ޗާގޯސް އެއްބަސްވުމާ މެދު މޮރިޝަސްގެ އާ ބޮޑުވަޒީރު ނުރުހުން ފާޅުކުރައްވައިފި

ޗާގޯސްގެ ރަށްތަކާ ބެހޭ ގޮތުން އިނގިރޭސިވިލާތުގެ ސަރުކާރާ އެކު މޮރިޝަސްގެ ކުރީގެ ސަރުކާރުން ހެދި އެއްބަސްވުމާ މެދު އިއުތިރާޒު ކުރައްވާ ކަމަށް މޮރިޝަސްގެ އާ ބޮޑުވަޒީރު ވިދާޅުވެއްޖެ އެވެ.

މިދިޔަ މަހު އިނގިރޭސިން ގާއިމު ކުރި އެއްބަސްބުމުގައި ބުނަނީ، އެކަހެރި އެހެން ނަމަވެސް ސްޓްރެޓެޖިކް ގޮތުން މުހިންމު ރަށްތަކުގެ އިސްތިގުލާލު ދޫކޮށްލާނެ ކަމަށެވެ. ނަމަވެސް އިނގިރޭސިވިލާތާއި އެމެރިކާގެ ގުޅިފައިވާ އަސްކަރީ މަރުކަޒެއް ދެމެހެއްޓުމަށް ޑިއޭގޯ ގާސިއާ މަދުވެގެން 99 އަހަރަށް ކުއްޔަށް ދޭނެ އެވެ.

މީގެ 15 ވަރަކަށް ދުވަސް ކުރިން އިންތިހާބުވި، އިންތިހާބީ ބޮޑުވަޒީރު ނަވީންޗަންދުރަ ރާމްގޫލަމް، އެ އެއްބަސްވުމުން ބަދަލުކުރައްވަން ބޭނުންފުޅު ވަނީ ކޮން ބައެއް ކަމެއް އަދި ސީދާ މައްސަލަތަކަކީ ކޮބައި ކަމެއް ވިދާޅެއްް ނުވެ އެވެ. ނަމަވެސް ކެބިނެޓް މިނިސްޓަރަކު ވިދާޅުވީ ކުއްޔަށް ދޫކުރުމުގެ އެއްބަސްވުމުގައި މައްސަލަތަކެއް ހުރި ކަމަށެވެ.

އެމެރިކާގެ އިންތިހާބީ ރައީސް ޑޮނަލްޑް ޓްރަމްޕްގެ ސަރުކާރުގެ ނުރުހުން ވެސް އެކަމާ ކުރިމަތިވެދާނެ އެވެ.

އެމެރިކާގެ ހާރިޖީ ވަޒީރު ކަމަށް ޓްރަމްޕް ކަނޑައެޅުއްވި މާކޯ ރޫބިއޯ ވަނީ އެއީ އެމެރިކާގެ ސަލާމަތަށް އޮތް ނުރައްކަލެއްގެ ގޮތުގައި ސިފަކުރައްވައިފަ އެވެ.

އެ އެއްބަސްވުމުގައި ސޮއިކުރެއްވީ އިނގިރޭސި ބޮޑުވަޒީރު ކެއިރު ސްޓާމާ އާއި މޮރިޝަސްގެ އޭރުގެ ބޮޑުވަޒީރު ޕްރަވިންދް ޖަގްނައުތު އެވެ. މޮރިޝަސްގެ އޭރުގެ ބޮޑުވަޒީރު ވިދާޅުވީ މިއީ "އަޅުގަނޑުމެންގެ ގުޅުމަށް ލިބުނު ވަރަށް ބޮޑު ކުރިއެރުމެއް ކަމަށާއި މިއީ ސުލްހަވެރިކަމާ އެކު މައްސަލަތައް ހައްލުކުރުމަށާއި ގާނޫނީ ވެރިކަމަށް ދެމިއޮންނާނެ ކަމުގެ ރަމްޒެއް" ކަމަށެވެ.

އިނގިރޭސިވިލާތުގެ އިދިކޮޅު ލީޑަރު ކެމީ ބަޑެނޯޗް ތުހުމަތު ކުރެއްވި ގޮތުގައި މަޝްވަރާތައް ކުރިއަށް ގެންދިއުމުގައި "ގައުމީ މަސްލަހަތު ދިފާއު ކުރާނެ ގޮތް" ސަރުކާރަކަށް ނޭނގެ އެވެ.

ޗަގޯސިއަންގެ މަސްލަހަތު ތަމްސީލުކުރާ ބައެއް ޖަމާއަތްތަކުން ވެސް ވަނީ މަޝްވަރާތަކުން އެ މީހުން ބާކީކޮށްފައިވާ ކަމަށް ބުނެ ނުރުހުން ފާޅުކޮށްފަ އެވެ.

އިނގިރޭސިވިލާތުގެ ނޭޝަނަލް ސެކިއުރިޓީ އެޑްވައިޒަރު ޖޮނަތަން ޕަވެލްއާ ހޯމަ ދުވަހު ބައްދަލުކުރެއްވުމަށް ފަހު ބޮޑުވަޒީރު ރާމްގޫލަމް ވަނީ އެއްބަސްވުމާ މެދު ޝައްކު އުފައްދަވައިފަ އެވެ.

"ގާނޫނީ އެޑްވައިޒަރުންގެ ޕެނަލަކާ އެކު ތަފްސީލުތައް ދިރާސާ ކުރުމަށް އިތުރު ވަގުތު ބޭނުންވާ ކަމަށް އަޅުގަނޑު އެ ބޭފުޅުންނަށް އެންގީ،" އޭނާ ވިދާޅުވި އެވެ.

