ރާއްޖޭގެ ފަތުރުވެރިކަމުގެ ބާނީން (ކ-ވ): އުމަރު މަނިކު، ކޯބިން، ހުސައިން އަފީފް އަދި އަހްމަދު ނަސީމް
ޓޫރިޒަމްގެ ރަން ޔޫބީލް ސްޓޭމްޕް ސެޓް ނެރެން ކޯބިން ރާއްޖެ ވަޑައިގަންނަވަނީ
ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމުގެ ގޮތުން އަންނަ މަހު 16 ގައި ނެރޭ ހާއްސަ ސްޓޭމްޕް ސެޓް ނެރެދެއްވުމުގެ ޝަރަފްވެރި މަހެމާނެއްގެ ގޮތުން ޖޯޖް ކޯބިން، ރާއްޖެ ވަޑައިގަންނަވާ ގޮތަށް ހަމަޖައްސައިފި އެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމް 'ދައުރު'އާ ވާހަކަ ދައްކަވަމުން މިއަދު ވިދާޅުވީ ސަރުކާރުގެ ދައުވަތަކަށް ކޯބިން ވަޑައިގަންނަވާ އިރު، ސްޓޭމްޕް ސެޓް ނެރުމުގެ އިތުރުން ވެސް ޓޫރިޒަމާ ގުޅުން ހުރި ބައެއް ހަފުލާތަކުގައި އޭނާ ބައިވެރިވެވަޑައިގަންނަވާނެ ކަމަށެވެ.
ސަރުކާރުން މިހާރު ކަނޑައަޅާފައި ވަނީ ރާއްޖެއަށް ޓޫރިސްޓުންގެ ފުރަތަމަ ގްރޫޕް، ކޯބިންގެ ބެއްލެވުމުގެ ދަށުން ޒިޔާރަތްކުރީ 16 ފެބްރުއަރީ 1972 ގައި ކަމަށެވެ. ސްޓޭމްޕް ސެޓް ނެރުން އޮތީ ވެސް އެ ދުވަހު އެވެ. ކޯބިން ރާއްޖެ ވަޑައިގަންނަވާނީ 15 ފެބްރުއަރީގަ އެވެ. އޭނާ ވަނީ އެކަން އޭނާގެ ފޭސްބުކްގައި ވެސް ލިއުއްވައިފަ އެވެ.
ޑރ. މައުސޫމް ވިދާޅުވި ގޮތުގައި ކޯބިންގެ އިތުރުން ޓޫރިޒަމްގެ ބާނީން ކަމަށް ވާ ދިވެހި ވިޔަފާރިވެރިން ވެސް، 16 ފެބްރުއަރީން ފެށިގެން ބާއްވާ އެކި ހަފުލާތަކުގައި، އެ ބޭފުޅުންގެ ތަޖުރިބާ ހިއްސާކުރައްވާނެ އެވެ.
މިހާރު އޮތް ގޮތުން ގައުމީ ޔުނިވަސިޓީގައި، ރާއްޖޭގެ ޓޫރިޒަމްއާ ގުޅޭ ގޮތުން ކޯބިން ވާހަކަ ދައްކަވާނެ އެވެ. އޭގެ އިތުރުން އައްޑުއަށް ވަޑައިގެން، އެތަނުގެ ޒުވާނުންނާ ވެސް ކޯބިން، އޭނާގެ ތަޖުރިބާ ކިޔައިދެއްވާނެ އެވެ.
"މި ހުރިހާ އިވެންޓެއް ބޭއްވޭނީ ކޮވިޑްގެ ހާލަތަށް ބަލާފައި، އެޗުޕީއޭއިން އަންގާ ގޮތަކަށް،" މި ވަގުތު ރާއްޖޭގެ އުތުރަށް ކުރައްވާ ދަތުރެއްގައި ހަނިމާދޫގައި ހުންނެވި މިނިސްޓަރު ވިދާޅުވި އެވެ.
"އޮންލައިންކޮށްނާއި ދައުވަތު ދެވޭ ވަކި އަދަދެއްގެ ބަޔަކު ބައިވެރިވާ ކަހަލަ ގޮތަކަށް، އިވެންޓްތައް ކުރިއަށް ދާނީ."
