އެއާޕޯޓުގައި ފަސިންޖަރުންތަކެއް މަޑުކޮށްލައިގެން. (ދައުރު ފޮޓޯ/ އަބްދުﷲ އަނޫފް ޖުނައިދު)
ގިނަ މީހުން އެއްވާ ހަރަކާތްތައް މަދުކުރަން އެދިއްޖެ
ކޮވިޑް-19ގެ އާ ވޭރިއަންޓް، އޮމިކްރޮން ދުނިޔޭގެ އެކި ކަންކޮޅުތަކުގައި އާދަޔާހިލާފަށް ބާރަށް ފެތުރެމުން ދާ މި ދަނޑިވަޅާއި ރާއްޖޭގެ ސްކޫލު ޗުއްޓީއާ ދިމާވެފައި ވާއިރު، ޗުއްޓީއަށް ގިނަ އަދަދެއްގެ މީހުން އެކި ތަންތަނަށް ދަތުރުކުރަން ފަށާފައި ވާތީ، ގިނަ މީހުން އެއްވެގެން ބާއްވާ ހަރަކާތްތަކާއި ހަފްލާތައް ވީހާ ވެސް މަދުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
ވީ ކިހިނެއް؟ - ޗުއްޓީއާ ދިމާކޮށް މިދިޔަ ބުރާސްފަތި ދުވަހު އެޗްޕީއޭ އިން ނެރުނު އިއުލާނެއްގައި ބުނީ، މި ދުވަސްވަރު ރާއްޖޭން ބޭރަށާއި އަތޮޅުތެރެއަށް ދަތުރުފަތުރުކުރުމާއި ގޭގެއަށް ޒިޔާރަތްކުރުން އިތުރުވާނެ ކަމަށެވެ. އަދި ހިތާނީ ހަފްލާ ފަދަ މީހުން އެއްވެ އުޅޭ ތަންތަންނަށް ދިއުން އިތުރުވެގެން ދާނެތީ، ކޮވިޑާއި އެ ނޫން ވެސް ގައިންގަޔަށް އަރާ ބަލިތަކުން ރައްކާތެރިވުމަށް ވަނީ އިލްތިމާސްކޮށްފަ އެވެ.
ތަފްސީލް - އެގޮތުން، ގިނަ މީހުން އެއްވާ ފަދަ ހަރަކާތްތައް، ހާއްސަކޮށް އެކި ރަށްރަށުން މީހުން އަންނަ ފަދަ ކަންކަން ކުރުން ވީހާ ވެސް މަދުކުރުމަށް ނުވަތަ މި ވަގުތަށް ފަސްކުރުމަށް އެޗްޕީއޭ އިން ވަނީ އެދިފަ އެވެ.
ހިތާނީ ހަފްލާތަކާއި ބާޒާރުތައް އަދި ގިނަ މީހުން އެއްވާ ހަފްލާތައް އިންތިޒާމުކުރުމާއި އެ ތަންތަނަށް ދިއުމުގައި ސަމާލުކަން ދޭންވީ ކަންކަން:
-
އެފަދަ ހަރަކާތެއް ބާއްވާ ނަމަ ވީހާ ވެސް ހާމަ ތަނެއްގައި ބޭއްވުން
-
ޕާޓީތަކާއި ހަފްލާތަކާއި ހިތާނީ ޕާޓީތައް ބޭއްވުމުގައި އެޗްޕީއޭގެ ގައިޑްލައިންތަކަށް އަމަލުކުރުން
-
ތަނުގެ ތެރޭގައި ސެނިޓައިޒާ ބަހައްޓާފައި ހުރުން
-
ތަނުގެ ތެރޭގައި މީހުން ބޮނޑި ނުވެވޭނެހެން އިންތިޒާމުކޮށްފައި ބެހެއްޓުން
-
ހައި ރިސްކް ފަރާތްތައް މިފަދަ ތަންތަނަށް ދިއުން މަދުކުރުން
-
ކޮވިޑްގެ އެއްވެސް އަލާމާތެއް ހުރި ނަމަ ނުދިއުން
-
ޕީސީއާރް ނެގެޓިވް ވިޔަސް އަލާމާތްތައް އެއްކޮށް ފިލަންދެން ތަންތަނަށް ނުގޮސް މަޑުކުރުން
