ފޮޓޯ ސްޓޯރީ: މި ފަހަރު، ފަރިވެ ފޮޅިލާފައިވާ މަކުނުދޫގެ ރީތި ބޯގަންވިލާ ގަސްތައް
މި ފަހަރު ހދ. މަކުނުދުއާ ގުޅޭ މާ އާދަޔާހިލާފު ވާހަކައެއް ނޫނެވެ؛ އެކަމަކު އެ ރަށު މީހުން ބަގީޗާ ހެއްދުމާއި ހާއްސަކޮށް ބޯގަންވިލާއަށް އޮތް ލޯބި ދައްކައިދޭ ރީތި ފޮޓޯތަކެކެވެ.
ކުލަކުލައިގެ ބޯގަންވިލާ ގަސް މަކުނުދުއަށް ތައާރަފްވީ ވަރަށް ފަހުންނެވެ. މި ރަށުގެ ގިނަ ގެތަކުގެ ގޯތިތެރެއިން ވެސް މި ރީތިކަން މިހާރު ވަނީ ފެންނަން ފަށައިފި އެވެ.
މިހާރު ބޯގަންވިލާ ގަސްތައް މިރަށުގައި އަންނަނީ އާދަޔާހިލާފަށް ގިނަވަމުންނެވެ. ރަށުގެ ބައެއް ހިސާބުތަކުގައި ކޮންމެ ގެއެއްގައި ވެސް ބޯގަންވިލާ ގަހެއް ހުރެ އެވެ. އެހެން ހިސާބުތަކުގައި ވެސް މީހުން އަންނަނީ ގޯތިތެރޭގައި ބޯގަންވިލާ އިންދައި، ރޯކުރަމުންނެވެ.
މި ރަށުގައި މިހާރު ހުރިހާ ކުލައެއްގެ ވެސް ބޯގަންވިލާ ހުރެ އެވެ. އެންމެ ކުރިއްސުރެ ފެންނަ ގަދަ ފިޔާތޮށީގެ އިތުރުން، މަޑު ފިޔާތޮއްޓާއި ހުދާއި އޮރެންޖާއި ޕީޗުގެ އިތުރުން ރީނދޫ ކުލައިގެ މާ އަޅާ ގަސް ވެސް ހުރެ އެވެ.
މަކުނުދޫގެ ބައެއް ހިސާބުތަކުގެ މަގުމަތިން ހިނގާލާފައި ދާއިރު ފެންނާނީ، ގޭގެ ވަށާފާރު މަތިން ބޭރަށް ނުކުމެ އޮންނަ ބޯގަންވިލާ މާކޯޅިތަކެވެ. އެކި ކުލަކުލައިގެ މާތައް އެހެން ފެންނައިރު ވަރަށް ހިތްގައިމެވެ.
މިއީ މި ރަށުގެ މީހުން ވަރަށް ލޯބިން، ވަރަށް ޝައުގުވެރިކަމާ އެކު މިހާރު ކުރަމުން އަންނަ ކަމެކެވެ. ރީތިކޮށް ހެދިފައި ހުރި ގަހަކުން، ގޮފި ކަނޑައި ދެން ތިބި މީހުންނަށް ދީގެން އެކުގައި ކުރަމުން އަންނަ ބަގީޗާ ހެއްދުމެކެވެ.
