ޓްރަމްޕް އޭނާގެ މައްޗަށް ކުރާ ޖިނާއީ ދައުވާ އަޑުއަހަން ކޯޓުގައި.
ޓްރަމްޕްގެ މައްޗަށް ހުކުމް އިއްވުން 3 ވަނަ ފަހަރަށް ފަނޑިޔާރު ފަސްކުރައްވައިފި
އެމެރިކާގެ އިންތިހާބީ ރައީސް ޑޮނަލްޑް ޓްރަމްޕްގެ މައްޗަށް ތާރީހީ ޖިނާއީ މައްސަލައިގެ ހުކުމް އިއްވުން ނިއުޔޯކްގެ ފަނޑިޔާރު އަނެއްކާވެސް އިއްޔެ ފަސް ކުރައްވައިފި އެވެ.
ޓްރަމްޕް ގެންދަވަނީ އެ މައްސަލަ ބޭރުކޮށްލުމަށް ބާރު އަޅުއްވަމުންނެވެ.
މިދިޔަ މެއި މަހުގެ ތެރޭގައި 34 ދައުވާއެއް ސާބިތުވެފައިވާ ޓްރަމްޕްގެ މައްޗަށް ހުކުމް އިއްވަން ހަމަޖެހިފައި އޮތީ މި މަހުގެ 26 ވަނަ ދުވަހު އެވެ. އެއީ އޭނާ ހުވާ ކުރެއްވުމަށް ހަމަޖެހިފައިވާ ތާރީހުގެ ދެ މަހަށް ވުރެ ކުރު މުއްދަތެކެވެ.
އޭނާގެ ވަކީލުން ވިދާޅުވަމުން ގެންދަވަނީ އޭނާގެ މައްޗަށް އިއްވާފައިވާ ހުކުމް ބޭރުކޮށްލަން ޖެހޭ ކަމަށާއި ރިޔާސީ އިމްތިޔާޒު އޭނާއަށް ލިބެން ޖެހޭނެ ކަމަށެވެ. އަދި ހުކުމް އިއްވައިފި ނަމަ ރައީސް ކަމުގެ މަސްއޫލިއްޔަތަށް ހުރަސް އެޅޭނެ ކަމަށް ވެސް ވަކީލުން ވިދާޅުވެ އެވެ.
ޓްރަމްޕްގެ މައްޗަށް ދައުވާ ކުރި މެންހަޓަން ޑިސްޓްރިކްޓް އެޓާނީ ހުކުމް އިއްވުމަށް މަސައްކަތް ކުރަމުން އަންނަ އިރު، ޓްރަމްޕްގެ ދެވަނަ ދައުރަށް ފަހު ދެން އިންތިޒާރު ކުރެވިދާނެ ކަމަށް އޭނާ ވަނީ ލަފާދެއްވާފަ އެވެ.
ޓްރަމްޕްގެ ޓީމުން ވަނީ ތިން ވަނަ ފަހަރަށް ފަސްކުރުމަކީ ކާމިޔާބީއެއް ކަމަށް ސިފަކޮށްފަ އެވެ. އަންނަ މަހު ދެ ފަރާތުން އިތުރު ބަހުސްތަކެއް ލިބެންދެން ފަނޑިޔާރު ހުއާން މަރްޗަން ވަނީ ހުރިހާ މަރުހަލާއެއް މެދުކަނޑުއްވާލައްވައިފަ އެވެ.
ނަމަވެސް ޓްރަމްޕް ހުވާކުރެއްވުމުގެ ރަސްމިއްޔާތު ކުޑަތަންވަމުން އަންނަ އިރު، އެ މައްސަލާގައި ދެން ނިންމާނީ ކޮން ގޮތަކަށްތޯ މިހާރު ވަނީ ބެލެވިފަ އެވެ.
މިދިޔަ މެއި މަހު ނިއުޔޯކްގެ ޖޫރީއަކުން ވަނީ ވިޔަފާރީގެ ރެކޯޑްތައް އޮޅުވާލުމުގެ އެތައް ތުހުމަތެއް ޓްރަމްޕްގެ މައްޗަށް ސާބިތުވާ ކަމަށް ހުކުމްކޮށްފަ އެވެ.
ޓްރަމްޕްގެ މައްޗަށް އެ ދައުވާ އުފުލީ އޭނާއާ އެކު ޖިންސީ ގުޅުން ހިންގި ކަމަށް ބުނާ ވާހަކަތައް ސިއްރު ކުރުމަށް މީހަކަށް ސިއްރުން، އޭނާގެ ވަކީލު މެދުވެރިކޮށް ފައިސާ ދެއްކެވި ޓްރަމްޕް މަސައްކަތް ކުރެއްވުމުންނެވެ.
