ހޮޓެލް އޭޝިއާ ކަލިނަރީ ޗެލެންޖުގައި ދިވެހި ޝެފުން ވިދާލައިފި

ހޮސްޕިޓަލިޓީ ސިނާއަތުގެ ސަޕްލަޔަރުންނާއި ވިޔަފާރިތައް އެއް ތަން ކުރުމަށް ދެކުނު އޭޝިއާ ސަރަހައްދުގައި ބާއްވާ އެންމެ ބޮޑު ޓްރޭޑް ޝޯ ކަމަށްވާ 'ހޮޓެލް އޭޝިއާ' މައުރަޒުގެ ކަލިނަރީ ޗެލެންޖުގެ ވަނަތައް ހޮވައިފި އެވެ.

ވީ ކިިހިނެއް؟ - ކޮވިޑްގެ ސަބަބުން ދެ އަހަރުގެ މެދުކެނޑުމަކަށް ފަހު ހޮޓެލް އޭޝިއާ ހޮސްޕިޓަލިޓީ މައުރަޒު ކުރިއަށް ދިޔައީ މި މަހު 10-12އަށް، ދަރުބާރުގޭގަ އެވެ. އެ މައުރަޒުގެ ބައެއްގެ ގޮތުގައި ކުރިއަށް ގެންދިޔަ ކެއްކުމުގެ މުބާރާތް 'ހޮޓެލް އޭޝިއާ މޯލްޑިވްސް ކަލިނަރީ ޗެލެންޖު' ފެށީ އޭގެ އެއް ދުވަސް ކުރިންނެވެ.

އެ ހަރަކާތުގެ މައި ސްޕޮންސަރަކީ ދުނިޔޭގެ މަޝްހޫރު ބްރޭންޑުތަކެއް ރާއްޖެ އެތެރެކޮށް ވިއްކާ ބެސްޓް ބައި މޯލްޑިވްސް (ބީބީއެމް) އެވެ.

ތަފްސީލު - އެ އެގްބިޝަންގެ މައިގަނޑު އެއް މަގުސަދަކީ ދުނިޔޭގެ ފެންވަރުގެ ޝެފުން އުފެއްދުމެވެ. މި އަހަރުގެ ކެއްކުމުގެ މުބާރާތުގައި 20 ކެޓަގަރީއަކުން 500އަށް ވުރެ ގިނަ ޝެފުން ވާދަކުރި އެވެ.

ކޮންމެ ކެޓަގަރީއަކުން ވެސް އެއް ވަނަ، ދެ ވަނަ އަދި ތިން ވަނައަށް ދިޔަ ފަރާތްތަކަށް ފައިސާގެ އިނާމެއް ދޭއިރު، މައި އެވޯޑު ކެޓަގަރީތަކަށް ލިބޭ ފައިސާގެ އިނާމު ބޮޑުވާނެ އެވެ. އަދި އެ ބައިގައި ހިމެނޭ 'މޮސްޓް އައުޓްސްޓޭންޑިން ޝެފަ'ށް ފައިސާގެ އިނާމުގެ އިތުރުން ސިންގަޕޫރު ދެކޮޅު ޓިކެޓު ލިބޭނެ އެވެ.

ހޮޓެލް އޭޝިއާ ކަލިނަރީ ޗެލެންޖުގެ 20 ކެޓަގަރީގައި ވާދަކޮށްގެން އެކި ކެޓަގަރީތަކުން 13 ދިވެހި ޝެފުން ވަނީ ވަނަ ހޯދާފަ އެވެ. އެގޮތުން، އޭގެ ތެރެއިން ފަސް ކެޓަގަރީ އަކުން ދިވެހި ޝެފުން ވަނީ އެއް ވަނަ ހޯދަފަ އެވެ.

