ހަނިމާދޫ އެއާޕޯޓް ކައިރިން 3 ރިސޯޓް ހަދަން އިންޑިއާގެ އިންވެސްޓަރުން ހޯދަނީ

ހދ. ހަނިމާދޫ އިންޓަނޭޝަލް އެއާޕޯޓް ތަރައްގީކޮށް އެތަން ހުޅުވައި އޮޕަރޭޝަންތައް ފެށެން ވާއިރަށް އެ ސަރަހައްދުގައި ތިން ރިސޯޓް ހުޅުވަން އިންޑިއާގެ އިންވެސްޓަރުން ލިބޭތޯ މަސައްކަތް ކުރަމުން އަންނަކަމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު ހާމަކުރައްވައިފި އެވެ. 

ވީ ކިހިނެއް؟ - މިދިޔަ ހަފްތާގައި އިންޑިއާގައި ކުރިއަށް ދިޔަ 'ވެލްކަމް އިންޑިއާ' ރޯޑްޝޯގެ ކާމިޔާބީގެ މައުލޫމާތު މީޑިއާއަށް ދިނުމަށް މިއަދު އެމްއެމްޕީއާރުސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ފައިސަލް ވިދާޅުވީ އެއާޕޯޓެއް އެންމެ ރަނގަޅު ގޮތުގައި ހިންގަން އެ ސަރަހައްދުގައި 4،000-6،000 އެނދު ހުންނަން ޖެހޭނެ ކަމަށެވެ. 

ތަފްސީލް - މިހާރު ނިމެމުން އަންނަނީ ހަނިމާދޫ އެއާޕޯޓުކަން ފާހަގަކުރައްވައި ފައިސަލް ވިދާޅުވީ އެ އެއާޕޯޓް ރަނގަޅަށް ހިންގަން އެ އެއާޕޯޓާ ކައިރި ހިސާބުގައި މިހާރަށް ވުރެ ގިނަ ޓޫރިޒަމް އެނދުތައް ތަރައްގީ ކުރަން ޖެހޭ ކަމަށެވެ. އެގޮތުން، އޭނާ ވިދާޅުވީ:

"ބަޖެޓުގެ ދަތިކަން ހުއްޓަސް އިންޑަސްޓްރީގެ އެކި ފަރާތްތައް ގުޅިގެން މިއަހަރު ތެރޭ އަދި އެއްފަހަރު އިންޑިއާއަށް ދާން ބޭނުމީ. އިންވެސްޓާ ފޯރަމާ ހަނިމާދޫ އެއާޕޯޓް ހުޅުވެންވާއިރަށް އަޅުގަނޑުމެން މި ބޭނުންވަނީ އެތަނުގެ ހައިއެންޑުގެ 2-3 ރިސޯޓް ޕްރޮޖެކްޓެއް ފެށޭވަރަށް އިންވެސްޓަރުންތަކެއް ހޯދުން. އެއީ އަމާޒަކީ. މިއަހަރު ތެރޭ ބާއްވާނަން،" ފައިސަލް ވިދާޅުވި އެވެ.

ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި ރައީސްގެ ޓޫރިޒަމް ޑިވަލޮޕްމަންޓް އެޑްވައިޒަރު މުހައްމަދު ހަލީލް ވިދާޅުވީ ހަނިމާދޫ އެއާޕޯޓް ހުޅުވެން ވާއިރަށް އެ ސަރަހައްދުގައި ޓޫރިޒަމްގެ އެނދުތަކެއް ނުހެދިއްޖެ ނަމަ އެ އެއާޕޯޓަކީ "ވައިޓް އެލަފަންޓަކަށް" ނުވަތަ ބޭނުން ނުކުރެވޭ ތަނަކަށް ވެދާނެ ކަމަށެވެ. އަދި އެހެންވެއްޖެ ނަމަ އެ އެއާޕޯޓް ހިންގަން ދައުލަތުން ބޮޑު ހަރަދެއް ކުރަން ޖެހޭނެ ކަމަށް ވެސް ހަލީލް ވިދާޅުވި އެވެ. 