ޕްރޮސެކިއުޓަރުން ވަނީ އެ ފައިސާ އަކީ އިންތިހާބަށް ނުފޫޒު ފޯރުވުން ދިން ފައިސާއެއް ކަމަށް ބުނެފަ އެވެ. އެކަން ހިނގާފައި ވަނީ 2016 ވަނަ އަހަރުގެ އިންތިހާބުގައި ވޯޓުލުމަަށް މަދު ދުވަސްކޮޅަކަށް ވެފައި ވަނިކޮށެވެ.
ޓްރަމްޕް ގެންދަވަނީ އެއްވެސް ކުށެއް ކޮށްފައި ނުވާ ކަމަށް ވިދާޅުވެ، އެ މައްސަލަ އަކީ ސިޔާސީ މަގްސަދެއްގައި ހިންގާފައިވާ މައްސަލައެއް ކަމަށް ވިދާޅުވެފަ އެވެ. ޓްރަމްޕް ވިދާޅުވަމުން ގެންދަވަނީ އެ އަންހެން މީހާއާ އެކު އޭނާ ޖިންސީ ގުޅުމެއް ހިންގާފައި ނުވާ ކަމަށެވެ.
ޓްރަމްޕް އިންތިހާބުވި ފަހުން އޭނާގެ ވަކީލުން ގެންދަވަނީ ޓްރަމްޕްގެ މައްޗަށް އިއްވާފައިވާ ހުކުމް ސާފުކުރުމަށް އިތުރަށް މަސައްކަތް ކުރަމުންނެވެ.
އެމެރިކާގެ ސުޕްރީމް ކޯޓުން މިދިޔަ ޖުލައި މަހު ކުރި ހުކުމުގައި ބުނެފައި ވަނީ މަގާމުގައި ހުންނަވައިގެން ހިންގާ ބައެއް ރަސްމީ އަމަލުތަކަށް ޖިނާއީ ދައުވާ ނުހިންގުމުގެ އިމްތިޔާޒު ރައީސުންނަށް ލިބިގެންވާ ކަމަށެވެ.
އެ ހުކުމަކީ ޓްރަމްޕް އިންތިހާބަށް ނުފޫޒު ފޯރުވުމުގެ މައްސަލައާ ގުޅިގެން އުފެދުނު ހަނގުރާމައެކެވެ.
ނަމަވެސް ޓްރަމްޕްގެ ނިއުޔޯކްގެ ޖިނާއީ ޝަރީއަތުގައި އޭނާގެ ވަކީލުން ވިދާޅުވަނީ އެ ހިމާޔަތްތައް މި މައްސަލައަށް ވެސް ލިބެން ޖެހޭނެ ކަމަށެވެ.
ހުކުމް އިއްވުން ފުރަތަމަ ފަސް ކުރީ އިންތިހާބު ނިމެންދެކަށެވެ. މި މަހުގެ 5 ވަނަ ދުވަހު ޓްރަމްޕް ވަނީ އެ އިންތިހާބު ކާމިޔާބު ކުރައްވައިފަ އެވެ.
ޓްރަމްޕްގެ ގާނޫނީ ވަކީލު ވަނީ "މި މައްސަލަ ވަގުތުން ބޭރުކޮށްލަން" ގޮވާލައްވައިފަ އެވެ. އޭނާ ވިދާޅުވި ގޮތުގައި، އެމެރިކާގެ ގާނޫނުއަސާސީ އާއި ޕްރެޒިޑެންޝަލް ޓްރާންސިޝަން ގާނޫނުގައި އެފަދަ ނަތީޖާއެއް ނެރެން ޖާގަ ލިބޭ ކަމަށް އޭނާ ވިދާޅުވެ އެވެ.
ނަމަވެސް މި ހަފުތާގައި މެންހަޓަންގެ ޑިސްޓްރިކްޓް އެޓާނީ ވަނީ އެ ވާހަކައަށް ގޮންޖައްސަވައި ހުކުމް ބާތިލު ކުރުމާ ދެކޮޅު ކަމަށް ވިދާޅުވެފަ އެވެ. ނަމަވެސް ދުސްތޫރީ ގޮތުން ކުރިން ނުފެންނަ ފަދަ މައްސަލަތައް ވެސް ގަބޫލުކުރައްވައި، 2029 ވަނަ އަހަރު ޓްރަމްޕްގެ ވެރިކަން ނިމުމަށް ފަހު، ހުކުމް އިއްވަން އިންތިޒާރު ކުރެއްވޭނެ ކަމުގެ ވިސްނުން ވެސް އޭނާ ގެންގުޅުއްވި އެވެ.
މިއަދު ފަނޑިޔާރު ޓްރަމްޕްގެ ވަކީލުންނަށް އެންގެވީ އެ މީހުން އެ މައްސަލަ ބޭރުކޮށްލުމަށް ދެކޭ ދެކުން ބަޔާންކޮށް އަންނަ މަހުގެ 2 ވަނަ ދުވަހުގެ ކުރިން އެ ކޯޓަށް ހުށަހެޅުމަށެވެ.
ކޮމެންޓް