލަ ހައްލުކުރުން ފަދަ މުހިންމު ހުނަރުތައް ކުދިންނަށް ދަސްވެ އެވެ.

ސްޓެމް ތައުލީމަކީ ބައިނަލްއަގްވާމީ ފެންވަރުގައި ވެސް މަގުބޫލުވަމުން އަންނަ ކަމެކެވެ. ޖަޕާނަށް އެކަނި ބަލައިލިޔަސް، އެގައުމުގެ އަމަލީ ތައުލީމުގެ ތެރޭގައި ސްޓެމް އޮންނަނީ ހިމަނާފަ އެވެ.

ދަރަޖަ ލާނިން ސެންޓަރަކީ ފެބްރުއަރީ 2021ގައި އެޑިއުކޭޝަން މިނިސްޓްރީގައި ރަޖިސްޓްރީކޮށްގެން ހިންގަން ފެށި ގުރުއާން ކުލާހެކެވެ.

މި ސެންޓަރު ހިންގަނީ 100 މީހުންގެ ޖާގައިގެ ފަސް ކުލާސްރޫމް ހުންނަ ކެމްޕަހެއްގަ އެވެ.

ޑީއެލްސީއިން ހިންގާ ގުރުއާން ޕްރޮގްރާމްތައް

ޓިއުޝަން ޕްރޮގްރާމްތައް