ސޯމާލިއާ ބަޔަކު ތިބި ޑިންގީއެއް ނ. އަތޮޅު ރަށަކަށް ލައްގައިފި

ސޯމާލިއާއަށް ނިސްބަތްވާ ތިން މީހަކު ތިބި ޑިންގީއެއް ނ. އަތޮޅުގައި ދަނޑުވެރިކަން ކުރާ ރަށަކަށް ލައްގައިފި އެވެ.

ވީ ކިހިނެއް؟ - ފުލުހުން މިއަދު ބުނީ، ނ. ވަވަތިއަށް މިއަދު ޑިންގީއެއް ލައްގާފައިވާ ކަމަށާއި އޭގައި ސޯމާލިއާއަށް ނިސްބަތްވާ ތިން މީހުން ތިބި ކަމަށެވެ.

ތަފްސީލް - ފުލުހުން ހިއްސާކޮށްފައިވާ ފޮޓޯ އިން ފެންނަނީ އިންޖީނު އަޅާފައި އޮތް ކުޑަ ޑިންގީއެކެވެ.

އެ ޑިންގީން ދަތުރުކުރި މީހުންގެ ހާލާ ގުޅޭ ގޮތުން ފުލުހުން ވަކި އެއްޗެއް ނުބުނެ އެވެ. ނަމަވެސް، އެ ތިންމީހުން އިށީނދެ ތިބި ފޮޓޯއެއް ފުލުހުން ވަނީ ހިއްސާ ކޮށްފަ އެވެ.

ވަވަތި އަކީ ދަނޑުވެރިކަމާއި އެ ސިނާއަތާ ގުޅުންހުރި އެހެން މަސައްކަތްތައް ކުރުމަށް ދިގު މުއްދަތަކަށް ދޫކޮށްފައި އޮންނަ ރަށެކެވެ.

ސޯމާލިއާގެ އިރަށް އިންޑިއާ ކަނޑުގައި އެ ގައުމާ އެންމެ ކައިރި ގައުމަކީ ރާއްޖެ އެވެ.