މަޖިލީހުގެ ޖަލްސާއެއްގައި ނައިފަރު ދާއިރާގެ މެންބަރު އަހްމަދު ޝިޔާމް ވާހަކަދައްކަވަނީ. (ފޮޓޯ/މަޖިލިސް)
އަބްދުﷲ ރަޝީދު މަރުވެފައިވަނީ ފުލުހުންގެ އިހުމާލުން ކަމަށް ބުނެ ހުށަހެޅި މައްސަލަ ބޭރުކޮށްލައިފި
ފުލުހުންގެ ބެލުމުގެ ދަށުގައި ހުއްޓާ އިއްޔެ ގދ. އަތޮޅުގައި މަރުވި މީހާ މަރުވެފައިވަނީ އެ އިދާރާގެ އިހުމާލުން ކަމަށް ބުނެ، އެކަމުގެ ހަގީގަތް ދެނެގަތުމަށް އިންސާފުވެރި ތަހުގީގެއް ހިންގުމަށް ގޮވާލައި އިދިކޮޅުން ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފި އެވެ.
މައްސަލައިގެ ފެށުން - ފުލުހުން އިއްޔެ ހިންގި އޮޕަރޭޝަނެއްގައި ގދ. ހޯޑެއްދޫން ހައްޔަރުކޮށްގެން ގެންދިޔަ އެ ރަަށަށް ނިސްބަތްވާ އަބްދުﷲ ރަޝީދު، 43، އިއްޔެ މެންދުރުގެ ވަގުތެއްގައި ވަނީ މަރުވެފަ އެވެ. ފުލުހުން ބުނި ގޮތުގައި، އޭނާގެ މެއަށް ތަދެއް އަރައި ފިޓު ޖެހުމުގެ އަލާމާތްތަކެއް ފެނުމުން ގދ. މަޑަވެލީ ހެލްތު ސެންޓަރަށް ގެންދިޔަ އިރު ވެސް ވަނީ މަރުވަފަ އެވެ.
ވީ ކިހިނެއް؟ - ހޯޑެއްދޫ ޕީޕީއެމްގެ ސްޓިއަރިން ކޮމިޓީގެ ރައިސްކަން ވެސް ކުރައްވަމުން ގެންދެވި އަބްދުﷲ ރަޝީދުގެ މި ކުއްލި މަރާ ގުޅޭ ގޮތުން، މަޖިލީހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުއްވީ، އެ ޕާޓީގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް އެވެ.
ތަފްސީލު - ޝިޔާމް ހުށަހެޅުއްވި ކުއްލި މައްސަލައަށް ބަހުސް ނުކޮށް، އެ މައްސަލަ ބޭރުކޮށްލާފައި ވަނީ، 26 މެންބަރުންގެ ވޯޓުންނެވެ. މައްސަލަ ބަލައިގަތުމަށް ވޯޓު ދެއްވީ 17 މެންބަރުންނެވެ. އޭގެ ތެރޭގައި އެމްޑީޕީއަށް ނިސްބަވްތާ މެންބަރުން ވެސް ހިމެނެ އެވެ.
ކުއްލި މައްސަލައިގައި ޝިޔާމް ފާހަގަކުރެއްވި ކަންތައްތައް:
-
ހޯޑެއްދޫން އަބްދުﷲ ރަޝީދު ހައްޔަރުކޮށްގެން ލޯންޗަށް އެރުވި ވަގުތު ވެސް މެއަށް ތަދުވާ ވާހަކަ އޭނާ ފުލުހުން ގާތުގައި ބުނި ކަމަށް މަންޒަރު ދުށް މީހުން ބުނެފައިވޭ؛ ޑޮކްޓަރަށް ދެއްކުމަށް އޭނާ އާދޭސް ކުރި ކަމަށްވޭ
-
އޭގެ ފަހުން އޭނާ ލޯންޗުގެ ތެރެއަށް ވެއްޓި، އޭނާ އޮތް ހާލަތު ދާއިރާގެ ޒިންމާދާރު ފަރާތަކަށް ފެނި، އޭނާ ހޮސްޕިޓަލަށް ގެންދަން އެދިފައިވޭ
-
މަޑަވެލީ ސިއްހީ މަރުކަޒަށް އޭނާ ގެންގޮސްފައިވަނީ އޭގެ އެތައް އިރެއް ފަހުން
"އަބްދުﷲ ރަޝީދު ނިޔާވުމުގައި ފުލުހުންގެ އިހުމާލު ވަރަށް ބޮޑަށް އޮތް ކަމަށް ފެންނާތީ އާއި އަދި ޑޮކްޓަަރަށް ގެންދިއުމަށް އެދި އާދޭސް ކުރަމުން ދަނިކޮށް މިފަދަ ގޮތަކަށް އެއްވެސް އިންސާނަކާ މެދު އަމަލުކުރުމަކީ އިންސާނިއްޔަތު މިންގަނޑުން ވެސް ކޮށްގެން ވާނެ ކަމަކަށް ނުވާތީ އަދި އެކި އެކި މަސްދަރުތަކުން ފުލުހުން އޭނާއާ ދޭތެރޭގައި އިހާނެތިކޮށް އަމަލުކޮށްފައިވާކަން އެނގޭތީ" ކުއްލި މައްސަލަ ހުށަހެޅުއްވީ ކަމަށް ޝިޔާމް ވިދާޅުވެފައިވެ އެވެ.
ޝިޔާމް ސަރުކާރަށް ގޮވާލެއްވީ:
-
މިކަމުގައި ކަން ހިނގާފައިވާ ގޮތުގެ ހަގީގަތް ދެނެގަތުމަށް ފުލުހުންގެ ބޮޑީކެމް ފޫޓޭޖް ބަލައި ހާމަކުުރުމަށް
-
މި މައްސަލަ މިނިވަންކަމާއި އިންސާފުވެރިކަމާ އެކު އަވަސް ތަހުގީގެއް ހިންގުމަށް
އެންގުން މުހިންމު - ފުލުހުން އިއްޔެ ބުނީ، މަރުގެ ސަބަބުތައް ދެނެގަތުމަށް އޯޓޯޕްސީ ހެދުމަށް ނިންމާފައިވާ ކަމަށެވެ. އަދި އެ މައްސަލަ ނެޝަނަލް އިންޓަގްރިޓީ ކޮމިޝަނާއި ހިއުމަން ރައިޓްސް ކޮމިޝަނުގެ ސަމާކުކަމަށް ގެނެސް، ތަހުގީގުކުރަން އެދިފައިވާނެ ކަމަށް ވެސް ފުލުހުން ބުންޏެވެ.