އޭގެ އިތުރުން، ރާއްޖޭން ބޭރަށް ދަތުރުކުރުމުގަ އާއި އެތެރޭގެ ދަތުރުފަތުރުކުރުމުގައި ވެސް ގިނަ ކަންތައްތަކަށް ސަމާލުކަން ދިނުމަށް އެޗްޕީއޭ އިން އެދިފައިވެ އެވެ. އޭގެ ތެރޭގައި ހިމެނެނީ:
-
ކޮވިޑްގެ އެއްވެސް އަލާމާތެއް ހުރި ނަމަ ޓެސްޓުކޮށް ނަތީޖާ ނުލިބެނީސް ދަތުރުނުކުރުން އަދި ނަތީޖާ ލިބެންދެން ގޭގައި އެކަހެރިވުން
-
ދަތުރުކުރުމުގެ ކުރިން، ދާ ގައުމުގެ ކޮވިޑް ހާލަތާއި ރައްކާތެރިކަމުގެ ފިޔަވަޅުތަކަށް އަހުލުވެރިވުން
-
ހަލުވިކަމާ އެކު ކޮވިޑް ފެތުރޭ ގައުމުތަކަށް ދަތުރުކުރުން ފަސްކުރުން
-
ދަތުރުކުރުމުގެ ކުރިން ވެކްސިން ފުރިހަމަކުރުން އަދި ޝަރުތު ހަމަވާ ނަމަ ބޫސްޓާ ޖެހުން
-
ގިނަ މީހުން އެއްވާ ތަންތަނަށް ދިއުން މަދުކުރުން
-
ވެކްސިން ފުރިހަމަކޮށްފައިވާ މީހުން ރާއްޖެ އަންނަތާ 3-5 ދުވަހުގެ ތެރޭގައި ޕީސީއާރް ޓެސްޓުކުރުން
-
ދަތުރަށް ފަހު ޕޮޒިޓިވް ކޭހެއްގެ ކޮންޓެކްޓަކަށް ވެއްޖެ ނަމަ ކަމާ ބެހޭ ފަރާތަށް ވީހާ ވެސް އަވަހަކަށް ރިޕޯޓުކުރުން
-
ބޭރުގައި އުޅޭއިރު އަދި ގޭގެއަށް ޒިޔާރަތްކުރާއިރު މާސްކް އަޅައި ގައިދުރުކުރުން
-
ކޮވިޑްގެ އަލާމާތެއް ފެނިއްޖެ ނަމަ ޓެސްޓުކުރުން
އެނގުން މުހިއްމު - ޗުއްޓީއާ ދިމާކޮށް ގިނަ ބަޔަކު އަންނަނީ އަތޮޅުތެރެއަށާއި ރާއްޖޭން ބޭރަށް ފުރަމުންނެވެ. އަދި ނައިޓް މާކެޓުތަކާއި ކުޅިވަރު މުބާރާތްތައް ފަދަ މީހުން ގިނައިން އެއްވާ އިވެންޓުތައް އަންނަނީ ބާއްވަމުންނެވެ.
ކޮވިޑުގެ އާ ވޭރިއަންޓެއް ކަމަށްވާ އޮމިކްރޮން މިދިޔަ މަހުގެ ފަހުކޮޅު ދެކުނު އެފްރިކާ އިން ފެނުނު ފަހުން ދުނިޔޭގެ އެކި ހިސާބުތަކުގައި ކޮވިޑުގެ ކޭސްތައް ވަނީ އާދަޔާހިލާފަށް ގިނަވާން ފަށާފަ އެވެ.
ރާއްޖޭން މިހާތަނަށް ރަސްމީކޮށް ފެނިފައި ވަނީ އޮމިކްރޮންގެ ފަސް ކޭސް އެވެ. އެއީ މުޅިން ވެސް ރާއްޖެ އައި ޓޫރިސްޓުންނެވެ. މުޖުތަމައު ތެރޭގައި އޮމިކްރޮން ފެތުރޭކަން (ކޮމިއުނިޓީ ޓްރާންސްމިޝަނެއް އުޅޭކަން) ނުވަތަ ނޫން ކަމެއް ވެސް ރަސްމީ އިދާރާއަކުން އަދި ކަށަވަރެއް ނުކޮށްދެ އެވެ.
މިދިޔަ އޭޕްރީލް މަހު ރާއްޖޭން ކޮވިޑް ފެނުނު ފަހުން މިހާތަނަށް 92،000އަށް ވުރެ ގިނަ މީހުންނަށް ބަލި ޖެހިފައިވެ އެވެ. އޭގެ ތެރެއިން 261 މީހަކު ވަނީ މަރުވެފަ އެވެ.