އަބްދުﷲގެ ޕޯސްޓްމޯޓަމް ހެދުން ހުއްޓުވުމުގެ އަމުރެއް ނުދިން

ފުލުހުންގެ ބެލުމުގެ ދަށުގައި ހުއްޓާ މަރުވި އަބްދުﷲ ރަޝީދުގެ ޕޯސްޓްމޯޓަމް ހެދުން ހުއްޓުވުމަށް އާއިލާ އިން އެދުނު އަމުރު ނެރެދެވޭނެ ހާލަތެއް ނެތް ކަމަށް ސިވިލް ކޯޓުން މިއަދު ހުކުމްކޮށްފި އެވެ.

މައްސަލައިގެ ފެށުން - ފުލުހުންގެ ޑްރަގު އެންފޯސްމަންޓް ޑިޕާޓްމަންޓް (ޑީއީޑީ)ން ގދ. އަތޮޅުގައި ހިންގި ޑްރަގުގެ ބޮޑު އޮޕަރޭޝަނެއްގައި އަބްދުﷲ، 43، ސުވޯން/ގދ. ހޯނޑެއްދޫ، ހިމެނޭ ގޮތަށް ތިން މީހަކު މިދިޔަ އަންގާރަ ދުވަހުގެ މެންދުރު ފަހު 3 ޖަހާކަންހާއިރު އެ ރަށުން ހައްޔަރުކުރި އެވެ. އެ މީހުން ގޮވައިގެން އެ ރަށުން ފުރައިގެން އެހެން ތަނަކަށް ގެންދަން އުޅެނިކޮށް، އަބްދުﷲ މަރުވީ އެރަށު ބަދަރުގައި ލޯންޗު އޮއްވައި ލޯންޗުމަތީގައި ކަމަށްވެ އެވެ. އެގޮތުން:

ވީ ކިހިނެއް؟ - އާއިލާގެ ނުރުހުމުގައި އަބްދުﷲގެ ޕޯސްޓްމޯޓަމް ހަދަން ނިންމާފައިވާތީ، އެ ނިންމުން ބާތިލުކޮށް، މައްޔިއްތާ ވީހާ ވެސް އަވަހަކަށް ވަޅުލުމުގެ ކަންކަން ހަމަޖައްސަން ހަށިގަނޑު ހަވާލުކޮށްދިނުމަށް ފުލުހުންގެ މައްޗަށް އަމުރެއް ނެރެދިނުމަށް އޭނާގެ މަންމަ މަރްޔަމް އަހްމަދު، މާރަގަ/ގދ. ހޯނޑެއްދޫ ވަނީ ސިވިލް ކޯޓަށް މައްސަލައެއް ހުށަހަޅައިފަ އެވެ. އިއްޔެ އެ މައްސަލައިގެ އަޑުހުންތައް ނިންމާލާފައި ވާއިރު، ސިވިލް ކޯޓުން މިއަދު ހުކުމް ކުރީ އެ ފަދަ އަމުރެއް ނެރެން ޖެހޭ ތަނެއް ނެތް ކަމަށެވެ.

ތަފްސީލު - މައްސަލަ ބެއްލެވި ގާޒީ ހަސަން ފަހީމް އިބްރާހިމްގެ ހުކުމްގައި ވިދާޅުވީ، ދައުލަތުން ވެސް ފާހަގަކުރި ގޮތަށް، ޖިނާއީ އިޖުރާތުގެ ގާނޫނުގެ 1-75 ވަނަ މާއްދާ އާއި އޭގެ ދަށުން ހަދާފައިވާ  'މަރުގެ މައްސަލަތައް ތަހުގީގު ކުރުމަށް ޕޯސްޓްމޯޓަމް ހެދުމުގައި އަމަލުކުރާނެ އިޖުރާއަތުތަކުގެ ގަވައިދު'ގެ ދަށުން، އިހުމާލުގެ އަމަލަކުން މަރުވެފައިވާ ކަމަށް ތުހުމަތު ކުރެވޭ މައްސަލަތަކުގައި މަރުވި ސަބަބު ދެނެގަތުމަށް އޭނާގެ ހަށިގަނޑުގެ ޕޯސްޓްމޯޓަމެއް ހެދުމުގެ އިހްތިޔާރު ފުލުހުންނަށް ލިބިގެންވާ ކަމަށެވެ.

މި މައްސަލައިގައި އާއިލާގެ ފަރާތުން ވަކާލާތު ކުރެއްވި ވަކީލުން ދިފާއުއަކަށް ނެންގެވީ، ފުލުހުންގެ ގާނޫނުގެ ގާނޫނުގައި 97 ވަނަ މާއްދާގެ (ހ)އެވެ.  އެ މާއްދާގައި ބުނަނީ:

ސިވިލް ކޯޓުގެ ހުކުމްގައި ބުނީ، ފުލުހުންގެ ގާނޫނުގެ އެ މާއްދާގައި "އެހެން ގޮތަކަށް ބަޔާންކޮށްފައި ނުވާ ހިނދަކު" ކަމަށް ބަޔާންކޮށްފައި ވާއިރު، ޖިނާއީ އިޖުރާތުގެ ގާނޫނުގެ 1-75 މާއްދާ އާއި ފުލުހުންގެ ގާނޫނުގެ 97 ވަނަ މާއްދާގެ (ހ)އާ ފުށުއެރުންތަކެއް އޮތް ކަމަށް ޝަރީއަތަށް ގަބޫލު ނުކުރެވޭ ކަމަށެވެ.

އޭގެ އިތުރުން ހުކުމްގައި ފާހަގަކުރި ގޮތުގައި:

"[ޖިނާއީ އިޖުރާތުގެ ގާނޫނާއި އޭގެ ދަށުން ހަދާފައިވާ ގަވައިދުގެ ދަށުން] އިހުމާލުގެ އަމަލަކުން މީހަކު މަރުވެފައިވާ ކަމަށް ތުހުމަތު ކުރެވޭ މައްސަލަތުގައި، މަރުވެފައިވާ މީހާގެ ސަބަބު ދެނެގަތުމަށްޓަކައި މަރުވެފައިވާ މީހާގެ ހަށިގަނޑު ޕޯސްޓްމޯޓަމެއް ހެދުމުގެ އިހްތިޔާރު ދިވެހި ފުލުހުންގެ ހިދުމަތަށް ލިބިގެންވާކަމަށް ޝަރީއަތައް ގަބޫލު ކުރެވޭ،" އެ ހުކުމްގައި ބުނެފައިވެ އެވެ.

އެހެންކަމުން ގާޒީ ނިންމެވީ، މި މައްސަލައިގައި އަބްދުﷲގެ މަންމަ އެދިފައިވާ ގޮތުގެ މަތިން ކޯޓު އަމުރެއް ނެރެދޭން ޖެހޭނެ ތަނެއް ނެތް ކަމަށެވެ.