ޗައިނާގެ ޒުހާއީގައި ބޭއްވި 2024 ވަނަ އަހަރުގެ ޗައިނާ އިންޓަނޭޝަނަލް އޭވިއޭޝަން އެންޑް އެއަރޯސްޕޭސް އެގްޒިބިޝަންގައި ޗައިނާގެ އާ ޖޭ-35އޭ ސްޓެލްތް ފައިޓަރގެ މޮޑެލެއް ބެހެއްޓިފައި.
ޒުހާއީ އެއާޝޯގައި ޗައިނާގެ އެންމެ ފަހުގެ ސްޓެލްތް ފައިޓާ ޖެޓް ދައްކާލައިފި
ޗައިނާއިން ވަނީ އެ ގައުމުގެ އެންމެ ފަހުގެ ސްޓެލްތް ފައިޓާ ޖެޓް، އެގައުމުގެ ދެކުނުގައި ބޭއްވި އެއާ ޝޯއެއްގައި ދައްކާލައިފަ އެވެ.
ގުއަންޑޮންގް ޕްރޮވިންސްގެ ޒުހާއީގައި އަންގާރަ ދުވަހު ފެށި އެއާޝޯ ގައި، 130 އަށްވުރެ ގިނަ މަތިންދާބޯޓު ދެއްކި އެވެ. މީގެ ތެރޭގައި ހިމެނެނީ އަސްކަރީ މަތިންދާބޯޓުތަކާއި، ޑްރޯންތަކާއި، އަދި މަދަނީ މަތިންދާބޯޓުތަކެވެ.
ޖޭ-35އޭ ގެ ނަމުގައި ތައާރަފުކުރި އާ މަތިންދާބޯޓަކީ މެދު ސައިޒުގެ މަލްޓި-ރޯލް ސްޓެލްތް ފައިޓާ ޖެޓެކެވެ. މި ޖެޓުގެ ދަތުރެއް މަދު މިނެޓުތަކަކަށް އާންމުންނަށް ދައްކާލި އެވެ. އެމެރިކާގެ އެފް-35 އާ އެއްގޮތް ޑިޒައިނެއް މި ޖެޓުގައި ހުރިކަން ފާހަގަކުރެވެ އެވެ.
ޕީޕަލްސް ލިބަރޭޝަން އާމީ އެއާފޯސް (ޕީއެލްއޭއެފް)ގެ މިލިޓަރީ އެކްސްޕާޓް ވަންގް މިންގްޒީ ބުނާގޮތުގައި މި ދެ މޮޑެލްގެ ސަބަބުން "އެންމެ ނުރައްކާތެރި އަދި ވާދަވެރި މާހައުލުތަކުގައި ހަމަލާދިނުމުގެ" ގާބިލުކަން އިތުރުވެގެންދާނެ އެވެ.
އެއާޝޯގައި ފުރަތަމަ ފަހަރަށް ވަކި ސަރަހައްދެއް ޑްރޯންތަކަށް ޚާއްސަކޮށްފައިވެ އެވެ. މީގެ ތެރޭގައި އެސްއެސް-ޔޫއޭވީ ހިމެނެ އެވެ. މިއީ އިންޓެލިޖެންސް ހޯދުމަށާއި ހަމަލާދިނުމަށް ބޭނުންކުރާ ކުދި ޑްރޯންތައް ވަރަށް އަވަހަށް ދޫކޮށްލެވޭ ބޮޑު "މަދާޝިޕް" އެކެވެ.
މި އަހަރުގެ އޮކްޓޯބަރުގައި، ރަޝިއާއިން ޔުކްރެއިންގައި ބޭނުންކުރާ ޑްރޯންތައް އުފައްދާ ޗައިނާގެ ކުންފުނިތަކަށް އަމާޒުކޮށް އެމެރިކާއިން ދަނީ ފިޔަވަޅުތައް އަޅަމުންނެވެ. ރަޝިއާއިން ޔުކްރެއިންއަށް ހަމަލާދިން ފަހުން، ބީޖިންގ އާއި މޮސްކޯގެ އަސްކަރީ އަދި ދިފާއީ ގުޅުން ވަރުގަދަވެފައިވެ އެވެ.
މިއަހަރުގެ އެއާޝޯގެ އަމާޒަކީ އަސްކަރީ ދާއިރާ އެވެ. މިއީ ޕީއެލްއޭއެފްގެ 75 ވަނަ އަހަރީ ދުވަހާ ދިމާވާތީ އެވެ. ނަމަވެސް ޗައިނާގެ ސްޕޭސް އިންޑަސްޓްރީގެ ތަރައްގީތައްވެސް މި އެއާޝޯގައި ދައްކާލި އެވެ.
