އެމްޑީޕީގެ ހަތަރު ވަނަ ކޮންގްރެސްގައި ޕާޓީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ (ދައުރު ފޮޓޯ/އަބްދުﷲ ޔަޝާއު)
ދަފްތަރު އޮތީ ސައްހަކޮށްފައި، ނަޝީދުގެ ވާހަކައާ މެދު ހިތާމަކުރަން: އެމްޑީޕީ
އެމްޑީޕީގެ މެންބަރުންގެ ދަފްތަރު އޮތީ، ގަޑުބަޑުކޮށްފައި ކަމަށާއި އެކަން އެހެން އޮއްވާ ބާއްވާ ރިޔާސީ ޕްރައިމަރީއެއް އިންސާފުވެރި ނުވާނެ ކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވީ ދަފްތަރުގައި ހުރި މައްސަލަތައް ހައްލުކޮށް، އެކަން ސައްހަކޮށްފައި ވަނިކޮށް ކަމަށާއި އެހެންވެ، ނަޝީދުގެ ވާހަކަފުޅާ މެދު ހިތާމަކުރާކަމަށް އެމްޑީޕީއިން މިިއަދު ބުުނެފި އެވެ.
ވީ ކިހިނެއް؟- އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ނަޝީދު މިއަދު ވަނީ، ޕްރައިމަރީއާ ގުޅޭ ގޮތުން އެ މަނިކުފާނުގެ ހުރި ކަންބޮޑުވުންތައް ބަޔާންކުރައްވައި، އެ ޕާޓީގެ ޗެއާޕާސަން ފައްޔާޒު އިސްމާއިލްއަށް ސިޓީއެއް ފޮނުއްވާފަ އެވެ.
އެ ސިޓީގައި ވިދާޅުވި ގޮތުގައި:
-
އެމްޑީޕީގެ %40 މެންބަރުންނަށް ވޯޓު ނުލެވޭ ގޮތަށް ޕްރައިމަރީ ބާއްވައިފި ނަމަ، އެއީ 2023ގެ ރިޔާސީ އިންތިހާބުގައި އެޕާޓީއަށް ނޭދެވޭ އަސަރު ކުރާނެ ކަމެއް
-
އެމްޑީޕީގެ ވޯޓުލާ ދަފްތަރުން 40,000އާ ގާތަށް މީހުން ވަނީ ކުއްލިއަކަށް އުނިކޮށްފައި. އަދި އެކަން ކުރީ މެމްބަރުންނަށް އެނގުމަކާ ނުލައި
-
އެކަން އެހެން އޮއްވާ ބާއްވާ ޕްރައިމަރީއެއް އިންސާފުވެރިއެއް ނުވާނެ
ބުނީ ކީކޭ؟- ނަޝީދުގެ މިވާހަކަތަކާ ގުޅިގެން އެމްޑީޕީގެ އޮފީހުން މިރޭ ވަނީ ނޫސް ބަޔާނެއް އާއްމުކޮށްފަ އެވެ. އެ ބަޔާނުގައި ބުނީ ކުރިން ޕާޓީން ބަލަހައްޓަމުން ދިޔަ ދަފްތަރު އޮތީ އެހެން ސިޔާސީ ޕާޓީތަކަށް ނިސްބަތްވާ މެމްބަރުންނާއި އެ ޕާޓީތަކުގެ މަގާމުތަކުގައި ތިބޭ ފަރާތްތަކުން އެމްޑީޕީގެ އެތެރޭގެ އިންތިހާބުތަކުގައި ވާދަކުރެވޭނެ ފަދަ ގޮތަކަށް ކަމަށެވެ. އަދި އެއީ ވޯޓު ގަޑުބަޑުކޮށްލުމުގެ ފުރުސަތު ލިބިދޭނެ ކަމެއް ކަމަށް ވެސް ބަޔާނުގައި ބުންޏެވެ.
