ހަސީނާ ބޮޑުވަޒީރު ކަމުން އިސްތިއުފާ ދެއްވި ކަމުގެ އެއްވެސް ލިއެކިއުމުގެ ހެއްކެއް ނެތް: ބަންގްލަދޭޝްގެ ރައީސް

މިދިޔަ އޮގަސްޓް މަހު އިސްތިއުފާ ދެއްވައި އިންޑިއާއަށް ފިއްލެވި ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވި ކަމުގެ އެއްވެސް ޑޮކިއުމެންޓަރީ ހެއްކެއް ނެތް ކަމަށް ބަންގްލަދޭޝްގެ ރައީސް މުހައްމަދު ޝަހާބުއްދީން ވިދާޅުވެއްޖެ އެވެ.

ބަންގްލަދޭޝްގެ ބޮޑުވަޒީރު ހަސީނާ މިދިޔަ 5 އޮގަސްޓްގައި ފިއްލަވައިގެން އިންޑިއާއަށް ވަޑައިގަތުމުން ބަންގްލަދޭޝްގެ އިންތިގާލީ ސަރުކާރުގެ ޗީފް އެޑްވައިޒަރުގެ މަގާމަށް ސުލްހައިގެ އިނާމު ހާސިލު ކުރައްވާފައިވާ މުހައްމަދު ޔޫނުސް ،84، ހަމަޖެއްސެވީ މިދިޔަ 8 އޮގަސްޓްގަ އެވެ.

ޝަހާބުއްދީން ބަންގުލާދޭޝްގެ ނޫހަކަށް ދެއްވި އިންޓަވިއުއެއްގައި ވިދާޅުވީ ބަންގްލަދޭޝް އިން ފިއްލެވުމުގެ ކުރިން ހަސީނާ ބޮޑުވަޒީރު ކަމުން އިސްތިއުފާ ދެއްވި ކަމުގެ އަޑު އިވިވަޑައިގަތް ކަމަށާއި ނަމަވެސް އޭނާގެ އަތްޕުޅުގައި އެ ކަމަނާ އިސްތިއުފާ ދެއްވި ކަމުގެ އެއްވެސް ލިއުމެއް ނެތް ކަމަށެވެ. 

އޭނާ ވިދާޅުވީ ވަރަށް މަސައްކަތް ކުރެވިއްޖެ ކަމަށާއި ނަމަވެސް ބޮޑުވަޒީރު ހަސީނާގެ އިސްތިއުފާއާ ގުޅޭ އެއްވެސް ލިޔެކިޔުމެއް ފެނިފައި ނުވާ ކަމަށެވެ.

"ފަހަރެއްގައި އެކަމަނާއަށް ވަގުތު ނުލިބުނީ ކަމަށް ވެދާނެ،" ޝަހާބުއްދީން ވިދާޅުވި އެވެ.

ހަސީނާ ފިއްލެވި ދުވަހުގެ ހާދިސާއަށް އިޝާރާތް ކުރައްވައި ޝަހާބުއްދީން ވިދާޅުވީ އެ ދުވަހުގެ ހެނދުނު 10:30 އެހާކަންހާ އިރު ހަސީނާގެ ގެއިން ބަންގަބާނަށް ކޯލެއް އައިސް ހަސީނާ އޭނާއާ ބައްދަލުކުރައްވާނެ ކަން އެންގެވި ކަމަށެވެ. ނަމަވެސް އޭގެ ގަޑިއެއްހާ އިރު ފަހުން އިތުރު ކޯލެއް އައީ ހަސީނާ ވަޑައިނުގަންނަވާނެ ކަމަށް ބުނެ ކަމަށެވެ. 

"ހުރިހާ ދިމާލަކުން ވެސް ނުތަނަވަސްކަމުގެ ހަބަރު ލިބެމުން ދިޔައީ. އަޅުގަނޑުމެން ވެސް ޓީވީން ހަބަރުތައް ބަލަމުންދިޔައީ. ކުއްލިއަކަށް އަޅުގަނޑަށް އިވިގެން ދިޔައީ އެކަމަނާ [ހަސީނާ] އަޅުގަނޑަށް އެންގުމަކާ ނުލައި ގައުމު ދޫކޮށް ވަޑައިގެންނެވި ވާހަކަ. މިއީ ހަމަ ތެދު،" ރައީސް ވިދާޅުވި އެވެ.

"އަސްކަރިއްޔާގެ ވެރިޔާ ޖެނެރަލް ވޭކަރު ބަންގަބާނަށް ވަޑައިގަތުމުން އަޅުގަނޑު މަސައްކަތް ކުރީ ބޮޑުވަޒީރު އިސްތިއުފާ ދެއްވިތޯ ސާފުކުރަން،"

ރައީސް ވިދާޅުވީ ޖަވާބަކަށް އައީ ބޮޑުވަޒީރު އިސްތިއުފާ ދެއްވި ކަމަށާއި ނަމަވެސް އެ ބޭފުޅުންނަށް އެންގެވުމަށް ވަގުތު ނުވީ ކަމަށެވެ.

"ހުރިހާ ކަމެއް ކޮންޓްރޯލު ވުމުން، އެއް ދުވަހަކު ކެބިނެޓް ސެކްރެޓަރީ އައީ އިސްތިއުފާގެ ސިޓީގެ ކޮޕީއެއް ހޯދަން. އަޅުގަނޑު ދެންނެވީ އަޅުގަނޑު ވެސް ވެސް މި ހޯދަނީ އެ ސިޓީ ކަމަށް،" ޝަހާބުއްދީން ވިދާޅުވި އެވެ.

ގާނޫނީ ލަފާ ދެއްވާ މުސީރު ޑރ. އާސިފް ނަޒްރުލް ވިދާޅުވީ ގާތްގަނޑަކަށް ދޮޅު މަހެއްހާ ދުވަސް ފަހުން، ކުރީގެ ބޮޑުވަޒީރު އިސްތިއުފާގެ ސިޓީ ހުށަހަޅުއްވާފައި ނުވާ ކަމަށް ރައީސް ވިދާޅުވާ ނަމަ، އެއީ އަމިއްލަ ނަފްސަށް ދެކޮޅު ހެދުމުގެ  ކަމެއް ކަމަށެވެ.

ނޫސްވެރިންގެ ސުވާލުތަކަށް ޖަވާބު ދެއްވަމުން 5 އޮގަސްޓްގައި ރައީސް އަމިއްލަފުޅަށް ވިދާޅުވެފައި ވަނީ ހަސީނާގެ އިސްތިއުފާގެ ސިޓީ ލިބިވަޑައިގެންނެވި ކަމަށާއި އެ އިސްތިއުފާ ގަބޫލުކުރެއްވި ކަމަށެވެ.