މޮރިޝަސްގެ އާންމު އިންތިހާބުގެ މަހެއްހާ ދުވަސް ކުރިން އެ ތަފްސީލުތައް ފައިނަލްކޮށްފައިވާތީ އޭނާ ހައިރާންކަން ފާޅުކުރެއްވި އެވެ.

ޕަވަލް ވިދާޅުވީ މަޝްވަރާތައް ކުރިއަށް ދާނެ ކަމަށާއި ދެ ހަފުތާގެ ތެރޭގައި މޮރިޝަސްގައި އަލުން ބައްދަލުވުމެއް ބާއްވައި ކުރިއެރުންތައް ރިޕޯޓް ކުރުމަށް ދެ ފަރާތުން ވެސް އެއްބަސްވެފައިވާ ކަމަށެވެ.

އިންތިހާބުގެ ކެމްޕޭނުގައި ރަމްގޫލަމް އާއި ޗޭންޖް ކޯލިޝަންގައި ހިމެނިވަޑައިގަންނަވާ އޭނާގެ ބައިވެރިން ވަނީ އޭރުގެ ބޮޑުވަޒީރު ޖަގްނައުތު "ބޮޑު ގައްދާރުވުމެއް" ހިންގެވި ކަމަށް ތުހުމަތުކޮށް، އެ އެއްބަސްވުމަކީ ވޯޓުގެ ކުރިން ގޮތް ހުސްވެގެން ހަދާފައިވާ "ވިއްކާލުމެއް" ކަމަށް ސިފަކުރައްވާފަ އެވެ.

އެގްރޯ އިންޑަސްޓްރީ އެންޑް ފިޝަރީޒް މިނިސްޓަރުގެ މަގާމަށް އަލަށް އައްޔަންކުރި އަރްވިން ބޫލެލް ހޯމަ ދުވަހު ވަނީ އިއުތިރާޒު ކުރައްވާ ކަންކަމާ ބެހޭ ގޮތުން ވާހަކަ ދައްކަވާފައިވެ އެވެ.

ޑިއޭގޯ ގާސިއާގެ މައްސަލާގައި އިނގިރޭސިވިލާތަށް ދިގު މުއްދަތަކަށް ކުއްޔަށް ދިނުމުން އޭނާ ވަނީ ކުރީގެ ބޮޑުވަޒީރަށް ވަރަށް ބޮޑަށް ފާޑު ވިދާޅުވެފަ އެވެ. އޭނާ ވިދާޅުވީ އެގްރީމަންޓްގައި 99 އަހަރު އޮތް ކަމަށް ޝާއިއު ކުރިއަސް، އަސްލު އެގްރީމަންޓްގައި އޮތީ 200 އަހަރު ކަމަށެވެ.

"އެހެން ގޮތަކަށް ބުނަންޏާ ކުއްޔަށް ހިފާ ފަރާތަކީ ޑިއޭގޯ ގާސިއާގެ 200 އަހަރުގެ ވެރިއަކަށް ވެފައިވޭ،" ނޫހަކަށް ދެއްވި އިންޓަވިއުއެއްގައި އޭނާ ވިދާޅުވި އެވެ.

ބްރިޓިޝް އިންޑިއަން އޯޝަން ޓެރިޓަރީގެ ގޮތުގައި ސިފަކުރާ ޑިއޭގޯ ގާސިއާގެ މައްސަލާގައި އިނގިރޭސިވިލާތަށް ޑިޕްލޮމެޓިކް އެކަހެރިކަން ވަނީ އިތުރުވެފަ އެވެ. އިނގިރޭސިވިލާތުން "އެފްރިކާގެ އެންމެ ފަހު ކޮލޮނީ"ގެ ގޮތުގައި ބަލާ ސަރަހައްދު ދޫކޮށްލުމަށް ވެސް ވަނީ ގޮވާލައިފަ އެވެ.

މޮރިޝަސް ސަރުކާރުން ޒަމާނުއްސުރެ ބުނަމުން އަންނަނީ 1968 ވަނަ އަހަރު އިނގިރޭސިވިލާތުން މިނިވަންވަންވި އިރު ޗާގޯސްގެ ރަށްތައް ދޫކޮށްލަން މަޖުބޫރުކުރީ ގާނޫނާ ހިލާފަށް ކަމަށެވެ.

އޭރު އަސްކަރީ މަރުކަޒެއްގެ ގޮތުގައި ބޭނުންކުރުމަށް ޑިއޭގޯ ގާސިއާ ކުއްޔަށް ދިނުމަށް އެއްބަސްވެ، އިނގިރޭސި ސަރުކާރުން ވަނީ އެމެރިކާއާ އެކު ސިއްރު އެއްބަސްވުމެއް ހަދައިފަ އެވެ.

އިނގިރޭސިވިލާތުން ފަހުން މައާފަށް އެދުނީ ޗާގޯސްގެ ރަށްތަކުން 1،000އަށް ވުރެ ގިނަ ރަށްވެހިން ގަދަކަމުން ބޭރުކޮށްލުމުންނެވެ. ސްޓްރެޓެޖިކް ބޭނުންތަކަށް އެ ރަށްތައް ބޭނުން ނުވާ ހިނދެއްގައި މޮރިޝަސްއާ އެ ރަށްތައް ހަވާލުކުރާނެ ކަމަށް ވައުދުވި އެވެ.

ދާދި ފަހަކާ ޖެހެންދެން ވެސް އިނގިރޭސިވިލާތުން ބުނަމުން އައީ މޮރިޝަސްްއަށް އެ ރަށްތަކުގެ މައްޗަށް ގާނޫނީ ގޮތުން އެއްވެސް ހައްގެއް ނޯންނާނެ ކަމަށެވެ.