ހަނގުރާމައަށް ދިޔަ އާއިލާ ރީއިންޓެގްރޭޝަން ސެންޓަރަށް ގެންގޮސްފި

ރާއްޖެއިން ބޭރަށް ހަނގުރާމައަށް ދިޔަ އާއިލާތަކުގެ ތެރެއިން އަނބުރާ ރާއްޖެ ގެނައި ފުރަތަމަ އާއިލާ މިއަދު ކ. ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރުގައި "އިދާރީގޮތުން" ބަންދުކޮށްފި އެވެ.

ވީ ކިހިނެއް؟ - ރާއްޖެއިން ބޭރަށް ހަނގުރާމައަށް ދިޔަ އާއިލާއެއް ހާލުގައި ޖެހި ފުރާނައަށް ނުރައްކާވާ ހިސާބަށް ގޮސްފައިވާތީ، އެ އާއިލާގެ އަންހެނަކާއި އެ އަންހެން މީހާގެ 18 އަހަރު ނުފުރޭ ހަތަރު ދަރިން މިއަދު ވަނީ ރާއްޖެ ގެނެސްފަ އެވެ. މިއީ އެގޮތަށް އަނބުރާ ރާއްޖެ ގެނައި ފުރަތަމަ އާއިލާ އެވެ.

ތަފްސީލް - އެކަމާ ގުޅިގެން ނެރުނު ބަޔާނެއްގައި ފުލުހުން ބުނީ، ޓެރަރިޒަމްގެ ގާނޫނުގައިވާ ގޮތުން އަމަލު ކުރުމުގެ ގޮތުން އެ އަންހެން މީހާ އާއި އޭނާގެ ދަރިން ރީއިންޓެގްރޭޝަން ސެންޓަރުގައި އިދާރީ ބަންދެއްގައި ބައިތިއްބާފައިވާ ކަމަށެވެ.

އެނގުން މުހިންމު - ހަނގުރާމައިން އަންނަ މީހުން އަލުން މުޖުތަމައަށް ނެރެން ރިހެބިލިޓޭޓު ކުރާނީ ނޭޝަނަލް ރީއިންޓެގްރޭޝަން ސެންޓަރުގަ އެވެ. އެތަނުގައި އެ މީހުންނަށް ހާއްސަކޮށް ޕްރޮގްރާމުތަކެއް ހިންގާނެ އެވެ. އެ މީހުންނާ މެދު އަމަލު ކުރާނެ ގޮތުގެ ގަވައިދެއް ވެސް މިދިޔަ ޖެނުއަރީ މަހު ވަނީ ގެޒެޓުކޮށްފަ އެވެ.

ފުލުހުންގެ ބަޔާނުގައި އިތުރަށް ބުނިގޮތުގައި:

ހޯމް މިނިސްޓްރީން ބުނި ގޮތުގައި މިއަދު ގެނައި އަންހެން މީހާ އާއި އޭނާގެ ދަރިން އަނބުރާ ގެންނެސްފައި ވަނީ އެ މީހުން ޒިންމާދާރު ދިވެހިންގެ ގޮތުގައި އަލުން އަނބުރާ މުޖުތަމައަށް ނެރުމަށެވެ.

ސީރިއާ ފަދަ އަރަބި ބައެއް ގައުމުތަކުގައި ހިނގި ދާހިލީ ހަނގުރާމަތަކުގައި އައިއެސް ފަދަ ޖަމާއަތްތަކާ ގުޅިގެން ހަނގުރާމަ ކުރަން ގިނަ އަދަދެއްގެ ދިވެހިން އެކި ގައުމުތަކަށް ދިޔަ އެވެ. އޭގެ ތެރެއިން ބައެއް މީހުން ހަނގުރާމައިގައި މަރުވި އިރު، އެ މީހުންގެ އަނބިން ހުވަފަތްވެ އެހެން މީހުންނާ އިންނަން މަޖުބޫރުވި އެވެ. އޭގެ ތެރެއިން ބައެއް އާއިލާތައް އަނބުރާ އަންނަން ސަރުކާރުގައި ދަނީ އެދެމުންނެވެ.