އިންޑިއާގައި ބަހެއް ފުރޮޅާލައި 36 މީހަކު މަރުވެއްޖެ

އިންޑިއާގެ އުތުރުގެ އުއްތަރަކާންދުގައި ބަހެއް ފުރޮޅާލައި 27 މީހަކު ޒަހަމުވެ، 36 މީހަކު މަރުވެވެއްޖެ އެވެ.

އިންޑިއާގެ އޮފިޝަލުން ވިދާޅުވި ގޮތުގައި، ޑްރައިވަރަށް ބަހުގެ ކޮންޓްރޯލް ގެއްލުނު އިރު ބަހުގައި 44 މީހުން ތިއްބެވެ. ބަސް ވެއްޓުނީ 50 ފޫޓު ފުން ވަޅުގަނޑަކަށެވެ.

މި އެކްސިޑެންޓްގެ ތަހުގީގެއް ހިންގުމަށް ސްޓޭޓް ސަރުކާރުން ވަނީ އަންގައިފަ އެވެ.

ހިމާލިޔާ ސްޓޭޓްގައި ދަތުރުފަތުރުގެ މައިގަނޑު ވަސީލަތަކީ ބަހެވެ. އެކްސިޑެންޓްތަކަކީ އާންމު ކަމެއް ނޫނެވެ. 

އިއްޔެ ހެނދުނު އެ އެކްސިޑެންޓް ހިނގި އިރު ބަސް ދަތުރު ކުރަމުން ދިޔައީ އެ ސްޓޭޓްގެ ރާމްނަގަރް އަވަށުންނެވެ.

ފޮޓޯތަކާއި ވީޑިއޯތަކުން ފެންނަ ގޮތުގައި ބަސް ވަނީ އެކޮޅުކޮޅުން ވެެއްޓި ވަރަށް ބޮޑަށް ހަލާކުވެފަ އެވެ.

އެ ހާދިސާގައި ވަގުތުން ގިނަ އަދަދެއްގެ ބަޔަކު ވަނީ މަރުވެފަ އެވެ. އަދި ޒަހަމުވި މީހުން ވަނީ ކައިރީގައި ހުރި ހޮސްޕިޓަލްތަކަށް ގެންގޮސްފަ އެވެ. 

އިންޑިއާގެ ބޮޑުވަޒީރު ނަރެންދުރަ މޯދީ ވަނީ އެ ހާދިސާގައި މަރުވި މީހުންގެ އާއިލާތަކަށް ތައުޒިޔާ ވިދާޅުވެފަ އެވެ. އޭނާ ވަނީ މަރުވި މީހުންގެ އާއިލާތަކަށް 2،378 ޑޮލަރު އަދި ޒަހަމްވި މީހުންނަށް 600 ޑޮލަރު ދޭން ނިންމައިފަ އެވެ.

އުއްތަރަކަންދުގެ ޗީފް މިނިސްޓަރު ޕުޝްކަރް ސިންގް ދަމީ ވެސް ވަނީ އެ ހާދިސާގައި މަރުވި މީހުންނާއި އެ މީހުންގެ އާއިލާތަކަށް މާލީ އެހީތެރިކަން ފޯރުކޮށްދިނުމަށް ނިންމައިފަ އެވެ.

ބަހަކީ އިންޑިއާގައި ހާއްސަކޮށް ކުދި އަވަށްތަކާއި ޑިސްޓްރިކްޓްތަކުގެ މެދުގައި ދަތުރުފަތުރުގެ އާންމު ވަސީލަތެކެވެ. ނަމަވެސް އޮޕަރޭޓަރުން ގިނަ ފަހަރަށް ސަލާމަތީ ގަވާއިދުތަކާ ހިލާފުވެ ކެޕޭސިޓީއަށް ވުރެ އިތުރަށް މީހުން އަރުވައިގެން ދަތުރު ކުރެ އެވެ.

އިންޑިއާގައި ކޮންމެ އަހަރަކު ގާތްގަނޑަކަށް 160،000 މީހުން މަގުމަތީގެ އެކްސިޑެންޓްތަކުގައި މަރުވެ އެވެ. މައިގަނޑު ގޮތެއްގައި ގިނަ ބަޔަކު މަރުވަނީ ބާރު ސްޕީޑުގައި ދުއްވުމާއި ފަރުވާކުޑަކޮށް ދުއްވުމުގެ ސަބަބުންނެވެ.