ހައޯލޫންގް ނަމަކަށް ކިޔާ ސްޕޭސް ކާގޯ ޝަޓްލްއެއްގެ މޮޑެލްވެސް މި އެއާޝޯގައި ފުރަތަމަ ފަހަރަށް ދައްކާލެވޭނެކަމަށް ޒިންހުއާ ނިއުސް އެޖެންސީން ވަނީ ރިޕޯޓުކޮށްފައެވެ. މި ޝަޓްލް ފަރުމާކޮށްފައިވަނީ ވިޔަފާރި ރޮކެޓެއްގައި ދަތުރުކޮށް، ޗައިނާގެ ސްޕޭސް ސްޓޭޝަން ޓިއަންގޮންގްއާ ގުޅުމަށެވެ.
ވޭތުވެދިޔަ 10 އަހަރު ތެރޭގައި ޗައިނާއިން ވަނީ ސްޕޭސް ޕްރޮގްރާމަށް ގިނަ ހޭދައެއް ކޮށް، ސްޕޭސް ދާއިރާގެ ބާރުވެރިން ކަމުގައިވާ އެމެރިކާ އަދި ރަޝިއާއާ އެއް ހަމައަކަށް ދިއުމަށް މަސައްކަތްކޮށްފަ އެވެ.
ޖޭ-35އޭ ސްޓެލްތް ފައިޓަރ ޖެޓުގެ މައިގަނޑު ސިފަތައް:
މައިގަނޑު ޓެކްނިކަލް ސިފަތައް:
-
ވަރުގަދަކުރެވިފައިވާ ސްޓެލްތް ޓެކްނޮލޮޖީ
-
އިންފޮމޭޝަން ޓެކްނޮލޮޖީއަށް ބަރޯސާވުން
-
ނެޓްވަރކް އިންޓެގްރޭޝަން
-
އިންޓެލިޖެންސް ގާބިލުކަން
-
އާ ޓެކްނޮލޮޖީތަކާއި ސިސްޓަމްތައް ބޭނުންކޮށްފައި
އޮޕަރޭޝަނަލް ގާބިލުކަން:
-
މަތީގެ ވެރިކަން ހޯދައި، ދެމެހެއްޓުން
-
4 ވަނަ އަދި 5 ވަނަ ޖެނެރޭޝަންގެ ދުޝްމަނުންގެ ފައިޓަރ ޖެޓުތައް ނައްތާލުން
-
ބިމުން/ކަނޑުން ދިފާއީ ބާރުތަކަށް ހަމަލާދިނުން
-
ފައިޓަރ، ބޮމަރު އަދި ކްރޫޒް މިސައިލްތައް ހިމެނޭ ގޮތަށް ދުޝްމަނުންގެ މަތިންދާ ލަނޑުދަނޑިތައް އިންޓަރސެޕްޓްކުރުން
ކޮމްބެޓް ޓެކްނޮލޮޖީ:
-
ދުޝްމަނުންނަށް ފެނުމުގެ ކުރިން ހަރަކާތްތެރިވުމުގެ ގާބިލުކަން
-
އެޑްވާންސްޑް ކޯޑިނޭޓެޑް ފޮމޭޝަން ޓެކްޓިކްސް
-
އަވަސް އަދި ސްޓޭބަލް ކިލްޗެއިން ގާއިމުކުރުން
-
ސަރވިސް-ކްރޮސް ޖޮއިންޓް އޮޕަރޭޝަންސްގެ ގާބިލުކަން
އިތުރު ސިފަތައް:
-
"ވަން ޕްލެޓްފޯމް، މަލްޓިޕަލް ޓައިޕްސް" އުސޫލުން ފަރުމާކުރެވިފައި
-
"އެއަރ-ސީ ޑުއަލް ޑިޕްލޯއިމަންޓް" އުސޫލު ބޭނުންކުރެވިފައި
-
ޖޭ-35 ކެރިއަރ-ބޭސްޑް މޮޑެލްއާއެކު ޕްލެޓްފޯމް ޝެއަރކުރޭ
-
އުފެއްދުމުގެ އަގު ކުޑަކުރުމަށް ޓެކްނޮލޮޖީ ރީޔޫސް ކުރެވިފައި
-
އިންފޮމޭޝަން ވޯފެއަރ، ކޮލަބޮރޭޓިވް އޮޕަރޭޝަންސް އަދި މަލްޓި-ޑޮމެއިން ކޮމްބެޓަށް އިސްކަންދޭ
އެސްއެސް-ޔޫއޭވީ: ޗައިނާގެ އެންމެ ފަހުގެ އަސްކަރީ ޑްރޯން
އެސްއެސް-ޔޫއޭވީ ނުވަތަ ޗައިނާގެ ބަހުން "ޖިއުޓިއަން" އަކީ 2024 ވަނަ އަހަރުގެ ނޮވެންބަރު މަހު ޒުހާއީ އެއަރޝޯގައި ދައްކާލި، ޗައިނާގެ އެންމެ ފަހުގެ އަންމޭންޑް އޭރިއަލް ވެހިކަލް (ޔޫއޭވީ) ޓެކްނޮލޮޖީ އެވެ. އޭވިއޭޝަން އިންޑަސްޓްރީ ކޯޕަރޭޝަން އޮފް ޗައިނާ (އޭވީއައިސީ) އިން ތައްޔާރުކޮށްފައިވާ މި 10 ޓަނުގެ ޔޫއޭވީ ފަރުމާކޮށްފައިވަނީ އިންޓެލިޖެންސް ހޯދުމާއި ހަމަލާދިނުމުގެ މިޝަންތަކަށެވެ. މިއީ އެމެރިކާގެ އާރްކިއު-4 ގްލޯބަލް ހޯކް އަދި އެމްކިއު-9 ރީޕަރ ފަދަ ޑްރޯންތަކާ ވާދަކުރެވޭނެ އުޅަނދެއްގެ ގޮތުގައި ބެލެވެ އެވެ.
