ބޭރުގެ ހަނގުރާމައެއްގައި ދިވެހިންތަކެއް ހަރަކާތްތެރި ވަނީ: ހަނގުރާމައަށް ދިޔަ ދިވެހި ބައެއް ފިރިހެނުން މަރުވެފައިވާއިރު އެ މީހުންގެ އަނބިދަރިން ކޭމްޕުތަކުގައި ހާލުގައި ޖެހިފައި އެބަ ތިބި (ފައިލް ފޮޓޯ)
ހަނގުރާމައަށް ދިޔަ ދިވެހި އަންހެނަކާއި އޭނާގެ ހަތަރު ދަރިން ރާއްޖެ ގެނެސްފި
ހަނގުރާމައަށް ރާއްޖެއިން ބޭރަށް ދިޔަ މީހުންގެ ތެރެއިން ދިވެހި އަންހެނަކާއި އޭނާގެ ހަތަރު ދަރިން މިއަދު އަނބުރާ ރާއްޖެއަށް ގެނެސްފި އެވެ.
ވީ ކިހިނެއް؟ - ހޯމް މިނިސްޓްރީއިން މިއަދު ނެރުނު ބަޔާނެއްގައި ބުނީ، ރާއްޖެއިން ބޭރަށް ހަނގުރާމައަށް ދިޔަ ބަޔަކު ހާލުގައި ޖެހި ފުރާނައަށް ނުރައްކާވާ ހިސާބަށް ގޮސްފައިވާތީ، އެ އާއިލާގެ އަންހެނަކާއި ކުޑަކުދިން މިއަދު ރާއްޖެ ގެނެސްފައިވާ ކަމަށެވެ. އެއީ ދިވެހި އަންހެނަކާއި އޭނާގެ 18 އަހަރު ނުފުރޭ ހަަތަރު ދަރިންނެވެ.
ހޯމް މިނިސްޓްރީއިން ބުނި ގޮތުގައި އެ އަންހެން މީހާއާއި އޭނާގެ ދަރިން އަނބުރާ ގެންނެސްފައި ވަނީ އެ މީހުން ޒިންމާދާރު ދިވެހީންގެ ގޮތުގައި އަލުން އަނބުރާ މުޖުތަމައަށް ނެރުމަށެވެ. މިއީ އެގޮތަށް ގެނައި ފުރަތަމަ އާއިލާ ކަމަށް އެވެ.
-
އިތުރަށް ކިޔާލަން - ޓެރަރިޒަމްގެ ތުހުމަތުގައި ބަންދުކުރާ މީހުން ވެސް ރިހެބިލިޓޭޓުކުރެވޭ ގޮތަށް ގަވާއިދު ހަދައިފި
ތަފްސީލު - އެ މީހުންގެ ޒާތީ މައުލޫމާތު ހާމަ ނުކުރުމަށް ވެސް މިނިސްޓްރީއިން އެދުނެވެ. ކުޑަކުދިންނާއި އަނިޔާއަށް ހުށަހެޅިފައިވާ އަންހެނުންނަކީ ރާއްޖޭގެ ގާނޫނުތަކުންނާއި ބައިނަލްއަގުވާމީ މުއާހަދާތަކުން ހާއްސަ ސަލާމަތާއި ރައްކާތެރިކަން ދީފައިވާ ބަޔަކަށްވާއިރު، އެ މީހުންގެ ޒާތީ މައުލޫމާތު ހާމަ ކުރުމަކީ އެ މީހުންގެ ކަރާމާތައް އުނިކަން އަންނަ އަދި އަލުން މުޖުތަމައަށް އެ މީހުން ގެނައުމަށް ކުރާ މަސައްކަތަށް ހުރަސްއެޅޭނެ ކަމެއް ކަމަށް އެ މިނިސްޓްރީިއިން ބުންޏެވެ.