މެއިން އެވޯޑްތައް:

ބުނީ ކީކޭ؟ - ބީބީއެމްގެ އޮފިޝަލަކު 'ދައުރު'އަށް ވިދާޅުވި ގޮތުގައި، ޝެފުންނަށް ކުރިއެރުން ހޯދައިދިނުމަށް އެ ކުންފުނިން އަބަދުވެސް އަންނަނީ މަސައްކަތް ކުރަމުންނެވެ. އެގޮތުން، ބައިނަލްއަގްވާމީ އެކިއެކި ޕްލެޓްފޯމުތަކުން ޝެފުންނަށް ފަހިި ފުރުސަތުތަކެއް ހޯދައިދޭން އެ ކުންފުނިން މަސައްކަތް ކުރާއިރު، އޭނާ ވިދާޅުވީ ދިވެހި ޝެފުންނަށް އެ ކުންފުނިން ހާއްސަ ސަމާލުކަމެއް ދޭ ކަމަށެވެ.

ކަލިނަރީ ޗެލެންޖުގެ އެންމެ މޮޅު ޝެފް އަދި މުޅިން އަލަށް ތައާރަފުކުރި 'ޓޮޕް މޯލްޑިވިއަން ޝެފް - ބީބީއެމް ޗެއާމަންސް ޓްރޮފީ' ކާމިޔާބުކުރި ފޯ ސީޒަންސް ލަނޑާ ގިރާވަރުގެ އަހްމަދު މާޒިމް ވަނީ ބީބީއެމް އިން މިފަދަ ފުރުސަތެއް ހޯދައިދިންކަން ފާހަގަކޮށް އެކަމަށް ޝުކުރު އަދާކޮށްފަ އެވެ.

"ބީބީއެމް [ޝެފުންގެ] ޒުވާން ޖެނެރޭޝަނަށް ދޭ ސަޕޯޓު ފާހަގަކުރަން. އަދި އިންޓަނޭޝަނަލް ޕްލެޓްފޯމުތަކުގައި ޕާފޯމް ކޮށްލުމުގެ ފުރުސަތު ދިވެހިންނަށް ދޭތީ އެކަމަށް ޝުކުރު އަދާކުރަން،" އޭނާ ބުންޏެވެ.

މާޒިމް ބުނީ އެ ހިސާބަށް ވާސިލްވުމުގައި ފޯ ސީޒަންސް ލަނޑާ ގިރާވަރު އަދި ކުޑަހުރާގެ ކަލިނަރީ ޓީމުންނާއި އޭނާގެ އާއިލާ އިން ލިބުނު އެހީތެރިކަން ފާހަގަކޮށް، އެ ފަރާތްތަކަށް ޝުކުރު އަދާކޮށްފަ އެވެ.

ހޮޓެލް އޭޝިއާ ކަލިނަރީ ޗެލެންޖް ފަދަ ބޮޑު މުބާރާތެއް އިންތިޒާމުކޮށް ބޭއްވިކަން ފާހަގަކޮށް ސޯލްޓް ކެފޭގެ ގްޒެކެޓިވް ޝެފް އާދިލް ވަނީ ހާއްސަ ޝުކުރެއް އެ ކުންފުންޏަށް އަދާކޮށްފަ އެވެ. އެ މުބާރާތުގެ ދެ ކެޓަގަރީ އަކުން ސޯލްޓް ކެފޭގެ ޝެފުންނަށް ވަނީ ވަނަ ލިބިފަ އެވެ.

"ބީބީއެމް އަކީ ހާއްސަކޮށް މި ދާއިރާގައި ކުރިއަށްދާން އެކި ގޮތްގޮތުން އެކި ކަންކަން މަގުފަހިކޮށްދޭ ބައެއް. އަދި އެކި ގޮތްގޮތުން އެހީތެރިކަންވެސް ފޯރުކޮށްދޭ،" އޭނާ ބުންޏެވެ.

އެނގުން މުހިންމު - މި އަހަރުގެ ކަލިނަރީ ޗެލެންޖު، ޝެފްސް ގިލްޑް އޮފް މޯލްޑިވްސް އިން ވަނީ އެންޑޯޒްކޮށްފަ އެވެ. އަދި އެ މުބާރާތް މީގެ ކުރިން ވޯލްޑްޝެފްސްގެ ފަރާތުން ވެސް އެންޑޯޒްކޮށްފައިވެ އެވެ.