އޭޝްލީ ޕާކް ބޮޑު ބައްޔަކުން ސަލާމަތްވުމުން ރާއްޖޭގެ ޖޯލި ރިސޯޓަށް ހާއްސަ ޝުކުރެއް

'އެމިލީ އިން ޕެރިސް'ގެ ތަރި އޭޝްލީ ޕާކް ހުރީ އޭނާ ރާއްޖޭގައި އެންމެ ފަހުން ޗުއްޓީ ހޭދަކުރި ރިސޯޓު، ޖޯލި ބީންގްއަށް ޝުކުރުން ފުރިފަ އެވެ. އެ ތަނުގައި ހުއްޓާ ދިމާވި ސިއްހީ މައްސަލައެއްގައި ދިން ފަރުވާ އާއި ސަމާލުކަމަށްޓަކަ އެވެ. ބެހެއްޓި އޯގާތެރިކަމާއި ފަރުވާތެރިކަމަށްޓަކަ އެވެ.

އެމެރިކާގެ އެކްޓަރު އޭޝްލީ، 32، މިދިޔަ ޑިސެމްބަރު މަހު ރާއްޖެއަށް ކުރި ދަތުރު ބަދަލުވީ އުންމީދު ކުރި ގޮތަކަށް ނޫނެވެ. ޖޯލި މޯލްޑިވްސްގައި ހުއްޓާ، އާދައިގެ ސިއްހީ ކަމެއް ބޮޑުވެ، އޭނާ 'ސެޕްޓިކް ޝޮކް' އަކަށް ދިޔައީ އެވެ.

'އެމިލީ އިން ޕެރިސް'ގައި ކުޅޭ މިންޑީ ޗެންގެ ރޯލުން ބޮޑު މަގުބޫލުކަމެއް ހޯދާފައިވާ އޭޝްލީ މިރޭ އިންސްޓަގްރާމް ޕޯސްޓެއްގައި ބުނިގޮތުގައި އޭނާއަށް އަސްލު ދިމާވި މައްސަލައަކީ ޓޮންސިލައިޓިސް (ޓޮންސިލް ދުޅަވުން) އެވެ. ނަމަވެސް އިންފެކްޝަން ބޮޑުވެ، ނުރައްކާތެރި މިންވަރަކަށް ލޭގެ ޕްރެޝަރު ދަށްވެ، އެކި ގުނަވަންތަކަށް އަސަރުކޮށް، ފުރާނައަށް ނުރައްކާވާ ހިސާބަށް ހާލަތު ގޯސްވީ އެވެ. އެއާ އެކު އޭނާގެ ޗުއްޓީ ދަތުރު، ފަރުވާ ދަތުރަކަށް ބަދަލުވި އެވެ.

'އެމިލީ އިން ޕެރިސް'ގެ ތިންވަނަ ސީޒަނުން އޭނާއާ އެކު ފެނިފައިވާ އެކްޓަރު ޕޯލް ފޯމަންއާ އެކު ރާއްޖެއަށް ކުރި ދަތުރުގައި ފަރުވާގެ ފުރަތަމަ މަރުހަލާ ފެށީ، އޭޝްލީގެ ޕޯސްޓުން އެނގޭ ގޮތުގައި، ޖޯލި އިންނެވެ. ރ. އަތޮޅު ބޮޑުފުށީގައި ހަދާފައިވާ ޖޯލި ބީންގްއަކީ ރާއްޖޭގެ ފުރަތަމަ އަދި ހަމައެކަނި ސައްތައިން ސައްތަ ފުލް ވެލްނަސް ރިސޯޓެވެ.

އޭޝްލީ ބަލިހެން ހީވާތީ ފުރަތަމަ ދެއްކީ އެ ރިސޯޓުގައި ހުންނަ ކްލިނިކަށެވެ. ދިމާވެގެން އުޅޭ މައްސަލަ އެނގުމާ އެކު އެ ތަނުގެ ޓީމުން ވަގުތުން އޭނާއަށް އެހީވާން ފެށި އެވެ. ބަސް ތަރުޖަމާކޮށްދިނުމާއި އެ ނޫނަސް އެ ގަޑީގައި ބޭނުންވި ހުރިހާ އެހީތެރިކަމެއް ފޯރުކޮށްދިނުމުގައި ދެމިތިއްބެވެ. އެކަމަށްޓަކައި، އޭޝްލީގެ ޝުކުރުގެ ލިސްޓުގައި ޖޯލި މޯލްޑިވްސް ހާއްސަކޮށް ހިމަނާފައިވެ އެވެ. އަދި އޭނާއަށް ފަރުވާދިން ހުރިހާ ޑޮކްޓަރުންނާއި އައިސީޔޫ ނަރުހުން، ވަރުބަލިކަމެއް ނެތި ކުރި ބުރަ މަސައްކަތަށްޓަކައި ވެސް އޭޝްލީ ވަނީ ޝުކުރު އަދާކޮށްފަ އެވެ.

އޭޝްލީ ބުނިގޮތުގައި އޭނާ ވަނީ ބީރައްޓެހި ތިން ހޮސްޕިޓަލަކުން ފަރުވާ ހޯދައިފަ އެވެ. އައިސީޔޫގައި ހަފްތާއެއް ހޭދަކުރަން ޖެހުނެވެ. އަދި ގުނައި އަދަދުނުކުރެވޭހާ ގިނަ ސްކޭންތަކާއި ޓެސްޓުތައް ހަދައި، އިންޖެކްޝަން ޖަހަން ޖެހުނެވެ. ކެތް ނުވާ މިންވަރަށް ތަދު އިހުސާސް ކުރަމުންދިޔައީ އާއިލާ އާއި ރައްޓެހިންނާ ވަކިން، ދުނިޔޭގެ އަނެއް ބިތުގައި ކަމަށް އޭނާގެ ޕޯސްޓުގައި ކިޔައިދީފައިވެ އެވެ.

އޭޝްލީ ބުނިގޮތުގައި އޭނާގެ ހާލު އަންނަނީ ރަނގަޅުވަމުންނެވެ. ބަލީގެ އެންމެ ގޯސް ހާލަތުން މިހާރު ވަނީ އަރައިގަނެވިފަ އެވެ. ނަމަވެސް ފަރުވާގެ ދަތުރު އަދި ނުނިމެ އެވެ.