ހޯމް މިނިސްޓްރީއިން ބުނި ގޮތުގައި އެ މަސައްކަތުގައި ސަރުކާރުން އެންމެ ބޮޑު އިސްކަމެއް ދިނީ:
-
ދާހިލީ ސަލާމަތާއި ރައްކާތެރިކަން ކަށަވަރުކުރުމަށް
-
އަސާސީ އިންސާނީ ހައްގުތައް ކަށަވަރުކުރުމަށް
-
މުޖުތަމައުއިން ހަވާސާވެފައިވާ ފަރާތްތައް އިސްލާހުކޮށް ޒިންމާދާރު ރައްޔިތުންގެ ގޮތުގައި މުޖުތަމައުއަށް އަނބުރާ ވެއްދުމަށް
ހޯމް މިނިސްޓްރީގެ ބަޔާނުގައި ބުނީ ހަނގުރާމައަށް ދިޔަ ފިރިހެނުންނާއެކު ދަތުރުކުރި އެ މީހުންގެ އަނބިދަރިން، ހަނގުރާމައިގައި ހާލުގައި ޖެހޭ މީހުންގެ ކޭމްޕުތަކުގައި ތިބެ ފުރާނައަށް ނުރައްކާވާ ހިސާބަށް ދާ ކަމުގެ ޝަކުވާ އެ މީހުންގެ އާއިލާތަކުން ރައީސުލްޖުމްހޫރިއްޔާއަށް އަދި ސަރުކާރުގެ އިދާރާތަކަށް ކުރާ ކަމަށެވެ. އަދި އެފަދަ މައްސަލަތައް ހައްލު ކުރުމަކީ ރިޔާސީ ވައުދަކަށްވާއިރު، އެކަން ހައްލުކުރުމަށް މުހިންމު ގިނަ މަސައްކަތްތަކެއް ކޮށްފައިވާނެ ކަމަށް ބުނެފައިވެ އެވެ.
މީގެ ކުރިން، ހަނގުރާމަށް ދިޔަ މީހުން ރާއްޖެ އައިސް އެއްވެސް ޖިނާއީ ތަކުލީފެއް އުފުލުމެއް ނެތި އަދި އެއްވެސް ރިހެބިލިޓޭޝަނެއް ފުރިހަމަ ނުކޮށް މުޖުތަމައަށް ދޫވެފައިވާކަން ވެސް ހޯމް މިނިސްޓްރީއިން ފާހަގަ ކުރި އެވެ. އެކަން ހައްލު ކުރަން ސަރުކާރުން ކޮށްފައިވާ މަސައްކަތްތައް ވެސް ބަޔާނުގައި ފާހަގަ ކުރި އެވެ. އެއީ:
-
ވިކްޓިމައިޒްވާ އަންހެނުންނާއި ކުޑަކުދިންނަށް ބޭނުންވާ ދީނީ އަދި ނަފްސާނީ ފަރުވާ ދެވޭނެ ގޮތަށް ގާނޫނުތަކަށް އިސްލާހު ގެނައުން
-
އެކަމަށް ބޭނުންވާ މަރުކަޒުތަކާއި ވަސީލަތްތައް ގާއިމްކޮށް މީހުން ތަމްރީނުކޮށްފައިވޭ
ހަނގުރާމައިން އަންނަ މީހުންގެ ރިހެބިލިޓޭޝަން އާއި ރީއިންޓެގްރޭޝަންއާ ގުޅޭ ގަވާއިދު ގެޒެޓު ކުރީ ޖެނުއަރީ މަހުގެ ކުރީކޮޅު އެވެ. ސަރުކާރުން މިހާރު ވަނީ ހަނގުރާމަ އިން އަންނަ މީހުން ބައިތިއްބަން ކ. ހިންމަފުށީގައި އެކަމަށް ހާއްސަ މަރުކަޒެއް ވެސް އިމާރާތްކޮށްފަ އެވެ.
އެނގުން މުހިންމު - ސީރިއާ ފަދަ އަރަބި ބައެއް ގައުމުތަކުގައި ހިނގި ދާހިލީ ހަނގުރާމަތަކުގައި އައިސް ޖަމާއަތް ފަދަ ޖަމާއްތަކާ ގުޅިގެން ހަނގުރާމަ ކުރަން ގިނަ އަދަދެއްގެ ދިވެހިން އެކި ގައުމުތަކަށް ދިޔަ އެވެ. އޭގެ ތެރެއިން ބައެއް މީހުން ހަނގުރާމައިގައި މަރުވި އިރު، އެ މީހުންގެ އަނބިދަރިން ހާލުގައި ޖެހުނެވެ.