ޖަޕާނުގެ 38 އާޓިސްޓެއްގެ މަސައްކަތް މާލެ އާޓް ގެލެރީގައި ދައްކާލަނީ

މާލެ އާޓް ގެލެރީގައި މިދިޔަ އަންގާރަ ދުވަހު އާއްމުންނަށް ހުޅުވާލި މައުރަޒުގައި ދައްކާލަނީ ޖަޕާނުގެ 38 އާޓިސްޓެއްގެ ކުރެހުމުގެ މަސައްކަތްތަކެވެ. މި މައުރަޒުން ރަމްޒުކޮށްދެނީ އާޓް ގެލެރީ މާލެ އާއި ޓޯކިޔޯގެ އީއެމްޕީ ގެލެރީ، މުއްސަނދި އާދަކާދަތަކާއި ކުރެހުމާއި އާޓްގެ ދާއިރާއިން ގުޅުވާލުމެވެ.

އީއެމްޕީ ގެލެރީއާ ގުޅިގެން ކުރިއަށް ގެންދާ މި މައުރަޒުގެ ތެރެއިން، ދެ ގައުމުގެ ސަގާފަތް ގުޅުވާލަދީ، ޖަޕާނުގެ އާޓިސްޓުންގެ މަސައްކަތްތަކުގައި ދިވެހި ބެލުންތެރިން ބައިވެރިވުމުގެ ފުރުސަތު ފަހި ކޮށްދެ އެވެ. 

މައުރަޒު ހުޅުވުމަށް މިދިޔަ ހޯމަ ދުވަހު ބޭއްވި ހުޅުވުމުގެ ރަސްމިއްޔާތުގައި ޖަޕާނުގެ އެމްބެސަޑަރު ޓަކެއުޝި މިޑޮރި އަދި ޑެޕިއުޓީ އެމްބެސަޑަރު ވެސް ބައިވެރިވަޑައިގަތެވެ. މީގެ އިތުރުން އީއެމްޕީ ގެލެރީގެ ފަރާތުން ބައިވެރިވި އިސް ވެރިންނާއި އާޓިސްޓުން، މާލެ އާޓް ގެެލެރީގެ އިސް ބޭފުޅުން އަދި ދިވެހި އާޓިސްޓުންނާއި އެކި ފަންނުވެރިން ވެސް ބައިވެރިވި އެވެ.

ކުރެހުންތަކުގައި އެކި ވައްތަރުގެ މީޑިއަމް ބޭނުންކޮށްފައިވެ އެވެ. އޭގެ ތެރޭގައި އެކްރިލިކް، ތެޔޮ ކުލަ، ކޮމްޕިއުޓަރު ގްރެފިކްސް، ޓައިލް އާޓް އަދި ކެލިގްރެފީ ހިމެނެ އެވެ. ކުރެހުންތަކުގައި ޖަޕާނުގެ ސަގާފަތް، ތާރީހު އަދި ފުޖީ ފަރުބަދަ ފަދަ ގުދުރަތީ މަންޒަރުތައް ޒަމާނީ ސްޓައިލްތަކުން ފެށިގެން އިހުގެ ސްޓައިލަށް ވެސް ކުރަހައިފައިވެ އެވެ. ކެލިގްރެފީ މަސައްކަތްތަކުގެ ތެރޭގައި ޖަޕާނުގެ 'ހައިކޫ' ޅެންތަކެއް ލިޔެފައި ހުއްޓެވެ. 

މި މައުރަޒުގައި ބައިވެރިވި އާޓިސްޓުންނަކީ ހުނަރުވެރި އަދި ގިނަ ދުވަހު ހިދުމަަތް ކޮށްފައިވާ ބައެކެވެ. ހިތްގައިމު ކުލަތަކުންނާއި މުއްސަނދި ސަބްޖެކްޓްތަކުން ފުރިފައިވާ ކުރެހުންތަކަށް ބަލާލުމުން އެ އާޓިސްޓުންގެ ހުނަރާ މެދު ހައިރާން ވެދާނެ އެވެ. އޭގެ ތެރޭގައި އުމުރުން ވަރަށް ދުވަސްވީ އާޓިސްޓުން ވެސް ހިމެނެ އެވެ. ބައިވެރިވި އާޓިސްޓުންގެ އުމުރުފުރާ ފެށެނީ 1925އިންނެވެ. މައުރަޒުގެ އެންމެ ހަގު އާޓިސްޓަކީ ވެސް 1988ގައި އުފަންވި ހުނަރުވެރިއެކެވެ. އެހެންކަމުން ބެލުންތެރިންނަށް ތަޖުރިބާކާރު އަދި ހުނަރުން ފުރިފައިވާ ކުރެހުންތަކެއް ފެންނާނެކަމާ މެދު ޝައްކެއް ނެތެވެ.

މި މައުރަޒު ކުރިއަށްދާނީ އަންނަ މަހުގެ 3ގެ ނިޔަލަށެވެ. އާޓް ގެލެރީ މާލެ އިން ބުނި ގޮތުގައި މި މުއްދަތުގެ ތެރޭގައި މައުރަޒު ކްރޮސްރޯޑްސް މޯލްޑިވްސްގެ 'ބޮޑުމަސް' ގެލެރީއަށް ބަދަލުވާނެ އެވެ.