ޑރ. މައުސޫމް ވިދާޅުވި ގޮތުގައި މިހާރު އެމެރިކާގެ މިއާމީގައި ދިރިއުޅުއްވާ ކޯބިން ކުރައްވާ ދަތުރު ސްޕޮންސަކުރީ އެކި ފަރާތްތަކުންނެވެ. އޭގެ ތެރޭގައި ޓާކިޝް އެއާލައިން އާއި ކުރުނބާ މޯލްޑިވްސް އާއި ކުޑަ ވިލިނގިލި އާއި މާގިރި އަދި އައްޑޫގައި ހިންގާ ސައުތު ޕާމް ހިމެނެ އެވެ.
"އެކި ފަރާތްތަކުގެ އެއްބާރުލުން ލިބިގެން ކޯބިން އަޅުގަނޑުމެންގެ ދައުވަތަކަށް ވަޑައިގަންނަވަނީ،" ޑރ. މައުސޫމް ވިދާޅުވި އެވެ.
ކޯބިން އާއި ދިވެހި ތިން ބޭފުޅެއްގެ އިސްނެންގެވުން
ރާއްޖެއަށް ޓޫރިޒަމް ތައާރަފުކުރެއްވުމުގައި ކޯބިންއާ ބައިވެރިވެވަޑައިގަތީ މިއަދު ރާއްޖޭގެ ޓޫރިޒަމްގެ ދިވެހި ބޮޑެތި އިންވެސްޓަރުންގެ ތެރޭގައި ހިމެނިވަޑައިގަންނަވާ މުހައްމަދު އުމަރު މަނިކު (އެމްޔޫ މަނިކު) އާއި ޗަމްޕާ ހުސެއިން އަފީފުގެ އިތުރުން މިހާރުގެ ހެލްތު މިނިސްޓަރު އަހުމަދު ނަސީމެވެ.
ރާއްޖެއާ މެދު ޝައުގުވެރިކަން ބޮޑުވެ ރާއްޖެއަށް ދެވޭނެ ގޮތެއް ހޯއްދަވަން، ސިލޯނުގައި އޭރު ހުރި ދިވެހި ހައި ކޮމިޝަނަށް ކޯބިން 1971ގެ ފަހުކޮޅު ވަޑައިގަތުމުން ބައްދަލުކުރެއްވީ ނަސީމެވެ. އޭރު ނަސީމަކީ ރާއްޖޭގެ ފޮރިން ދާއިރާގައި އިސް ޒިންމާތަކެއް ނަންގަވަމުން ގެންދެވި ވަރަށް ޒުވާން ބޭފުޅެކެވެ.
ކޯބިން ގޮވައިގެން ކަނޑު ބޯޓެއްގައި ނަސީމު ރާއްޖެ ވަޑައިގަތެވެ. އަދި ފެބްރުއަރީމަހު އިޓަލީން ގެންނަ ފުރަތަމަ ގްރޫޕްގެ ކަންކަމުގައި މަޝްވަރާކުރެއްވީ ކޯބިން 1971 ގެ ފަހުކޮޅު މާލެއަށް ކުރެއްވި ދަތުރުގަ އެވެ.
ކުރީގެ ގައުމީ މަރުކަޒުން އެކުލަވާލި ތާރީހީ ފޮތުގައި ބުނާ ގޮތުން ރާއްޖެއަށް ފުރަތަމަ ޓޫރިސްޓް ގްރޫޕް އައީ 22 ފެބްރުއަރީ 1972 ގަ އެވެ. އެކަމަކު އޭރު އިނގިރޭސި ބަހުން ނެރުނު ނޫހެއްގައި، ކޯބިންގެ އިންޓަވިއުއެއްގެ މައްޗަށް ބިނާކޮށް، އޮތީ 16 ފެބްރުއަރީ 1972 ކަމަށެވެ. އެހެންކަމުން ސަރުކާރުން ވެސް މިހާރު ގަބޫލުކުރަނީ އިޓަލީގެ ނޫސްވެރިންނާއި ފޮޓޯގްރާފަރުންގެ މައްޗަށް ބިނާވި 22 ވަރަކަށް މީހުން ހިމެނޭ ގްރޫޕް ރާއްޖެ އައީ 16 ފެބްރުއަރީ 1972 ކަމެވެ.