ދިރާގުން ދޭން ބުނި ޓެސްލާ ކާރު ލިބޭ ނަސީބުވެރިޔާ ހޮވައިފި

ގިނަ ބަޔަކު އިންތިޒާރުކުރަމުން އައި 'ވިން އަ ޓެސްލާ' ޕްރޮމޯޝަންގެ ނަސީބުވެރިޔާ އިއުލާންކޮށްފި އެވެ.

ވީ ކިހިނެއް؟ - ޓެސްލާ ކާރު ލިބޭ ނަސީބުވެރިޔާ އިއުލާންކުރީ ބޮޑު އީދުގެ މުނާސަބަތުގައި މިހާރު ހުޅުމާލެ ސެންޓްރަލް ޕާކުގައި ދިރާގުން ބާއްވަމުން އަންނަ 'ދިރާގު އީދު ޝޯ'ގެ ތެރެއިންނެވެ.

ދިރާގު ޕޯސްޓްޕެއިޑް އަދި ފައިބާ ބްރޯޑްބޭންޑް ކަސްޓަމަރުންގެ މެދުގައި ނެގި ގުރުއަތުން ހޮވިގެން ޓެސްލާ ކާރު ލިބެނީ މުސްތަފާ މުހައްމަދު، ކ.ތުލުސްދޫ އަށެވެ.

ތަފްސީލު - ދިރާގުގެ އޮފިޝަލަކު 'ދައުރު'އަށް ވިދާޅުވީ ގުރުއަތު ނެގިއިރު ނަސީބުވެރި ފަރާތް އެ ތަނުގައި ނެތް ކަމަށެވެ. އަދި ކުރިއަށް އޮތް ހަފްތާގެ ތެރޭގައި ވެރިފިކޭޝަން މަރުހަލާ ފުރިހަމަ ކުރުމުގެ މަސައްކަތް ކުރާނެ ކަމަށާއި އިތުރު މައުލޫމާތު ހިއްސާކުރާނެ ކަމަށް އޭނާ ވިދާޅުވި އެވެ.

ގުރުއަތުގެ މަރުހަލާ އިންސާފުވެރިކަމާ އެކު ކުރިއަށް ގެންގޮސް ބެލެހެއްޓުމަށްޓަކައި ދިރާގުން ވަނީ ތާޑް ޕާޓީ އޮޑިޓަރެއްގެ ގޮތުގައި ކްރޯ މޯލްޑިވްސް ހަމަޖައްސާފަ އެވެ. ކްރޯ މޯލްޑިވްސްއިން ވަނީ ގުރު ނެގުމުގެ މަރުހަލާތައް ގާތުން ބަލައި، ގުރު ނެގިއިރު އެ ތަނުގައި ވެސް ހަރަކާތްތެރިވެފަ އެވެ.