ތުލުސްދޫ ދާއިރާގެ މެންބަރު އިބްރާހީމް ނަސީމް، ޕްލޭނިން މިނިސްޓަރު މުހައްމަދު އަސްލަމްއާ ސުވާލުކުރެއްވުން، 13 އޮކްޓޫބަރު 2021 (ފޮޓޯ/ މަޖިލިސް)
ރަނގަޅަށް ތޮށި ލާކަށް ނޭނގޭ، އީއައިއޭ އަކީ ކަޓް ޕޭސްޓެއް: އަސްލަމް
ރާއްޖޭގެ އެތައް ރަށެއްގެ ގޮނޑުދޮށް ހިމާޔަތްކުރަން ތޮށިލިއަސް އެކަން އެންމެ ރަނގަޅަށް ކުރަން ނޭނގޭ ކަމަށާއި އެފަދަ ކަންކަމުގެ ސަބަބުން ތިމާވެއްޓަށް އަސަރުކުރާ މިންވަރު ދެނެގަތުމަށް ހަދާ އީއައިއޭ އަކީ ވެސް ގިނަފަހަރަށް ރަނގަޅު އެއްޗެއް ނޫން ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ވީ ކިހިނެއް؟ - މިނިސްޓަރު އަސްލަމް މިއަދު ރައްޔިތުންގެ މަޖިލީހަށް ހާޒިރުވެވަޑައިގަތީ ތުލުސްދޫ ދާއިރާގެ މެންބަރު އިބްރާހީމް ނަސީމްގެ ސުވާލަކަށް ޖަވާބުދެއްވުމަށެވެ. އިތުރު ސުވާލަށް ހުޅުވާލުމުން ކުރެންދޫ ދާއިރާގެ މެމްބަރު އަބްދުލްޣަނީ އަބްދުލްހަކީމް ވަނީ ރާއްޖޭގެ ރަށްރަށުގައި ތޮށި ލުމާއި ގޮނޑުދޮށް ހިމާޔަތްކުރުމުގެ މަސައްކަތް ކުރާއިރު ވެސް އުދަ އެރުމާއި ރަށް ގިރުން ފަދަ މައްސަލަތައް ހައްލުނުވަނީ ކީއްވެތޯ ސުވާލުކުރައްވައިފަ އެވެ.
މިނިސްޓަރުގެ ބަސް - "ރާއްޖޭގައި އަޅުގަނޑުމެންނަށް ހައްލެއް ނުލިބިގެން ދަނީ، މިކަން މާ މޮޅަށް ކުރަން އަޅުގަނޑުމެންނަކަށް ނޭނގޭ،" މިނިސްޓަރު ވިދާޅުވި އެވެ.
އޭނާ ވިދާޅުވީ ތޮށިލުމަކީ އެތައް ޒަމާނުއްސުރެ ކުރަމުން އަންނަ މަސައްކަތެއް ނަމަވެސް، ތޮއްޓެއް ލުމަކުން މުޅި މައްސަލައަށް ހައްލު ނުލިބޭ ކަމަށެވެ. ކަމުގެ މާހިރުންނާ ހަވާލައިދެއްވައި މިނިސްޓަރު ވިދާޅުވީ، ގުދުރަތީ ނިޒާމާ ކުޅުމުން އޭގެން ނުކުންނަ ނަތީޖާ މާ ގޯސް ކަމަށެވެ. އަދި އެކަން ދިވެހިންނަށް ވިސްނޭ ވަރަށް މިހާރު ރާއްޖޭގެ ގޮނޑުދޮށްތަކުގައި އެކި ކަހަލަ މަސައްކަތްތައް ކޮށްފައިވާ ކަމަށެވެ.
"ބަނދަރު ހެދީމާ ރަށްރަށަށް ވާ ގޮތް އެބަ އެނގޭ. ބިން ހިއްކީމަ ވާގޮތް އެބަ އެނގޭ. ތޮއްޓެއް ލީމަ ދެން އޮތް ތަން ގިރާކަން އެބަ އެނގޭ. މިހިރަ ހުރިހާ ކަމެއް ވެސް އެބަ އެނގޭ. އެކަމަކު އަޅުގަނޑުމެންނަށް އެކަން މި އެނގެނީ އެކަމެއް ވާފަހުން،" މިނިސްޓަރު ވިދާޅުވި އެވެ. "އަޅުގަނޑުމެންގެ ޕަބްލިކް ޑިމާންޑެއް ވެސް ނެތް. ޕޮލިޓިކަލް ޑިމާންޑެއް ވެސް ނެތް ދެން ވާ ގޮތް ބަލާކަށް،"
މިނިސްޓަރު ވިދާޅުވީ ރާއްޖޭގައި އަބަދުވެސް ގެންގުޅޭ ވިސްނުމަކީ އެހިނދަކަށް ބޭނުންވާ ކަމެއް ކޮށްލުމުގެ ވިސްނުން ކަމަށާއި އެކަމުގެ ސަބަބުން ނުކުމެދާނެ ނަތީޖާ ދެނެގަންނަން ފުރިހަމަ އެސެސްމަންޓުތަކެއް ހެދުމުގެ ގާބިލުކަން ނެތް ކަމަށެވެ.
