މަސް ގަންނަ އަގު ބޮޑުކުރުމަކީ ވަރަށް ބޮޑު ގެއްލުމެއް: އެންޒީ

މަސް ގަންނަ އަގު 25ރ.އަށް ސަރުކާރުން ބޮޑުކުރުމުން ވަރަށް ބޮޑަށް ގެއްލުމާ ކުރިމަތިވާނޭ ކަމަށް، ރާއްޖޭގައި އެންމެ ފުޅާ ދާއިރާއެއްގައި މަސްވެރިކަމުގައި ހަރަކާތްތެރިވާ އަމިއްލަ ކުންފުނި، އެންޒީއިން މިއަދު ބުނެފި އެވެ. 

ވީ ކިހިނެއް؟ - ރާއްޖެއިން ވިލާތުގެ ގައުމުތަކަށް ބޭރު ކުރާ މަހަށް ޑިއުޓީ ކަނޑާލާނޭކަމުގެ ޔަގީންކަން ލިބިފައި ވާތީ، ސަރުކާރުން ވަނީ މިއަދުން ފެށިގެން މަސްވެރިންގެ އަތުން މަސް ގަންނަ އެންމެ ދަށް އަގަކީ 25ރ. ކަމުގައި ހަމަޖައްސައި އިއްޔެ އެކަން އިއުލާން ކޮށްފަ އެވެ.

ބުނީ ކީކޭ؟ - އެ ނިންމުމާ ގުޅިގެން 'ދައުރު'އާ ވާހަކަ ދައްކަވަމުން އެންޒީގެ މެނޭޖިން ޑިރެކްޓަރު އަބްދުލް ވާހިދު ވިދާޅުވީ 20ރ.އަށް މަސް ކިލޯއެއް ގަނެގެން ވިޔަފާރި ކުރާ ނަމަ، އެކަން ކުރަން ޖެހޭނީ ކިލޯއަކުން 8ރ. ވަރުގެ ގެއްލުމުގައި ކަމަށެވެ. އަދި ސަރުކާރުން މަސް ގަންނަ އަގު ބޮޑުކުރީ ޔޫރަޕުން ޑިއުޓީ ކަނޑާލާނޭ ކަމަށް ބުނެ ނަމަވެސް، އެކަން އަދި ވާނޭ ދުވަހެއް ނޭނގޭ ކަމަށް އޭނާ ވިދާޅުވި އެވެ.

"މިއަދު ވެސް އަޅުގަނޑުމެން މަސް ގަންނަން ޖެހޭ ދުވަހެއް މިއީ. ޑިއުޓީ ކަނޑާލާނެ ދުވަހެއް އަޅުގަނޑުމެންނަށް އަދިއެއް އެނގިފައެއް ނެތް. އެހެން ނަމަވެސް، މިއަދު ވެސް ގެއްލުމުގައި މަސް ގަނެގެން ވިޔަފާރިއެއް ނުކުރެވޭނެ. ކުރީގެ އަގުގައި އޯޑަރުތަކާ އެއްޗެހި ނަގާފައި ހުރީ. އެހެންވީމާ، ގެއްލުންވާ ބައި ސަރުކާރުން ނުދޭ ނަމަ، އަޅުގަނޑުމެން ޖެހޭނީ ފެކްޓަރީ ބަންދުކުރަން،" ވާހިދު ވިދާޅުވި އެވެ.

އޭނާ ވިދާޅުވީ މިފްކޯއަށް 17ރ.އަށް މަސް ކިލޯއެއް ގަންނަމުން ދިޔައީ ވެސް އެކި ގޮތް ގޮތުން ސަރުކާރުން ސަބްސިޑީ ދީގެން ކަމަށެވެ. އަދި މަސް ގަންނަ އަގު އިތުރަށް ބޮޑުކުރުމުން ގެއްލުން އިތުރަށް ބޮޑުވާނެ ކަމަށް ވާހިދު ވިދާޅުވި އެވެ.

މަސްވެރިކަން ކުރިއަރުވަައި މަހަށް ރަނގަޅު އަގެއް ހޯދައިދޭން ބޭނުން ނަމަ، ސަރުކާރުތަކުން ޖެހޭނީ މުޅި ސިނާއަތަށް ފައިދާވާނޭ ގޮތަށް ވަސީލަތްތަކާއި އުމްރާނީ ތަރައްގީ ގެންނަންކަން އޭނާ ފާހަގަކުރެއްވި އެވެ.

"މި އަހަރު ވެސް ބަޖެޓްގައި ވެސް އެބަ އޮތް ސަބްސިޑީ މިފްކޯއަށް ހިމަނާފައި. އަޅުގަނޑުމެން ވަކާލާތު ކުރީ މިފްކޯގައި ހުރެގެން އެ ފައިސާ ދާނީ އެކި ހަރަދުތަކަށޭ، އެހެން ވީމާ އެ އަދަދު ސީދާ މަސްވެރިންނަށް ޕާސްވާނޭ ގޮތެއް ހަދަން ޖެހޭ،" ވާހިދު ވިދާޅުވި އެވެ.