ވިސާގެ ލުއިތަކާ އެކު ޖުމްލަ 5 އެއްބަސްވުމެއްގައި ޗައިނާއާ އެކު ސޮއިކޮށްފި

ކުރިން ވިސާ ނެގުމަކާ ނުލައި ދިވެހީންނަށް ޗައިނާއަށް ދަތުރުކުރެވޭނެ ގޮތަށް 30 ދުވަހުގެ އޮން އެރައިވަލް ވިސާ ލިބޭ ގޮތް ހެދުމަށާއި، އިތުރު ހަތަރު ދާއިރާއަކުން ގުޅުންބަދަހިކުރުމުގެ އެއްބަސްވުންތަކުގައި، ރާއްޖެ އާއި ޗައިނާއާ ދެމެދު މިއަދު ސޮއިކޮށްފި އެވެ.

ވީ ކިހިނެއް؟ - އެއްބަސްވުންތަކުގައި ސޮއިކޮށްފައިވަނީ، ޗައިނާގެ ފޮރިން މިނިސްޓަރު ވެންގް ޔީ މިހާރު ރާއްޖެއަށް ކުރައްވަމުން ގެންދަވާ ދަތުރުގައި، މިއަދު ފޮރިން މިނިސްޓްރީގައި ބޭއްވި ހާއްސަ ރަސްމިއްޔާތެއްގަ އެވެ.

ތަފްސީލް - އެ ރަސްމިއްޔާތުގައި ދެ ގައުމުގެ ދެމެދުގައި ޖުމްލަ ފަސް އެއްބަސްވުމެއްގައި ސޮއިކުރި އެވެ. އެ އެއްބަސްވުންތަކަކީ:

1. ވިސާ އެގްޒެމްޝަން އެއްބަސްވުން

2. ސިއްހީ ދާއިރާއިން ޗައިނާއާ ގުޅުން ބަދަހިކުރުމުގެ އެއްބަސްވުން

3. އިގްތިސޯދީ އަދި ފަންނީ ދާއިރާއިން ގުޅުން ބަދަހިކުރުމަށް ހިލޭ އެހީ ދިނުމުގެ އެއްބަސްވުން

4. ސިނަމާލެ ބްރިޖްގެ މެއިންޓަނަންސް މަސައްކަތާ ބެހޭ އެއްބަސްވުން

5. 5 ރަށެއްގައި މައިކްރޯގްރިޑް ސީވޯޓާ ޑީސެލިނޭޝަން ޕްލާންޓް ގާއިމްކުރުމުގެ އެއްބަސްވުން

ގުޅުންހުރި ކަމެއް - މި އަހަރަކީ ރާއްޖެ އާއި ޗައިނާއާ ދެމެދު ހާރިޖީ ގުޅުން ގާއިމްކުރިތާ 50 އަހަރު ފުރޭ މުނާސަބަތެވެ. މިއަދު ވަނީ އެ މުނާސަބަތާ ގުޅިގެން ތައްޔާރުކޮށްފައިވާ ލޯގޯ ދައްކައިލައިފަ އެވެ. އަދި ދެ ގައުމުގެ ގާތް ގުޅުމުގެ މައްޗަށް ތައްޔާރުކޮށްފައިވާ ވީޑިއޯ އެއް ވެސް ދައްކާފައިވެ އެވެ.

ރާއްޖެއާއި ޗައިނާއާ ދެމެދު ޑިޕޮލަމެޓިކް ގުޅުން ގާއިމު ކުރީ15 އެޕްރީލް 1972ގަ އެވެ.

އެނގުން މުހިންމު - ވޭންގް ޔީގެ ދަތުރަކީ ޗައިނާގެ ރައީސް ޝީ ޖިންޕިން ސެޕްޓެމްބަރު 2014ގައި ރާއްޖެއަށް ކުރެއްވި ދަތުރުފުޅަށް ފަހު ޗައިނާ ސަރުކާރުގެ އިސް ވެރިއަކު ރަސްމީކޮށް ރާއްޖެ ވަޑައިގަންނަވާ ފުރަތަމަ ފަހަރެވެ.

މުހިންމުވަނީ ކީއްވެ؟ - ރާއްޖެ އާއި ޗައިނާއާ ދެމެދު އެންމެ ބޮޑަށް ގުޅުން ބަދަހިވީ ކުރީގެ ރައީސް އަބްދުﷲ ޔާމީންގެ ސަރުކާރުގަ އެވެ. ބޮޑެތި މަޝްރޫއުތަކަށް އެ ސަރުކާރުން ފައިސާ ހޯދީ ވެސް ޗައިނާ އިންނެވެ. އެކަމަކު، ވެރިކަން ބަދަލުވެ، މިހާރުގެ ސަރުކާރުން ޗައިނާގެ ވާދަވެރި އިންޑިއާއާ މާ ބޮޑަށް ގުޅުން ބަދަހިކުރުމުން ޗައިނާއާ އެކު އޮތް ގުޅުން ވަނީ ހީނަރުވެފަ އެވެ.

އިތުރަށް ކިޔާލަން -