އެމްއެމްއޭ އާއި ބީއެމްއެލްއިން މިއަދު އެއްބަސްވުމުގައި ސޮއިކުރަނީ. (ފޮޓޯ/އެމްއެމްއޭ)
ވަގުތުން ޕޭމަންޓް ހެދޭ ނިޒާމު ބޭނުންކުރަން އަންނަ މަހު ފަށަނީ
ރާއްޖޭގައި ފަސޭހަ، އަވަސް އަދި ރައްކާތެރި ޕޭމަންޓް ހިދުމަތެއް ފޯރުކޮށްދިނުމަށް މަގުފަހިކޮށްދިނުމުގެ ގޮތުން މަރުކަޒީ ބޭންކު، އެމްއެމްއޭއިން ގާއިމުކުރާ އިންސްޓެންޓް ޕޭމަންޓް ސިސްޓަމް (އައިޕީއެސް) އަންނަ މަހުގެ ފަހު ހަފްތާގައި ލައިވް ކުރާނެ ކަމަށް ގަަވަރުނަރު އަލީ ހާޝިމް މިއަދު ވިދާޅުވެއްޖެ އެވެ.
ވީ ކިހިނެއް؟ - މިއަދު އެމްއެމްއޭގައި ބޭއްވި ރަސްމިއްޔާތެއްގައި އައިޕީއެސްގެ ޕައިލަޓް ރަންގައި ބައިވެރިވާ ބޭންކުތަކާ އެކު އެއްބަސްވުމުގައި ވަނީ ސޮއިކޮށްފަ އެވެ. އެއީ:
-
ބޭންކް އޮފް މޯލްޑިވްސް (ބީއެމްއެލް)
-
މޯލްޑިވްސް އިސްލާމިކް ބޭންކް (އެމްއައިބީ)
-
ސްޓޭޓް ބޭންކް އޮފް އިންޑިއާ (އެސްބީއައި)
އެނގުން މުހިންމު - އައިޕީއެސް ބޭނުންކުރަން ފަށަން އެމްއެމްއޭއިން މީގެ ކުރިން ދިން ތާރީހަކީ ސެޕްޓެމްބަރު 2022 އެވެ. އެ ތާރީހު ފަހަނައަޅައި ދިޔަ ފަހުން އެ ސިސްޓަމް ތައާރަފްކުރާނެ ވަކި ތާރީހެއް އެމްއެމްއޭއިން ނުބުނެ އެވެ.
ބުނީ ކީކޭ؟ - މިއަދުގެ ރަސްމިއްޔާތުގައި ގަވަރުނަރު ވިދާޅުވީ މިއަދު ސޮއިކުރީ ޓެސްޓިންގެ މަސައްކަތް ނިންމާފައިވާ ބޭންކުތަކާ އެކު ކަމަށެވެ. އޭނާ ވިދާޅުވީ އިތުރު ބޭންކްތައް ވެސް މި ޓެސްޓު ހަދަން ތައްޔާރުވަމުން އަންނަ ކަމަށާއި ފުރަތަމަ ފިޔަވަހީގައި ކުރިއަށްދާނީ މިއަދު ސޮއިކުރި ތިން ބޭންކާ އެކު ކަމަށެވެ.
"އެހެން ބޭންކްތައް އައިޕީއެސްގެ ތެރެއަށް ވަންނާނެ، ސިސްޓަމް މުޅިން ލޯންޗު ކުރީމާ. ސިސްޓަމް ލައިވް ކުރާނެ ތާރީހަކަށް މިހާރު ކަނޑައަޅާފައިވަނީ އޮގަސްޓް މަހުގެ ފަހު ހަފްތާއަށް،" އޭނާ ވިދާޅުވި އެވެ.
ތަފްސީލު - މިއަދު ބީއެމްއެލް، އެމްއައިބީ އަދި އެސްބީއާ އެކު ސޮއިކުރި އެއްބަސްވުމަކީ، އައިޕީއެސްގައި ބައިވެރިވުމުގެ ސަބަބުން ލިބިދޭ ހައްގުތަކާއި އުފުލަން ޖެހޭ އިލްތިޒާމްތަކަށް އެއްބަސްވެ، ބައިވެރިވާ ބޭންކުތަކާއި ސިސްޓަމްގެ އޮޕަރޭޓަރު ކަމަށްވާ އެމްއެމްއޭއާ ދެމެދު ސޮއިކުރި އެއްބަސްވުމެކެވެ.
އެމްއެމްއޭއިން ބުނީ، ކުރިއަށް އޮތް ދެ ހަފްތާގެ ތެރޭގައި އައިޕީއެސްގެ ޕައިލެޓް ޓެސްޓިންގެ މަސައްކަތް ފަށާނެ ކަމަށެވެ.
އިންސްޓަންޓް ޕޭމަންޓް ސިސްޓަމް ފަރުމާކޮށްފައި ވަނީ ޒަމާނީ ޓެކްނޮލޮޖީގެ އެހީގައި ފަސޭހަކަމާއި ރައްކާތެރިކަމާ އެކު މާލީ މުއާމަލާތްތައް ވަގުތުން ކުރެވޭނޭ ގޮތަށެވެ.
ކޮމެންޓް (2)
ހިތަދޫ 2
ފުރާތު