އައިޔޫއެމްއިން 60 މިލިއަން ރުފިޔާގެ ސުކޫކެއް ވިއްކައިފި

އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)އިން ރާއްޖޭގައި ފުރަތަމަ ފަހަރަށް އިސްލާމީ ޝަރީއާ ހުއްދަކުރާ ސުކޫކް އިސްތިސްނާއު މޮޑެލްގެ ދަށުން އިމާރާތްކުރުމުގެ މަޝްރޫއަކަށް 60 މިލިއަން ރުފިޔާގެ ސުކޫކެއް ވިއްކައި، ސުކޫކުގެ ޖުމްލަ އަދަދަށް ފައިސާ ހޯދައިފި އެވެ.

ވީ ކިހިނެއް؟ - އެ ސުކޫކަކީ އައިޔޫއެމްއިން ހުޅުމާލޭގައި ޓާޝަރީ ތައުލީމީ މަރުކަޒެއް އެޅުމަށް ހިންގާ 'ސަނާބިލް' މަޝްރޫއަށް ބޭނުންވާ ފައިސާ ހޯދުމަށް ވިއްކި ސުކޫކެކެވެ.

އެ ސުކޫކު ވިއްކަން އައިޔޫއެމްއިން ރާއްޖޭގެ ކެޕިޓަލް މާކެޓުގައި އިއުލާންކުރީ މިދިޔަ 4 ޖޫންގަ އެވެ. އަދި މޯލްޑިވްސް ސްޓޮކް އެކްސްޗޭންޖުގެ ވިޔަނަ ޕޯޓަލް މެދުވެރިކޮށް އެ ސުކޫކަށް ސަބްސްކްރައިބް ކުރުމުގެ ފުރުސަތު ހުޅުވާލީ 23 ޖޫންގަ އެވެ.

ބުނީ ކީކޭ؟ - މިކަމާ ބެހޭ ގޮތުން އައިޔޫއެމްގެ ޑެޕިއުޓީ ވައިސް ޗާންސެލަރު، އެޑްމިން އެންޑް ފައިނޭންސް އަހްމަދު އަމީން މުހައްމަދު މިއަދު 'ދައުރު'އަށް ވިދާޅުވީ މިއީ ރާއްޖޭގައި އިމާރާތްކުރުމުގެ މަޝްރޫއަކަށް ބޭނުންވާ ފައިސާ ހޯދަން ވިއްކި ފުރަތަމަ ސުކޫކު އިސްތިސްނާއު ކަމަށެވެ.

އޭނާ ވިދާޅުވީ އެ ސުކޫކަށް ސަބްސްކްރައިބް ކުރުމުގެ ފުރުސަތު ހުޅުވާލި މުއްދަތުގައި ސުކޫކުން ހޯދަން ބޭނުންވި ޖުމްލަ އަދަދު ހޯދުނު ކަމަށެވެ.

އެއީ ސުކޫކެއްގެ މޫނުމަތީ އަގު 1 މިލިއަން ރުފިޔާގެ މަގުންނެވެ. އަދި މަދުވެގެން ފަސް ސުކޫކު ގަންނަން ޖެހޭއިރު، އަމީން ވިދާޅުވީ ސުކޫކު ކާމިޔާބުވީ އެންމެ ފަރާތަކުން ޖުމްލަ އަދަދު ސަބްސްކްރައިބް ކުރުމުން ކަމަށެވެ.

"އެންމެ ފަރާތަކުން ސުކޫކުގެ ޖުމްލަ އަދަދަށް ސަބްސްކްރައިބް ކުރީ. އަޅުގަނޑުމެން 10 އަހަރުގެ މުއްދަތަކަށް، އިންސްޓޯލްމަންޓަށް ބަހާލައިގެން އެ ފަރާތަށް ފައިސާ ދައްކާނަން،" އޭނާ ވިދާޅުވި އެވެ.

ތަފްސީލު - ޕްރޮޖެކްޓު ސަނާބިލްއަކީ އައިޔޫއެމްއިން ހުޅުމާލެ ސެންޓްރަލް ޕާކު ކައިރިން ގަނެފައި އޮތް ބިމެއްގައި ހުޅުމާލޭގެ ފުރަތަމަ ޓާޝަރީ ތައުލީމީ މަރުކަޒު އެޅުމުގެ އަމާޒުގައި ހިންގާ މަޝްރޫއެކެވެ. އައިޔޫއެމްއިން ބުނާ ގޮތުގައި، އެ ތަން ތަރައްގީކުރާ އެންމެ ޒަމާނީ ފެންވަރަށް، މަތީ ތައުލީމުގެ ގިނަ ފުރުސަތުތައް ދިވެހި ދަރިވަރުންނަށް ފަހިވާ ގޮތަށް ކަމަށެވެ.

އަމީން ވިދާޅުވި ގޮތުގައި، މިހާރު އިމާރާތްކުރުމުގެ ހުއްދަ ހޯދުމާއި ކޮންސްޓްރަކްޝަން މަސައްކަތް ވަނީ ފަށާފަ އެވެ.

މީގެ ކުރިން އެކި ކުންފުނިތަކުން ސުކޫކު ވިއްކި ނަމަވެސް، އަމީން ވިދާޅުވާ ގޮތުގައި ސުކޫކެއްގެ ޖުމްލަ އަދަދު ހޯދުނު މިއީ ފުރަތަމަ ފަހަރެވެ.

"މީގެ ކުރިން 10 ނޫނީ 11 ވަރަކަށް ކުންފުނިން ސުކޫކު ވިއްކި. ނަމަވެސް އެއްވެސް ކުންފުންޏަކަށް ސުކޫކް ފުލް އެމައުންޓް ރެއިޒް ނުކުރެވޭ،" އޭނާ ވިދާޅުވި އެވެ.