މެންބަރުންގެ އަދަދު ހިފަހައްޓަން ގާސިމްގެ އިސްލާހެއް؛ ނަޝީދުގެ ތާއީދު

ރައްޔިތުންގެ މަޖިލީހުގެ މެންބަރުންގެ އަދަދު 87ގައި ހިފެހެއްޓުމަށް، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމް ގާނޫނުއަސާސީއަށް އިއްޔެ އިސްލާހު ހުށަހަޅުއްވައިފި އެވެ. ގާސިމްގެ މި އިސްލާހަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވަނީ ތާއީދު ކުރައްވާފަ އެވެ.

އެނގުން މުހިންމު - ގާނޫނުއަސާސީ މިހާރު އޮންނަ ގޮތުން ކޮންމެ 5،000 މީހުންގެ އާބާދީ އަކީ އިދާރީ ވަކި ދާއިރާ އެވެ. އެއާ އެކު، ކޮންމެ މަޖިލީހުގެ ދައުރަކަށް ފަހު، މެންބަރުންގެ އަދަދު ދަނީ އިތުރު ވަމުންނެވެ. އެގޮތުން:

ތަފްސީލު - ގާނޫނޫއަސާސީ އެކުލަވާލި އިރު، އެ މަޖިލީހުގެ ރައީސްކަން ވެސް ކުރެއްވި ގާސިމް ހުށަހެޅުއްވި އިސްލާހުގައި އޮތީ، އިދާރީ ދާއިރާތަކުގެ ތެރޭގައި 87 އިންތިހާބީ ދާއިރާ ކަނޑައެޅުމަށް ފަހު، އެއިން ކޮންމެ އިންތިހާބީ ދާއިރާއަކުން އިންތިހާބު ކުރާނީ އެއް މެންބަރަކު ކަމަށް ކަނޑައެޅުމަށެވެ.

ގާސިމްގެ މި އިސްލާހު ފާސްވެއްޖެ ނަމަ، މެންބަރުންގެ އަދަދު 87އަށް ވުރެ އިތުރެއް ނުވާނެ އެވެ. ނަމަވެސް ދާއިރާތައް ބެހިގެން އަންނަ ގޮތް ބަދަލުވުމަކީ އެކަށީގެންވާ ކަމެކެވެ.

ބުނީ ކީކޭ؟ - އިސްލާހު ހުށަހަޅާ ސަބަބެއްގެ ގޮތުގައި ގާސިމް ވިދާޅުވެފައި ވަނީ، މިހާރު އަމަލުކުރަމުން އަންނަ ގާނޫނުއަސާސީގެ ދަށުން ބޭއްވި މަޖިލީހުގެ ތިން އިންތިހާބުގައި ވެސް ކޮންމެ ފަހަރަކު ވެސް މެންބަރުން އިތުރުވަމުންދާ ކަމަށެވެ. ނަމަވެސް، ކޮންމެ ފަހަރަކު މިގޮތަށް މެންބަރުން އިތުރުވުމަކީ ރާއްޖެ ފަދަ ކުޑަ ގައުމެއްގެ ގާނޫނު ހަދާ މަޖިލީހަށް ބެނުންވާ ވަރަށް ވުރެ މާ ގިނަ އަދަދެއްގެ މެންބަރުންކަން އޭނާ ފާހަގަކުރެއްވި އެވެ.

"އިގްތިސާދީ ގޮތުންނާ އަދި އެ ނޫން ވެސް ގޮތް ގޮތުން ގޮންޖެހުންތައް މިކަމުގައި ކުރިމަތިވާނެތީ، ރައްޔިތުންގެ މަޖިލީހުގެ މެންބަރުންގެ އަދަދު ވަކި އަދަދަކަށް ކަނޑައަޅައި ގާނޫނުއަސާސީން ނިންމާފައި ބޭއްވުމަކީ މުހިންމު ކަމެއްގެ ގޮތުގައި ދެކޭތީ" އެ ބިލު ހުށަހެޅުއްވީ ކަމަށް ގާސިމް ބަޔާންކުރައްވާފައިވެ އެވެ.

ގާސިމް ދެކެވަޑައިގަންވާ ގޮތުގައި، މިހާރު ހިނގަމުންދާ 19 ވަނަ މަޖިލީހުގައި މެންބަރުން ތިބި އަދަދު ކަމަށްވާ 87 އަކީ އެންމެ އެކަށީގެންވާ އަދަދެވެ.

ގާސިމްގެ މި އިސްލާހު ފާސްވާން މަޖިލީހުގެ ތިންބައިކުޅަ ދެ ބައި މެންބަރުންގެ ވޯޓު ބޭނުންވާނެ އެވެ. އެެއީ މަޖިލީހުގެ 58 މެންބަރުންގެ ވޯޓެވެ. އެހެންކަމުން، ސުޕަ މެޖޯރިޓީ އޮތް އެމްޑީޕީގެ ތާއީދު ނެތި މި އިސްލާހު ފާހެއް ނުވާނެ އެވެ.

އެމްޑީޕީގެ ރައީސް ނަޝީދު މިއަދު ވަނީ މި އިސްލާހަށް ތާއީދުކުރައްވައި އެއީ "މުހިންމު އިސްލާހެއް" ކަމަށް ވިދާޅުވެފަ އެވެ.

"މަޖިލިސް އެކުލެވިގެންވާ ގޮތާ އަދި މަޖިލީހުގެ ދައުރާ ބެހޭ ގޮތުން ވެސް ވިސްނުން ވަރަށް ބޭނުންތެރި،" ނަޝީދު މިއަދު ކުރެއްވި ޓުވީޓެއްގައި ވިދާޅުވި އެވެ.