ރިލްވާންގެ މަރުގެ މައްސަލައިގައި މަރު ކޮމިޝަނުން މިއަދު ރިޕޯޓް ރައީސްއަށް ހުށަހެޅުމަށް ފަހު މުހިންމު ހޯދުންތައް ހާމަކުރަން ނޫސްވެރިންނާ ބައްދަލު ކުރަނީ (ފޮޓޯ/ރައީސް އޮފީސް)
ރިލްވާނަށް ހެދި ގޮތް އެކަމުގައި ބައިވެރިވި މީހަކު ޔާމީންއަށް ކިޔައިދިން: ކޮމިޝަން
މިނިވަން ނޫހުގެ ނޫސްވެރިޔާ އަހުމަދު ރިލްވާންގެ ގެއްލުވާލުމުގައި ބައިވެރިކަމަށް ތުހުމަތުކުރެވޭ ތ. އޮމަދޫ ނަރުގިސްވިލާ، މުހައްމަދު މުނާޒް(މުނާއްކޮ) ސީރިއާއަށް ފުރައިގެން ދިޔައީ، ރިލްވާނަށް ހެދި ގޮތް އޭރުގެ ރައީސް އަބްދުﷲ ޔާމީނަށް ކިޔާދިނުމަށް ފަހު ކަމަށް މަރު ކޮމިޝަނުން މިއަދު ބުނެފި އެވެ.
ވީ ކިހިނެއް؟ - އެގޮތަށް މަރު ކޮމިޝަނުން ބުނީ، އެ ކޮމިޝަނުން ތަހުގީގުކުރި މައްސަލަތަކުގެ ރިޕޯޓްގެ ރައީސް އިބްރާހިމް މުހައްމަދު ސޯލިހަށް އެރުވުމަށްފަހު ބޭއްވި ނޫސްވެރިންގެ ބައްދަލުވުމެއްގަ އެވެ.
ބުނީ ކީކޭ؟- މަރު ކޮމިޝަންގެ މެމްބަރު މިސްބާހު އައްބާސް ވިދާޅުވީ، ރިލްވާން މަރާލި މައްސަލައާ ގުޅިގެން ފުލުހުން ހިންގި ތަހުގީގަށް ހައްޔަރުކުރި ބައެއް މީހުން ބަންދުން ދޫކުރުމަށް އޭރުގެ ސަރުކާރުގެ ބައެއް އިސްވެރިން މަސައްކަތް ކުރައްވާފައިވާކަން އެނގިފައިވާ ކަމަށެވެ. އަދި އެ އަމަލު ހިންގުމުގައި އިސްކޮށް ހަރަކާތްތެރިވި ބައެއް ފަރާތްތަކާއި ސަރުކާރުގެ އެންމެ އިސްވެރިންނާއި ގާތް ގުޅުންތަކެއް އޮތް ކަން ކޮމިޝަނަށް ފާހަގަކުރެވިފައިވާ ކަމަށް ވެސް ވިދާޅުވި މިސްބާހު ވިދާޅުވި އެވެ.
އެގޮތުން، އެ މައްސަލައިގެ ތުހުމަތު ކުރެވޭ މުނާޒް ސީރިއާއަށް ފުރުމުގެ ކުރިން، ރައީސް ޔާމީނާއި ބައްދަލުކޮށް ރިލްވާނަށް ހެދި ގޮތް އެމަނިކުފާނަށް ކިޔާދިން ކަމަށް މުނާޒްއާ ވަރަށް ގާތް، އަދި ސީރިއާއަށް މީހުން ރެކްރޫޓްކުރުމުގައި އިސްކޮށް އުޅުނު މީހަކު ކޮމިޝަނަށް މައުލޫމާތު ދީފައިވާ ކަަމަށް މިސްބާހުު ވިދާޅުވި އެވެ. އަދި 2017 ގައި މުނާޒް ސީރިއާއަށް ފުރައިގެން ދިޔައީ، ޔާމީންގެ އެހީތެރިކަމާއި އެކު ކަން ވެސް ތަހުގީގަށް އެނގިފައިވާ ކަމަށެވެ.
"ސީރިއާއަށް ފުރުމުގެ ކުރިން އޭރުގެ ރައިސުލްޖުމްހޫރިއްޔާ އާ ބައްދަލުކޮށް، އޭނާގެ ބައިވެރިވުން ނުހިމެނޭ ގޮތަށް އަހުމަދު ރިލްވާން އަބްދުﷲ ގަދަކަމުން ކާރަކަށް ލައިގެން ގެންގޮސް މަރާލުމުގައި ބައިވެރިވި މީހުންނާއި އެކަން ކުރި ގޮތް ކިޔާދީފައިވާ ކަމަށް ކޮމިޝަނަށް މައުލޫމާތު ލިބިފައިވޭ. އަދި އޭނާ ސީރިއާއަށް ފުރައިގެން ގޮސްފައިވަނީ އޭރުގެ ރައިސުލްޖުމްހޫރިއްޔާގެ އެހީތެރިކަމާ އެކު ކަން ވެސް ތަހުގީގަށް އެނގިފައިވޭ." މިސްބާހު ވިދާޅުވި އެވެ.
މުނާޒް ވަނީ ސީރިއާގައި މަރުވެފަ ކަމަށް މައުލޫމާތު ލިބުނަސް އެއްވެސް ރަސްމީ އިދާރާއަކުން އެކަން ކަށަވަރުކޮށްދީފައިނުވާކަމަށް މަރު ކޮމިޝަނުން ވަނީ ބުނެފަ އެވެ.