ސަރުކާރުން އިހުމާލުވާ ކަމަށް ބުނެ، އދ. ދިއްދޫ ސްކޫލަށް ކުދިން ފޮނުވުން ހުއްޓާލައިފި

ސަރުކާރުން އެ ރަށު ސްކޫލާ މެދު އިހުމާލްވާކަމަށް ބުނެ، ނުރުހުން ފާޅުކޮށް، އދ. ދިއްދޫ ސްކޫލަށް ދަރިވަރުން ފޮނުވުން ހުއްޓާލައިފި އެވެ. އަދި އަންނަ ހޯމަދުވަހު އެޑިޔުކޭޝަން މިނިސްޓަރު ޑރ. އައިޝަތު އަލީއާ ބައްދަލުކުރުމުގެ ފުރުސަތު މިހާރު ލިބިފައިވާ ކަމަށް، ރަށު ކައުންސިލުން ބުނެފި އެވެ.

ވީ ކިހިނެއް؟- ރާއްޖޭގެ އެންމެ އާބާދީ ކުޑަ އެއް ރަށް ކަމަށްވާ ދިއްދޫ ސްކޫލަށް ދަނީ ގާތްގަނޑަކަށް 18 ވަރަކަށް ކުދިންނެވެ. އެކަމަކު އެ ސްކޫލުގައި އެންމެ އަސާސީ ހިދުމަތްތައް ވެސް ލިބެން ނުހުންނަ ކަމަށް ބުނެ ކުދިން ސްކޫލަށް ފޮނުވުން ހުއްޓާލަން ބެލެނިވެރިން ވަނީ ނިންމާފަ އެވެ. އެހެންވެ މިދިޔަ އާދީއްތަދުވަހުން ފެށިގެން އެއްވެސް ދަރިވަރަކު ސްކޫލަކަށް ނުދެ އެވެ.

އެނގުން މުހިއްމު- މިހާރު އެ ރަށު ސްކޫލުގައި ކިޔަވައިދެމުން އަންނަނީ ދެ ގްރޭޑެއް އެއްކޮށްލައިގެން، މަލްޓިގްރޭޑް ސިސްޓަމަށެވެ. ދަރިވަރުން މަދުވުމުގެ ސަބަބުން ކިޔަވައިދެނީ ވެސް ގްރޭޑް 1-7 އަށެވެ.

ބުނީ ކީކޭ؟- ދިއްދޫ ސްކޫލްގެ ދަރިވަރެއްގެ ބެލެނިވެރިޔަކު މިރޭ 'ދައުރު'އާ ވާހަކަދައްކަމުން ބުނީ އެ ސްކޫލުން އެންމެ އަސާސީ ހިދުމަތްތައް ވެސް ލިބެން ނެތް ކަމަށެވެ. އެގޮތުން އޭނާ ފާހަގަކުރި މައްސަލަތަކަކީ:

"މިދިޔަ އަހަރުން ފެށިގެން ފާހާނައަށް ދާން ކުދިން ގެއަށް ފޮނުވަނީ. ކުޑަކުޑަ ކުދިން ގެއަށް އަންނަ އިރު މި ތިބެނީ ގަޔަށް ލެވިފައި، ނޫނީ ރޮވިފައި. އެހެންނޫނީ ކަރަންޓު ކެނޑިގެން ދާހިއްލާ ފޯވެފައި،" ބެލެނިވެރިޔާ ބުންޏެވެ.

ސްކޫލް މުވައްޒަފުންގެ މުސާރަ ފިޔަވައި ސްކޫލްގެ އެހެން ހުރިހާ ހަރަދެއް ކުރަނީ ބެލެނިވެރިންގެ ޖީބުންނެވެ.

"ލައިޓެއް ހަރުކުރަން ޖެހުނަސް ޕޭރެންޓުން. ތަނެއްގައި ކުލަ ލާން ޖެހުނަސް ޕޭރެންޓުން. މުސާރަ ދޭން ނުޖެހޭކަން އެކަނި،" އޭނާ ބުންޏެވެ.

އޭނާ ބުނިގޮތުގައި އެ ރަށު ސްކޫލުގެ މައްސަލަ އެތައް ފަހަރެއްގެ މަތިން އެޑިއުކޭޝަން މިނިސްޓްރީގެ ސަމާލުކަމަށް ވަނީ ގެނެސްފަ އެވެ. އެކަމަކު މިނިސްޓްރީގެ ފަރާތުން މާ ބޮޑު އެއްބާރުލުމެއް ނުލިބޭ ކަމަށް ބުންޏެވެ.

