ހައްޔަރުކުރި މީހުންނަށް ފުލުހުން އަނިޔާކުރިތޯ ބަލަން ކޯޓުން އެޗްއާރްސީއެމްއަށް އަންގައިފި

މި މަހުގެ 15ގައި ފަޅު ރަށަކުން 215 ކިލޯގެ މަސްތުވާތަކެތި އަތުލައިގެން މައްސަލައިގައި ހައްޔަރުކޮށްފައި ތިބި ދެ މީހުންނަށް ފުލުހުން އަނިޔާކުރި ކަމަށް އެ މީހުން ކޯޓުގައި ބުނުމުން، އެ މައްސަލަ ތަހުގީގުކުރަން އެޗްއާރްސީއެމްއަށް ކްރިމިނަލް ކޯޓުން އިއްޔެ އަންގައިފި އެވެ.

ވީ ކިހިނެއް؟ - އެ މައްސަލައިގައި ރ. މަޑުއްވަރީ ފަޅު ތެރެއިން ލޯންޗަކުން ފުލުހުން ހައްޔަރުކުރީ:

އެ ދެ މީހުންގެ ބަންދާ މެދު ގޮތް ނިންމަން އިއްޔެ ބޭއްވި އަޑުއެހުމުގައި، ބަންދަށް އިތުރު 15 ދުވަސް ކޯޓުން ވަނީ ދީފަ އެވެ.

އޮޕަރޭޝަންގެ ތަފްސީލް - އެ ދެ މީހުން ފުލުހުން ހައްޔަރުކުރީ "ފެށުން 2" ކިޔާ ލޯންޗެއްގައި މަޑުއްވަރިއަށް ވަތް ވަގުތު އެ ލޯންޗު ހުއްޓުވައި ބަލައި ފާސްކުރުމަށް ފަހު އެވެ. ބަލައި ފާސްކުރުމުގެ ތެރޭގައި ފުލުހުންނަށް ފެނުނު ތަކެތީގެ ތެރޭގައި:

އޭގެ އިތުރުން، އިންޓެލިޖެންސް މައުލޫމާތަށް ބަލައި ފުލުހުން ވަނީ އެ ސަރަހައްދުގެ ފަޅުރަށްތައް ބަލައި ފާސްކޮށްފަ އެވެ. އެ އޮޕަރޭޝަންގައި ރ. ބޮޑުފަރު ފިނޮޅުން ޕެޓްރޯލް ހުސްކުރި 20 ލީޓަރުގެ 63 ހަން ފެނިގެން، ހައްޔަރުކޮށްފައި ތިބި ދެ މީހުންނާ ފުލުހުން ސުވާލުކުރި އެވެ.

އެ މީހުން ބުނި ކަމަށް ފުލުހުން ބުނެފައިވަނީ، އެއީ އެ މީހުން މަސްތުވާތަކެތި ބަލާ ދާން ޓެސްޓު ދަތުރެއް ކުރަން ބޭނުންކުރި ޕެޓްރޯލް ހަންތަކެއް ކަމަށެވެ. އަދި އެ މީހުން އެތެރެކުރި މަސްތުވާތަކެތި ރ. ރާނބުގަލީގައި ހުންނާނެ ކަމަށް ބުނެ އެ ތަކެތި ދެއްކި ކަމަށް ފުލުހުން ބުނެފައިވެ އެވެ.

އެ މީހުން ދިން މައުލޫމާތަށް ބަލައި އެ ރަށް ފާސްކުރަމުން ދަނިކޮށް، އެ މީހުން ބުނި ކަށިކެޔޮގަހުގެ ތެރެއިން ފެނުނު 11 ގޯނީގައި ހުރި 215 ކިލޯ މަސްތުވާތެކެތި ފުލުހުން އަތުލައިގަތެވެ.

ފުލުހުން ބުނީ އެ މީހުންގެ އަތުން ހޯދި ސެޓެލައިޓް ފޯނުގެ އެކްސްޓްރެކްޝަން ރިޕޯޓަށް ބެލުމުން، އެ މީހުން ރާއްޖެ ސަރަހައްދުން ބޭރަށް ދިޔަ ކަމުގެ މެސެޖުތަކާ އަދި އެހެން ބޯޓަކާ ބައްދަލުކުރިކަމުގެ މެސެޖުތަކެއް ފެނުނު ކަމަށެވެ.

