ބޭރު ފައިސާއިން ލިބޭ އާމްދަނީއަށް ޑޮލަރުން ޓެކްސް ދައްކަންޖެހޭ ގޮތަށް ބަދަލުކޮށްފި

ބޭރު ފައިސާއިން ލިބޭ އާމްދަނީއަށް ޑޮލަރުން ޓެކްސް ދައްކަންޖެހޭ ގޮތަށް އާމްދަނީން ޓެކްސް ނެގުމުގެ ގަވާއިދަށް އިސްލާހު ގެނެސްފި އެވެ.

ވީ ކިހިނެއް؟ - ސަރުކާރުގެ ގެޒެޓުގައި މިއަދު ޝާއިރުކުރި އެ އިސްލާހުގައި ބުނާ ގޮތުގައި ވިޔަފާރިތަކުން ހިންގާ މުއާމަލާތްތަކުގައި މައިގަނޑު ގޮތެއްގައި ބޭނުންކުރާ ފައިސާއަކީ (ފަންކްޝަނަލް ކަރަންސީ)އަކީ ބޭރު ފައިސާއެއް ނަމަ، ޕްރެޒެންޓޭޝަން ކަރެންސީ ނުވަތަ ޓެކްސް ބަޔާންތަކާއި މާލީ ބަޔާންތަކާއި ލިޔެކިޔުންތަކުގައި މީރާއަށް ހުށަހަޅާ ކަރެންސީއަށް ވާނީ ޑޮލަރެވެ.

މި ބަދަލު ހިނގާނީ ޓެކްސް އަހަރު 2024އިން ފެށިގެންނެވެ.

މީގެ ކުރިން އެ ގަވާއިދު އޮންނަ ގޮތުން ފަންކްޝަނަލް ކަރެންސީއަކީ ޑޮލަރު ނަމަ ޕްރެޒެންޓޭޝަން ކަރެންސީއަކީ ވެސް ޑޮލަރެވެ. ނަމަވެސް ފަންކްޝަނަލް ކަރެންސީއަކީ ރުފިޔާ ނުވަތަ ޑޮލަރު ނޫން ނަމަ، ޕްރެޒެންޓޭޝަން ކަރެންސީގެ ގޮތުގައި ރުފިޔާ ނުވަތަ ޑޮލަރު ހިޔާރުކުރަން އޮންނަނީ ދޫކޮށްލާފަ އެވެ.

ތަފްސީލު - އެ އިސްލާހުގައި ބަޔާންކޮށްފައިވާ ގޮތުގައި:

މީގެ ކުރިން ވިތުހޯލްޑިން ޓެކްސް ބަޔާންތައް ތައްޔާރުކުރަން ޖެހެނީ ދިވެހި ރުފިޔާއިންނެވެ.

ގުޅުންހުރި ކަމެއް - ޑޮލަރުން އާމްދަނީ ލިބޭ ފަރާތްތަކުން ޑޮލަރުން ޓެކްސް ދައްކާ ގޮތަށް ބަދަލުކުރުމުން ދައުލަތުގެ އާމްދަނީއަށް އިތުރަށް 40-80 މިލިއަން ޑޮލަރު (617 މިލިއަން - 1.2 ބިލިއަން ރުފިޔާ)ގެ އަދަދެއް ދައުލަތަށް ލިބޭނެ ކަމަށް ލަފާކުރެއްވޭ ކަމަށް އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވަނީ ވިދާޅުވެފަ އެވެ.

އެނގުން މުހިންމު - ޑޮލަރުގެ އާމްދަނީ އިތުރުކޮށް އެ ބާވަތުގެ އާމްދަނީ ރާއްޖޭގައި ހިފަހައްޓަން ފިޔަވަޅުތަކެއް އަޅަން ނިންމިކަން ސަރުކާރުން އިއުލާންކުރީ ރުފިޔާ ކާޑުތަކުން ރާއްޖޭން ބޭރުގައި މުއާމަލާތް ނުކުރެވޭ ގޮތަށް ބީއެމްއެލްއިން މިދިޔަ މަހު ފިޔަވަޅު އެޅުމުން އެކަމާ ގުޅިގެން ސަރުކާރުން ނިންމި ނިންމުންތަކެއްގަ އެވެ.

އެ ނިންމުންތަކުގެ ތެރޭގައި އިންކަމް ޓެކުހުގެ އިތުރުން ޕެންޝަނާއި އިމްޕޯޓް ޑިއުޓީ ޑޮލަރުން ދައްކާ ގޮތަށް ބަދަލުކުރުން ވެސް ހިމެނެ އެވެ.