އައްޑޫ ހިތަދޫ އާއި މަރަދޫ ގުޅުވާލާ ބުރިޖުގެ ކުރެހުމެއް.
ހިތަދޫ އާއި މަރަދޫ ގުޅާލާ ބުރިޖުގެ އަމަލީ މަސައްކަތް ފަށައިފި
އައްޑޫގައި ކުރިއަށް ގެންދާ މަގު ހެދުމުގެ މަޝްރޫއުގެ ދަށުން، ހިތަދޫ އާއި މަރަދޫ ގުޅާލަން އަޅާ ބްރިޖުގެ އަމަލީ މަސައްކަތް ފަށައިފި އެވެ.
އެނގުން މުހިންމު - އައްޑޫގައި ފެން ހިންދުމުގެ ނިޒާމް ގާއިމްކޮށް، މަގު ހެދުމުގެ މަސައްކަތް ކުރަނީ އިންޑިއާގެ އެފްކޮންސް އިންފްރާސްޓްރަކްޗާއާ ހަވާލުކޮށްގެންނެވެ. މާލެ، ވިލިމާލެ، ތިލަފުށި އަދި ގުޅިފަޅު ގުޅާލާ ބްރިޖުގެ މަސައްކަތް ވެސް ހަވާލުކޮށްފައިވާ އެ ކުންފުންޏާ މި މަޝްރޫއު ހަވާލުކުރީ މިދިޔަ ފެބުރުއަރީ މަހުގެ 21ގަ އެވެ.
ވީ ކިހިނެއް؟ - އައްޑޫގެ މޭޔަރު އަލީ ނިޒާރު މިއަދު 'ދައުރު'އަށް ވިދާޅުވީ މަގު ހެދުމުގެ މަޝްރޫއުގެ ދަށުން މަރަދޫ އާއި ހިތަދޫ ގުޅުވާލަދޭ ބްރިޖުގެ މަސައްކަތް ފަށައިގެން ކުރިއަށްދާ ކަމަށެވެ. އެގޮތުން، މިހާރު ކުރަމުން އަންނަނީ ބްރިޖުގެ ތަނބު ޖެހުމުގެ ކުރިން ކުރަންޖެހޭ މަސައްކަތްތައްކަން އޭނާ ފާހަގަކުރެއްވި އެވެ.
ތަފްސީލް - މިއީ އައްޑޫގެ ހަންކެޑެ ހިމެނޭ ސަރަހައްދުގައި މިހާރު ބޭނުންކުރަމުން އަންނަ ލިންކް ރޯޑުގެ ހުޅަނގުން، ހަންކެޑެއަށް ނާރައި ހިތަދޫ ގައުކެޑި އާއި މަރަދޫ ގުޅާލުމަށް އަޅާ ބްރިޖެކެވެ. އެގޮތުން:
-
ބްރިޖުގެ ދިގުމިނަކީ 1.4 ކިލޯމީޓަރު
-
ބްރިޖު ހަދަނީ ހަތަރު ލޭނަށް
އައްޑޫ މަގު ހެދުމުގެ މަޝްރޫއު
އައްޑޫގެ މަގުތައް ހަދަން އެފްކޮންސްއާ ހަވާލުކުރީ 1.1 ބިލިއަން ރުފިޔާ އަށެވެ. އެ މަސައްކަތް ނިންމަން އެއްބަސްވެފައި ވަނީ ދެ އަހަރުގެ ތެރޭގަ އެވެ. މިއީ، އިންޑިއާގެ އެގްޒިމް ބޭންކުން ނަގާފައިވާ 800 މިލިއަން ޑޮލަރު (12.4 ބިލިއަން ރުފިޔާ)ގެ ލައިން އޮފް ކްރެޑިޓް ފެސިލިޓީއެއްގެ ދަށުން ހިންގާ އެއް މަޝްރޫއެވެ.
މި މަޝްރޫއުގެ ދަށުން އައްޑޫގައި:
-
103 ކިލޯމީޓަރުގެ ފެން ހިންދާ ނިޒާމު ގާއިމުކުރާނެ
-
އައްޑޫގެ ހުރިހާ އަވަށްތަކެއް ހިމެނޭ ގޮތަށް 40 ކިލޯމީޓަރުގައި ތާރު އަޅާނެ
-
އިތުރު 60 ކިލޯމީޓަރުގެ މަގުގައި ސިމެންތި ސްޓެބިލައިޒްޑް ލޭޔާ އަޅާނެ
-
މިހާރު ތާރު އަޅާފައިވާ މަގުތަކުގެ ތެރެއިން 3.4 ކިލޯމީޓަރުގެ މަގުގެ ރީސާފޭސިން މަސައްކަތް ކުރާނެ