ރާއްޖެ- ޗައިނާގެ ވިޔަފާރި އަހަރަކު 700 މިލިއަން ޑޮލަރު؛ އަންނަ އަހަރު 1 ބިލިއަން ޑޮލަރަށް އަރާނެ: ސަރުކާރު

ރާއްޖެ އާއި ޗައިނާއާ ދެމެދު މިހާރު އަހަރަކު 700 މިލިއަން ޑޮލަރުގެ ވިޔަފާރި ކުރާ ކަމަށާއި ފްރީ ޓްރޭޑް އެގްރީމަންޓް (އެފްޓީއޭ) އަށް އަމަލު ކުރަން ފެށުމުން އެ ވިޔަފާރި ބޮޑު ތަނުން އިތުރުވެ، އަހަރަކު 1 ބިލިއަން ޑޮލަރަށް އަރާނެ ކަމަށް ސަރުކާރުން މިއަދު ބުނެފި އެވެ.

ވީ ކިހިނެއް؟ - ޗައިނާގެ އެފްޓީއޭއަށް މި މަހު އަމަލުކުރަން ފަށާނެ ކަމަށް ސަރުކާރުން ބުންޏެވެ. އަދި ޗައިނާއާ އެކު މި މަހު ގާއިމުކުރި ލޯކަލް ކަރަންސީ ސްވޮޕް އެގުރިމަންޓާ ގުޅޭ ގޮތުން ސަރުކާރުން ދެކޭ ގޮތް މިއަދުގެ ނޫސްވެރިންގެ ބައްދަލުވުމުގައި ވަނީ ބުނެފަ އެވެ.

ކީކޭ ބުނީ؟ - ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު ހީނާ ވަލީދު ވިދާޅުވި ގޮތުގައި މިހާރު ރާއްޖެ އާއި ޗައިނާއާ ދެމެދު އަހަރަކު 700 މިލިއަން ޑޮލަރުގެ ވިޔަފާރި ހިނގަ އެވެ.

"ދިވެހިރާއްޖެ އާއި ޗައިނާއާ އެކީގައި މިހާރު އެފްޓީއޭގެ އެގްރިމަންޓުގައިވާ ގޮތުގެ މަތިންނާއި މި އެފްޓީއޭއަށް އަމަލުކުރަން ފެށުމާ ގުޅިގެން 1 ބިލިއަން ޑޮލަރަށް މި ވިޔަފާރި ފުޅާވެގެންދާނެ،" ހީނާ ވިދާޅުވި އެވެ.

ކަރަންޓު އެކައުންޓުގެ މުއާމަލާތްތަކާއި ސީދާ އިންވެސްޓްމަންޓްތައް ދިވެހި ރުފިޔާއިން ކުރެވޭ ގޮތަށް ސަރުކާރުން ޕީޕަލްސް ބޭންކް އޮފް ޗައިނާ (ޕީބީއޯސީ)އާ އެކު އެމްއޯޔޫއެއްގައި ސޮއިކޮށްފައިވާ އިރު އެއިން ވެސް ފައިދާތަކެއް ވާނެ ކަމަށް ހީނާ ވިދާޅުވި އެވެ.

"ޑޮލަރުން ފައިސާ ނުދައްކައި ވަރަށް ގިނަ ކަންކަން ކުރެވިގެން އެބަދޭ. އޭގެ ތެރޭގައި ދިވެހިންނަށް ދަތުރުފަތުރު ކުރެވޭ ލުއިތައް، މުދާ ގަތުމުގައި ޑޮލަރަށް ބަރޯސާވުން ކުޑަވެ ވިޔަފާރިވެރިންނަށް ވެސް މިއިން ފައިދާތަކެއް ލިބިގެންދޭ،" ހީނާ ވިދާޅުވި އެވެ.

އެނގުން މުހިއްމު - ރާއްޖެ އިން ބޭރަށް ދައްކަން ޖެހޭ ދަރަނި ކުރިއަށް އޮތް މަސްތަކުގައި ދައްކަން ފަށަން ޖެހެ އެވެ. ދަރަނީގެ ބޮޑު ބައެއް ދައްކަން އޮތީ 2026 ގަ އެވެ. ޗައިނާއަކީ އެ ދަރަނީގެ ބޮޑު ބައެއް ނިސްބަތްވާ ގައުމެކެވެ.

ސަރުކާރުން ގެންދަނީ ޗައިނާއާއެކީ އިތުރަށް ގުޅުން ބަދަހި ކުރުމަށް މަސައްކަތް ކުރަމުންނެވެ. އެ ގޮތުން:

ފަސް މަންޒަރު - ޗައިނާއާ އެކީ އެފްޓީއޭއެއް ފުރަތަމަ ގާއިމުކުރީ، ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. ނަމަވެސް ދެން އައި ސަރުކާރު، ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން އެ އެފްޓީއޭ ތަންފީޒުކޮށްފައެއް ނުވެ އެވެ.