100 ކިލޯ ޑްރަގުގެ މައްސަލައިގައި 9 މީހަކަށް ދައުވާކޮށްފި

އދ. ބޮޑުކާށިހުރާ ކިޔާ ފަޅުރަށެއްގައި ފޮރުވާފައި ހުއްޓާ ފުލުހުން ހޯދި 100 ކިލޯގެ ޑްރަގުގެ މައްސަލައިގައި ނުވަ މީހެއްގެ މައްޗަށް ދައުވާ އުފުލައިފި އެވެ.

މައްސަލައިގެ ފެށުން - ރާއްޖެއަށް ކަނޑުމަގުން މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ އޮކްޓޯބަރު 13ގައި ހިންގި އެ އޮޕަރޭޝަންގައި ފުރަތަމަ 10 މީހުން ހައްޔަރުކުރި އެވެ. 

އޭގެ ތެރެއިން ފުލުހުން ވަނަވަރު އާންމު ކުރީ އަށް މީހެއްގެ އެވެ. އަދި ފަހަރަކު މީހަކު ކޯޓުން ދޫކުރަމުން ގޮސް، މިހާރު ބަންދުގައި ތިބީ ދެ ބިދޭސީން އެކަންޏެވެ.

ތަފްސީލް - ޕްރޮސެކިއުޓަ ޖެނެރަލް (ޕީޖީ)ގެ އޮފީހުގެ ޕަބްލިކް ޕްރޮސެކިއުޓާ އަދި ތަރުޖަމާނު އަހްމަދު ޝަފީއު ވިދާޅުވީ އެ މައްސަލައިގައި ނުވަ މީހެއްގެ މައްޗަށް ދައުވާކުރަން އިއްޔެ ކްރިމިނަލް ކޯޓަށް ހުށަހަޅާފައިވާ ކަމަށެވެ.

ދައުވާކުރި މީހުންނާއި އެ މީހުންގެ މައްޗަށް އުފުލި ދައުވާތަކުގެ ތަފްސީލް:

1. ޖުމާން މުސްއަފާ (19އ): ނ. ވެލިދޫ، ބީޗްހެވެން 

2. އިބްރާހީމް ޒާއިދު ހަބީބު (25އ): ގއ. ކޮލަމާފުށި، ސޯސަންގެ

 3. މުހައްމަދު އަހްމަދު (34އ): ލ. ކަލައިދޫ، ޖަނަވަރީމާގެ

4. އިބްރާހީމް ސިނާނު (24އ): ހދ. ކުމުންދޫ، ޑިއާފުރެންޑް

5. މުހައްމަދު ހުސައިން (61އ): ދ. ބަނޑިދޫ، ޕޮލަރިސް

6. އެމްޑީ ރަފީގުލް އިސްލާމް (35އ): ބަންގްލަދޭޝް

7. ޑީއެމް މޮބިން (24އ): ބަންގްލަދޭޝް

8. މިދުހަތު އިބްރާހިމް (26އ): ގއ. ދެއްވަދޫ، ދޭލިޔާގެ 

9. އަހްމަދު ސިރުހާން ޝަމީމް: މ. ކޮޅުފުށި، ޒަހީރާމަންޒިލް

އެ މީހުން ހައްޔަރުކުރި އޮޕަރޭޝަންގައި ރާއްޖޭގެ ބައެއް ފަޅުރަށްރަށާއި ހުޅުމާލެ އާއި މާލެ އާއި މާލޭގެ ބައެއް ގޭގޭގެ އިތުރުން ސަފާރީއަކާއި ލޯންޗެއް ފުލުހުން ބަލައި ފާސްކުރި އެވެ. އެގޮތުން، 100 ކިލޯއަށް ވުރެ ގިނަ މަސްތުވާތަކެތި ހޯދާފައިވަނީ ބޮޑުކާށިހުރާގައި ފޮރުވާފައި ހުއްޓަ އެވެ

އެނގުން މުހިންމު - އެ މައްސަލައިގައި ހިމެނޭ ދިވެހިން ކޯޓުން ދޫކޮށްލީ، ތަހުގީގު މަރުހަލާ ނިމުނު އިރު ވެސް ފެނުނު މަސްތުވާތަކެއްޗާއި އެ މީހުންނާ ގުޅުވޭނެ ހެކިތަކެއް ފުލުހުން ދައްކާފައި ނުވާ ކަމަށް ބުނެ އެވެ. މި މައްސަލައިގެ ތަހުގީގު ފުރިހަމަކުރަން ޕީޖީން ވަނީ ފުލުހުންނަށް އިތުރު މުއްދަތު ވެސް ދީފަ އެވެ.

އިތުރަށް ކިޔާލަން -