ދެ މީހުންގެ ދިފާއު - ބަންދާ މެދު ގޮތެއް ނިންމަން އިއްޔެ ކޯޓަށް ހާޒިރުކުރުމުން އެ މީހުންގެ ފަރާތުން ބުނީ، ފުލުހުން އެ މީހުންނަށް ވަރަށް ބޮޑަށް އަނިޔާކޮށްފައިވާ ކަމަށާއި އެހެންކަމުން އެކަން ތަހުގީގުކޮށްދިނުމުގެ އަމުރަކަށް އެދޭ ކަމަށެވެ. ދިފާއީ ވަކީލުން ވިދާޅުވީ ތަހުގީގަށް ބަންދުކޮށްފައި ތިއްބައި ފުލުހުން އެ ދެ މީހުން އެކި ރަށްރަށަށް ގެންގޮސްފައިވާ ކަމަށާއި އެއީ ގާނޫނީ ގޮތުން ކުރެވޭނެ ކަމެއް ނޫން ކަމަށެވެ.

ކޯޓުގައި ވާހަކަ ދައްކަމުން އަލީ ޝާކިރު ބުނީ، ފަޅު ރަށަކަށް ގެންގޮސް ފުލުހުން އޭނާއަށް ވަރަށް ބޮޑަށް އަނިޔާކުރި ކަމަށެވެ. އެގޮތުން އޭނާ ބުނީ:

ދިފާއީ ވަކީލު ވިދާޅުވީ ފުލުހުން އަނިޔާކުރަނީ ވަރަށް "ސްމާޓްކޮށް"، ބޭރުފުށުން އެއްވެސް އަނިޔާއެއް ފެންނަން ނުހުންނާނެ ގޮތަށް ކަމަށެވެ. އަލީ ޝާކިރުގެ އިތުރުން ނިމާލް އަބްދުލްހާރިސް ވެސް ރަށަކަށް ގެންގޮސް ފުލުހުން އަނިޔާކުރި ކަމަށް ބުންޏެވެ.

ފުލުހުންގެ ބަސް - ފުލުހުން ވަނީ އެ މީހުންނަށް އަނިޔާކުރި ކަމަށް އިންކާރުކޮށްފަ އެވެ. ފުލުހުން ބުނީ އަނިޔާގެ އެއްވެސް ނިޝާނެއް ބޭރުފުށުން ފެންނަން ނެތް އިރު، މެޑިކަލް ރިޕޯޓުތަކުން ވެސް އަނިޔާއެއް ފެންނަން ނެތް ކަމަށެވެ.

ތަހުގީގުގެ މުއްދަތުގައި، ތުހުމަތުކުރެވޭ މީހުން އެކި ތަންތަންނަށް ގެންދިއުމަކީ ފުލުހުން އާންމުކޮށް ކުރާ ކަމެއް ކަމަށް ވެސް މައްސަލައިގެ އިންވެސްޓިގޭޓިވް އޮފިސަރު ކޯޓުގައި ބުންޏެވެ.

ކޯޓުގެ އެންގުން - ދެ ފަރާތުގެ ވާހަކަތައް އަޑުއެއްސެވުމަށް ފަހު ކޯޓުގެ ގާޒީ އާދަމް މުހައްމަދު ވަނީ އެ މީހުން ޑޮކްޓަރަށް ދައްކައި އެކަށީގެންވާ ސިއްހީ ފަރުވާ ފޯރުކޮށްދިނުމަށް ފުލުހުންނަށް އަމުރުކޮށްފަ އެވެ. އަދި ފަރުވާގެ ލިޔުންތައް ދެން އޮންނަ ބަންދު މަޖިލީހަކަށް ހުށަހަޅަން ވެސް ގާޒީ އެންގެވި އެވެ.

ހަމަ އެއާ އެކު، އަލީ ޝާކިރަށް ފުލުހުން ބޮޑެތި އަނިޔާތަކެއް ކޮށްފައިވާ ކަމަށް ބުނާތީ، އެކަން އެޗްއާރްސީއެމްގެ ސަމާލުކަމަށް ގެނެސް، އެކަން ހިނގާދިޔަ ގޮތް ބަލައި ކޯޓަށް ހިއްސާކުރަން ވެސް އެންގި އެވެ.

އެޗްއާރްސީއެމްގެ ބަސް - އެ ކޮމިޝަންގެ ސެކްރެޓަރީ ޖެނެރަލް މުހައްމަދު ޔާމީން އިބްރާހީމް މިއަދު 'ދައުރު'އަށް ވިދާޅުވީ އެ މައްސަލަ ބަލާނެ ކަމަށާއި ހައްޔަރުކުރި މީހުންނާ މެދު ފުލުހުން އަމަލުކުރަމުން އަންނަ ގޮތް ހިއްސާކުރާނެ ކަމަށެވެ.

އިތުރަށް ކިޔާލަން -