ސީދާ މިނިސްޓަރަށް މައްސަލަތައް ހުށައެޅުމުގެ ގޮތުން އެޑިއުކޭޝަން މިނިސްޓަރު ޑރ. އައިޝަތު އަލީއާ ބައްދަލުކުރަން އެދޭތީ ތިން އަހަރު ވެއްޖެ ކަމަށް ވެސް އޭނާ ބުންޏެވެ. 

 ބެލެނިވެރިން ބުނި ގޮތުގައި މިއީ ކުދިން ސްކޫލަށް ނުފޮނުވަން ނިންމި ފުރަތަމަ ފަހަރެއް ނޫނެވެ. މިއީ މި އަހަރު، އެ ފިޔަވަޅު އެޅި ދެ ވަނަ ފަހަރެވެ.  މިދިޔަ މެއި މަހު ކުދިން ސްކޫލަށް ފޮނުވުން ހުއްޓާލީ ޕްރިންސިޕަލާއި ޓީޗަރުން ނެތުމުގެ ކަންބޮޑުވުންތަކަށް މިނިސްޓްރީން އަޅާނުލުމުން ކަމަށް، ބެލެނިވެރިން ބުނެ އެވެ.

"އެފަހަރު ވެސް މައްސަލަ ހައްލުވީ ސްކޫލަށް ފޮނުވުން ހުއްޓާލީމަ. މި އަހަރު ވެސް މިހެން މައްސަލަ ޖައްސާތާ އެތައް ދުވަހެއް. ސްކޫލަށް މިހެން ނުފޮނުވީމަ އެޑިއުކޭޝަނަށް ޕްރެޝަރު ބޮޑުވީމަ ކޮންމެ ފަހަރަކު މައްސަލަ ހައްލުކޮށްދެނީ،" ބެލެނިވެރިޔަކު ބުންޏެވެ.

އެކަމަކު ރަށު ކައުސިލްގެ ނައިބު ރައީސް އަހުމަދު އާދަމް 'ދައުރު'އަށް މިރޭ ވިދާޅުވީ އަންނަ ހޯމަދުވަހު މިނިސްޓަރާ ބައްދަލުކުރުމުގެ ފުރުސަތު ލިބިފައިވާ ކަމަށެވެ.

ސްކޫލްގެ މައްސަލާގައި އަހުމަދު ވެސް ވިދާޅުވީ ބެލެނިވެރިން ފާހަގަކުރި ޝަކުވާތަކެވެ. 

އޭނާ ވިދާޅުވި ގޮތުގައި އެންމެ ފަހުން އެޑިއުކޭޝަން މިނިސްޓްރީގެ ޓީމެއް އެ ރަށަށް މިއަދު ޒިޔާރަތްކޮށް، ކައުންސިލާ ބައްދަލުކުރި އެވެ. އަދި ސްކޫލްގެ މައްސަލަތައް ހައްލުކޮށްދޭނެ ކަމުގެ ޔަގީންކަން ވެސް ދިން ކަމަށް ވިދާޅުވި އެވެ.

"މި ފެށޭ ހަފްތާފައި ފާހަގަކުރެވޭ މައްސަލަތަކަށް ހައްލެއް ހޯދަައިދެއްވާނެ ކަމަށް ވިދާޅުވީ،" އަހުމަދު ވިދާޅުވި އެވެ.

އެކަމަކު އޭނާ ވިދާޅުވީ މިނިސްޓްރީގެ ޓީމާ ބައްދަލުކުރަން ސްކޫލްގެ ބެލެނިވެރިން ދެކޮޅުހެދި ކަމަށެވެ. އެއީ މީގެ ކުރިން ވެސް އެ ރަށަށް ޒިޔާރާތްކުރި މިނިސްޓްރީގެ ޓީމާ ބައްދަލުކޮށް ކުރި މަޝްވަރާތަކުން ނަތީޖާއެއް ނުކުމެފައި ނުވާތީ ކަމަށް އަހުމަދު ވިދާޅުވި އެވެ. އެހެންވެ ބެލެނިވެރިން އެދުނީ، އޭނާ ވިދާޅުވި ގޮތުގައި، ސީދާ މިނިސްޓަރާ ބައްދަލުކުރާށެވެ. 

"އެންމެ ފަހުން އަންނަ ހޯމަދުވަހަށް މިނިސްޓަރާ ބައްދަލުކުރަން އެޕޮއިންޓްމެންޓް ހަމަޖެހިއްޖެ،" އަހުމަދު ވިދާޅުވި އެވެ.

މި މައްސަލައިގައި އެޑިއުކޭޝަން މިނިސްޓްރީގެ ބަހެއް އަދި ލިބިފައެއް ނުވެ އެވެ.