އެކަމުން ސަލާމަތްވާން މިހާރުއްސުރެ ޓޫރިޒަމްގެ އިންވެސްޓްމަންޓްތައް ހަނިމާދު އާއި އެ ސަރަހައްދަށް ގެންދަން ޖެހޭ ކަމަށް އޭނާ ވިދާޅުވި އެވެ. އޭނާ ވަނީ ކުދި އަދި މެދުފަންތީގެ ވިޔަފާރިތަކުން އެ ސަރަހައްދުގެ ޓޫރިޒަމަށް އިންވެސްޓްކުރަން ގޮވާލައްވައިފަ އެވެ. 

"މިހާރު ވެސް ސްމޯލް އެންޑް މީޑިއަމް ލެވަލްގެ ވިޔަފާރިތަކުން ހަނިމާދުއަށް  އިންވެސްޓްކުރައްވާށޭ އަޅުގަނޑު ބުނާނީ. [އެގޮތުން]، 50-20 ރޫމުގެ ގެސްޓްހައުސްތައް ހެދީމާ ރަނގަޅުވާނެ، 50 ތަން ހެދުނަން އެއީ ރަނގަޅުވަރެއް،" ހަލީލް ވިދާޅުވި އެވެ. 

އޭނާ ވިދާޅުވީ ރާއްޖޭގެ ބައެއް ސަރަހައްދުތަކުގައި ގެސްޓްހައުސް ވިޔަފާރި ފުޅާނުވެގެން އުޅެނީ އެ ސަރަހައްދުތަކަށް ދިޔުމަށް ދަތުރުފަތުރަށް ކުރަން ޖެހޭ ހަރަދު ބޮޑުވުމުން ކަމަށެވެ. އެހެންވެ، ހައްލަކީ، ހަލީލް ވިދާޅުވި ގޮތުގައި، ރާއްޖެއިން ބޭރުން ސީދާ ފްލައިޓްތައް އެ ސަރަހައްދުތަކަށް ބޭއްވުމެވެ.

ހަލީލް ވިދާޅުވީ އެކި ސަރަހައްދުތަކުގައި ގެސްޓްހައުސްތައް ފުޅާވުމަކީ ރާއްޖޭގެ މުޅި އިގްތިސާދަށް އޭގެ ފައިދާ ކުރާނެ ކަމެކެވެ. އެގޮތުން އޭނާ ވިދާޅުވީ ހަނިމާދޫ އާއި އެ ސަރަހައްދުގައި ގެސްޓްހައުސްތައް ހެދުމުން ވެސް އެ ހެޔޮ ނަތީޖާ ފެންނާނެ ކަމަށެވެ.

"އޭރުން މުޅިގައުމުގެ އިކޮނޮމީ ރަނގަޅުކުރެވި. ޓެކްސް ބޭސް ރަނގަޅުވާނެ،" ހަލީލް ވިދާޅުވި އެވެ.

އެނގުން މުހިންމު - އިންޑިއާގެ ޖޭއެމްސީ އެކްސްޕޯޓްސްއާ ހަވާލުކޮށްގެން ހަނިމާދޫ އެއާޕޯޓް ތަރައްގީގެ ކުރުމުގެ މަޝްރޫއު ފެށީ މިދިޔަ އަހަރުގެ ކުރީކޮޅު އެވެ. އިންޑިއާގެ އެގްޒިމް ބޭންކުން 136.6 މިލިއަން ޑޮލަރު (2.1 ބިލިއަން ރުފިޔާ)ގެ ލޯނެއް ނަގައިގެން ކުރިއަށްގެންދާ އެ މަޝްރޫއުގެ ދަށުން:

އެ މަޝްރޫއުގެ ދަށުން އަަލަށް ހެދި ރަންވޭގެ ބައެއް މިހާރު ވަނީ ބޭނުން ކުރަން ވެސް ފަށައިފަ އެވެ. 

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަންދާޒާކޮށްފައި ވަނީ އެ އެއާޕޯޓް ބޮޑުކުރުމާ އެކު، ހއ. އަދި ހދ.އަށް 8،000 ޓޫރިސްޓް އެނދު ފަސް އަހަރުން އިތުރުވާނެ ކަމަށެވެ.