"އީއައިއޭ ޕްރޮސެސް އެއް އިނދޭ. ގިނަ ފަހަރަށް އެއީ ކަޓް ޕޭސްޓް އެއްޗެއް. އެހެންވީމާ މާ މޮޅަކަށް މިކަމެއް އަޅުގަނޑުމެންނަކަށް ނުކުރެވޭ،" މިނިސްޓަރު ވިދާޅުވި އެވެ.
ތަފްސީލް - މިނިސްޓަރު ވިދާޅުވީ ބިމާއި ގޮނޑުދޮށް ހިމާޔަތްކުރުމުގެ މުހިންމުކަން ވިސްނި، މިހާރު އެކަމަށް ގިނަ ބަޔަކު ވަކާލާތުކުރި ނަމަވެސް، ކަނޑުގެ ލޮނުގަނޑު އުފުލުމާއި މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ދެން ދިމާވާނެ ދަތިތައް އަދި މާ ގިނަ ވާނެ ކަމަށެވެ. އެހެންކަމުން ރަށްތަކުގެ ހިމާޔަތަށް ގުދުރަތީގޮތުން ލިބިގެންވާ ރައްކާތެރިކަމަކީ ގޮނޑުދޮށް ހިމާޔަތްކުރަން ބޭނުންކުރާ އެއްޗަކަށް ހެދުމުގެ މަސައްކަތް ކުރަމުން އަންނަ ކަމަށް އަސްލަމް ވިދާޅުވި އެވެ.
"ތޮށިލުމުގެ ބަދަލުގައި ނޫނީ ތޮށި ލީ ނަމަވެސް ކޮމްބިނޭޝަންގެ ގޮތުގައި އެކަން ކުރަން. މިހާރު ވަރަށް ބޮޑަށް އެޑްވޮކެޓް ކުރާ ސަބްޖެކްޓެއް އެއީ،" މިނިސްޓަރު ވިދާޅުވި އެވެ.
މިނިސްޓަރު ދެން ފާހަގަކުރެއްވީ ތޮށި ލުމަށް ރަށްރަށުން ކުރާ ޑިމާންޑުތަކަށް ސިޔާސީ މީހުން ދީލާލާ ވާހަކަ އެވެ. ރާއްޖޭގައި 1200 ކިލޯމީޓަރުގެ ކޯސްޓްލައިން ހުރި އިރު، މުޅި ރާއްޖޭގެ ގޮނޑުދޮށްތަކުގައި ތޮށި ލާން ހަ ބިލިއަން ޑޮލަރު ހޭދަވާނެ ކަމަށް މިނިސްޓަރު ވިދާޅުވި އެވެ. އަދި މިކަމަށް "ރެޑީމޭޑް" ހައްލެއް ނެތް ކަމަށާއި، ކޮންމެ ރަށަކަށް އެއް ގޮތަކަށް ތޮށި ލުމުގެ މަސައްކަތް ނުވެސް ކުރެވޭނެ ކަމަށެވެ.
ނަމަވެސް ރަށްރަށުން ޑިމާންޑު ކުރަނީ އެ ރަށެއްގެ މީހުންގެ ބޭނުންވާ ތަނެއްގައި، ބޭނުންވާ ގޮތަކަށް އެ މަސައްކަތް ކުރުމަށް ކަމަށާއި، މާހިރުންގެ ލަފައެއް ވެސް ގަބޫލުނުކުރާ ކަމަށް އަސްލަމް ވިދާޅުވި އެވެ.
"އަޅުގަނޑުމެން ސިޔާސީ މީހުން ވިމަ ޕަބްލިކް ޑިމާންޑަށް ވަރަށް ގިނަ ފަހަރަށް ދީލާލާ. ވަރަށް ގިނަ ފަހަރަށް އުނދަގޫ ވާހަކައެއް އަޑުއަހަން. އެއީ ނޫނެކޭ ބުނުން، ތިގޮތް ކަމަކުނުދޭ ބުނުން. އެހެން ނަމަވެސް ބުނަންޖެހޭ ފަހަރު ވާނެ ބުނަން. އެހެންވީމަ މައްސަލައަށް ހައްލެއް ނުލިބެނީ ކޮމްޕްލެކްސިޓީއާ ހެދި." އަސްލަމް ވިދާޅުވި އެވެ.