އާރުޓީއެލް ހިދުމަތުގައި ބޭނުންކުރަން އަލް-ޝާލީއިން ބަނދެފައިވާ ދެ ފެރީ މާލޭ އެއް ނަންބަރު ފާލަމުގައި އަޅާފައި. (ދައުރު ފޮޓޯ)
އާރުޓީއެލް ފެރީތަކުގެ މަސައްކަތް ޝެޑިއުލްއާ އެއްގޮތަށް ނިންމާނަން: އަލް-ޝާލީ
ސަރުކާރުން އެމްޓީސީސީއާ ހަވާލުކޮށްގެން ގާއިމްކުރަމުން އަންނަ ދަތުރުފަތުރުގެ ގައުމީ ނިޒާމު، ރާއްޖެ ޓްރާންސްޕޯޓް ލިންކު (އާރުޓީއެލް)ގެ ހިދުމަތް ފުޅާކުރުމަށް ބޭނުންވާ ފެރީ ބަނުމުގެ މަސައްކަތް ޝެޑިއުލްއާ އެއްގޮތަށް، ވަރަށް ބާރު ސްޕީޑުގައި ކުރިއަށްދާ ކަމަށް، އެ މަސައްކަތް ކުރާ އަލް-ޝާލީ މެރިން އިން ބުނެފި އެވެ.
މަޝްރޫއުގެ ތަފްސީލު
-
އާރުޓީއެލް ހިދުމަތް ދިނުމަށް ބޭނުންވާ ފެރީ ބަންނަން ހަވާލުކޮށްފައިވަނީ އަލް-ޝާލީ މެރިންއާ
-
ދެ އަހަރުގެ ތެރޭގައި ޖުމްލަ 65 ފެރީ ބަންނާނެ
-
އެ ފެރީތައް ބޭނުންކުރާނީ އާރުޓީއެލްގެ ފޭސް ދޭއް އަދި ތިނެއްގައި ހިމެނޭ، މިހާރު އެ ހިދުމަތް ނުދޭ 17 އަތޮޅަކަށް އެ ހިދުމަތް ފުޅާކުރަން
-
ހައި ސްޕީޑް އެ ފެރީތަކުގައި 50 މީހުންގެ ޖާގައިގެ އިތުރުން ބަލިމީހުން ބާއްވާ އެނދަކާއި ދެ ވީލްޗެއާގެ ޖާގަ ހުންނާނެ
އަލް-ޝާލީ މެރިންގެ ޖެނެރަލް މެނޭޖަރު އިސްމާއިލް ޝަރީފް ވިދާޅުވީ މިދިޔަ މަހުގެ ނިޔަލަށް، އާރުޓީއެލް ހިދުމަތަށް ބޭނުންވާ ހަތަރު ފެރީ ބަނުމުގެ މަސައްކަތް ނިންމައި އެމްޓީސީސީއާ ހަވާލުކޮށްފައިވާ ކަމަށެވެ.
"ވަރަށް ބާރު ސްޕީޑުގައި އާރުޓީއެލް ފެރީ ބަނުމުގެ މަސައްކަތް ކުރިއަށް އެބަދޭ. ޝެޑިއުލްއާ އެއްގޮތަށް ފެރީތަކުގެ މަސައްކަތް ނިންމައި ޑެލިވާކުރެވޭނެކަމުގެ ޔަގީންކަން އެބައޮތް،" އޭނާ ވިދާޅުވި އެވެ.
އަލް-ޝާލީ މެރިން މޯލްޑިވްސް
ޔޫއޭއީގެ އަލް-ޝާލީ މެރިން އާއި ރާއްޖޭގެ ކޯސްޓްލައިން އިންވެސްޓްމަންޓްސް ގުޅިގެން 2006 ވަނަ އަހަރު އުފެއްދި އަލް-ޝާލީ މެރިން މޯލްޑިވްސްއަކީ ރާއްޖޭގައި އެންމެ ފުޅާ ދާއިރާއެއްގައި ކަނޑު އުޅަނދުފަހަރު ބަނުމުގެ ހިދުމަތް، އެންމެ އިތުބާރާ އެކު ފޯރުކޮށްދޭ ކުންފުންޏެވެ.
ތިލަފުށީގައި ހުންނަ އެ ކުންފުނީގެ ބޯޓްޔާޑުގައި މައިގަނޑު ގޮތެއްގައި އާރުޓީއެލް ފެރީ ބަނުމުގެ މަސައްކަތް ކުރަމުންދިޔަ ނަމަވެސް، ކޯޕަރޭޓް ކަސްޓަމަރުންގެ ފަރާތުން ލިބޭ އޯޑަރުތަކަށް ބޭނުންވާ އޮޑިދޯނިފަހަރު ބަނުމުގެ މަސައްކަތް ކުރުމުގެ އިތުރުން ފައިބަރު އުޅަނދު އެހެލުމާއި މަރާމާތު ކުރުމުގެ އެންމެހައި މަސައްކަތްތައް އެ ކުންފުނިން އަންނަނީ ކުރަމުންނެވެ.
ފެންވަރު ރަނގަޅު ފައިބަގްލާސް އުޅަނދުފަހަރު ބަންނަ އަލް-ޝާލީ ފާހަގަވެފައިވަނީ ގަވާއިދުން އާ އުޅަނދުފަހަރު މާކެޓަށް ނެރޭ ކުންފުންޏެއްގެ ގޮތުގަ އެވެ.