އެކަމަކު އެމްޑީޕީން ބުނިގޮތުގައި ދަފުތަރުގައި ހުރި މައްސަލަތައް މިހާރު ވަނީ ހައްލުކޮށްފަ އެވެ. އަދި އެކަން ކުރީ ގައުމީ މަޖިލީހުގެ ނިންމުމާ އެއްގޮތްވާ ގޮތުގެ މަތިން ކަމަށް ވެެސް ބުންޏެވެ.
އެނގުން މުހިންމު - ޗެއާޕާސަންގެ މަގާމަށް ފައްޔާޒު ކެމްޕެއިން ކުރެއްވިރު، ޕާޓީގެ ދަފްތަރު ސާފުކުރުމަކީ އޭނާގެ ވައުދެކެވެ. ފައްޔާޒު މަގާމާ ހަވާލުވުމަށް ފަހު، ޕާޓީގެ ކުރީގެ ދަފްތަރު އުވާލައި، އިލެކްޝަން ކޮމިޝަންގެ ދަފްތަރު ވަނީ އެއްގޮތް ކޮށްފަ އެވެ. އެ ނިންމުން ނިންމާފައިވަނީ މިިދިޔަ މެއި މަހު ބޭއްވި އެމްޑީޕީގެ ގައުމީ މަޖިލީހުގެ ޖަލްސާއަށް ހުށަހަޅައިގެން، އެ މަޖިލީހުން ފާސްކޮށްގެންނެވެ. ނަޝީދު ފެކްޝަންގެ މެންބަރުން އޭރު އެކަމާ ކަންބޮޑުވުން ފާޅުކުރި އެވެ.
ފާސްކުރި އެ ގަރާރުގައި އޮތް ކަމަށް އެމްޑީޕީގެ ބަޔާނުގައި މިރޭ ބުނީ:
-
އެމްޑީޕީއިން ބަލަހައްޓާ ދަފްތަރުގައި ހިމެނޭ އިލެކްޝަންސް ކޮމިޝަންގެ އެމްޑީޕީގެ ރަސްމީ ދަފްތަރުގައި ހިމެނޭ 54,599 މެމްބަރުންނަކީ އެމްޑީޕީގެ ރަސްމީ ދަފްތަރުކަމަށް ބަލައި، ދެން ތިބި 39,911 މީހުންނަށް އެމްޑީޕީގެ މެމްބަރުކަން ސައްހަކުރުމަށް ތިން މަސް ދިނުމަށް
-
މީގެ ތެރެއިން އީސީގައި އެހެން ޕާޓީއެއްގެ ރަޖިސްޓްރީގައިވާ މީހުން އެމްޑީޕީ އިން ވަކިކުރުމަށް
-
އެމްޑީޕީގެ އެއްވެސް މަގާމެއްގައި ހުރި މެމްބަރަކު ނަމަ 1 މަސް ދުވަސް ތެރޭގައި މެމްބަޝިޕް ސައްހަ ކުރުމަށް
"އެމްޑީޕީގެ ރިޔާސީ ޕްރައިމަރީގައި ވޯޓުލުމުގެ ފުރުސަތު ލިބެން ޖެހޭނީ މި ޕާޓީގެ ސައްހަ މެމްބަރުންނަށް ކަމަށްވާ އިރު ގައުމީ މަޖިލީހުގެ ނިންމުމާ އެއްގޮތްވާ ގޮތުގެ މަތިން ދަފްތަރު މިހާރު އޮތީ ސައްހަ ކުރެވި ޕާޓީއަށް ވަންނަން އެދޭ އެންމެހާ ދިވެހި ރައްޔިތުންނަށް ފުރުސަތު ހުޅުވިފަ އެވެ." އެމްޑީޕީގެ ބަޔާނުގައި ބުންޏެވެ.
"(ނަމަވެސް) ދަފްތަރު ސައްހަކޮށް، ބެލެހެއްޓެމުން ދަނިކޮށް އެ ދަފްތަރާ މެދު ސުވާލު އުފެދޭ ގޮތަށް ޕާޓީގެ ރައީސް، ރައީސް މުހައްމަދު ނަޝީދު ވިދާޅުވެފައި ވާތީ ހިތާމަކުރަމެވެ."