ޑިޒައިން އަދި ސިފަތައް:
-
ކޮންފިގަރޭޝަން: އެސްއެސް-ޔޫއޭވީގެ ޖެޓް އިންޖީނު ހަރުކޮށްފައިވަނީ މައި ފިޔުޒިލާޖުގެ މަތީގަ އެވެ. މީގެ އިތުރުން ޓްރައިސައިކަލް ލޭންޑިންގ ގިއަރ ސިސްޓަމެއް ބޭނުންކުރެ އެވެ. މި ޑިޒައިންގެ ސަބަބުން އުޅަނދުން ފެންނަ ހީޓް ސިގްނޭޗަރ ކުޑަވެ، ފޮރުވިގެންވާ މިންވަރު އިތުރުވެ އެވެ.
-
ޕޭލޯޑް ކެޕޭސިޓީ: މި ޔޫއޭވީގައި "އައިސޮމަރިޒަމް ހައިވް މޮޑިއުލް" އެއް ހަރުކޮށްފައިވެ އެވެ. މިއީ އުދުހުމުގެ ތެރޭގައި އެތައް ޑްރޯނެއް ދޫކޮށްލެވޭ ގޮތަށް ހުރި ސިސްޓަމެކެވެ.
-
ސްޓެލްތް ސިފަތައް: ރާޑާ އަދި އިންފްރާރެޑް ޑިޓެކްޝަން ވީހާވެސް ކުޑަކުރުމަށް މަސައްކަތްކޮށްފައިވާ ޑިޒައިނެކެވެ. މީގެ ސަބަބުން ނުރައްކާތެރި މާހައުލުތަކުގައި ހަރަކާތްތެރިވުމުގެ ގާބިލުކަން ލިބިގެންދެއެވެ.
އޮޕަރޭޝަނަލް ގާބިލުކަން:
-
ރިކޮނިސަންސް: މަތީ އުސްމިނުގައި، ދިގު މުއްދަތަކަށް ސަރވެއިލަންސް މިޝަންތައް ހިންގުމަށް އެޑްވާންސްޑް ސެންސަރތަކެއް ހަރުކޮށްފައިވެ އެވެ. މީގެ ސަބަބުން ފުޅާ ސަރަހައްދަކުން ވަހުތުން އިންޓެލިޖެންސް ލިބެ އެވެ.
-
ހަމަލާގެ މިޝަންތައް: ބިމުގައި ހުންނަ ލަނޑުދަނޑިތަކަށް ޕްރެސިޝަން ހަމަލާ ދިނުމަށް އެކި ބާވަތުގެ ހަތިޔާރު އުފުލޭ ގޮތަށް ފަރުމާކޮށްފައިވެ އެވެ.
-
ސްވާމް ޑިޕްލޯއިމަންޓް: "އައިސޮމަރިޒަމް ހައިވް މޮޑިއުލް" ގެ ސަބަބުން ޑްރޯން ސްވާމްތައް ދޫކޮށްލައި ކޮންޓްރޯލްކުރެވޭނެ އެވެ.
ސްޓްރެޓެޖިކް މުހިންމުކަން:
-
އެސްއެސް-ޔޫއޭވީ ތައާރަފުކުރުމުން ދައްކުވައިދެނީ ޗައިނާއިން ޔޫއޭވީ ޓެކްނޮލޮޖީ ކުރިއެރުވުމަށް ކުރާ މަސައްކަތެވެ. މިގޮތުން އެމެރިކާގެ އާރްކިއު-4 ގްލޯބަލް ހޯކް އަދި އެމްކިއު-9 ރީޕަރ ފަދަ އުޅަނދުތަކާ އެއްހަމައެއްގައި ނުވަތަ އެއަށްވުރެ މަތީ ފެންވަރެއްގައި ހުރުމަށް އަމާޒުކުރެވެ އެވެ. ސްވާމް ޑިޕްލޯއިމަންޓުގެ ގާބިލުކަމަކީ އަންމޭންޑް ހަނގުރާމައިގެ މުހިންމު ތަރައްގީއެކެވެ. މިއީ އޮޓޮނޮމަސް އަދި ނެޓްވަރކްކުރެވިފައިވާ ކޮމްބެޓް ސިސްޓަމްތަކަށް ބަދަލުވަމުންދާކަން ދައްކުވައިދޭ ކަމެކެވެ.
ކޮމެންޓް