ޖިމީ ކާޓާއަށް 100 އަހަރު ފުރިއްޖެ؛ އެމެރިކާގެ އެންމެ އުމުރު ދިގު ރައީސް

އެމެރިކާގެ 39 ވަނަ ރައީސް ޖިމީ ކާޓާގެ އުމުރުފުޅުން 100 އަހަރު މިއަދު ފުރިއްޖެ އެވެ. އެ މަނިކުފާނުވެފައި ވަނީ މިހާ ދިގު އުމުރަކަށް ދުނިޔޭގައި ހުންނެވި އެމެރިކާގެ ފުރަތަމަ ރައީސްއަށެވެ. 

އެމެރިކާގެ ފިރިހެނުން ދިރިހުންނަ އެވްރެޖް އުމުރު ނުވަތަ ލައިފް އެކްސްޕެކްޓެންސީއަކީ 74.8 އަހަރެވެ. 

އެމެރިކާގެ ރައީސްކަން 1977 އިން 1981އަށް ކުރެއްވި ޑިމޮކްރެޓިކް ޕާޓީއަށް ނިސްބަތްވާ ރައީސް ކާޓާ މިދިޔަ 19 މަސް ދުވަހު ހޭދަކުރައްވަމުން ގެންދަވަނީ އެ މަނިކުފާނުގެ އުފަން ޖޯޖިއާ ސްޓޭޓުގެ ޕްލެއިންސް ސިޓީގައި ހުންނަ އެ މަނިކުފާނުގެ އަމިއްލަފުޅު ގެކޮޅުގަ އެވެ. ކާޓާގެ އާއިލާއިން ބުނާ ގޮތުގައި ސިކުނޑީގެ ކެންސަރުގެ އާލާސްކަންފުޅާހުރެ އެ މަނިކުފާނު އެނދުމަތީގައި އޮންނަވަން ޖެހިވަޑައިގެން ނަމަވެސް ވާހަކަފުޅު ދައްކަވައި ހަރަކާތްކުރައްވައި ހައްދަވަ އެވެ. 

ރިޔާސީ ދައުރު ފުރިހަމަކުރެއްވުމަށް ފަހު މުޖުތަމައަށް ހިދުމަތް ކުރެއްވުމުގައި 40 އަހަރު ކާޓާ މަސައްކަތްކުރެއްވި ހިލޭ ސާބަހަށް މަސައްކަތްކުރާ ޖަމްއިއްޔާއެއް ކަމަށްވާ "ހެބިޓެޓް ފޯ ހިއުމޭނިޓީ"ން ވަނީ އެ މަނިކުފާނުގެ އުފަންދުވަސް ފާހަގަކުރުމުގެ ގޮތުން ގެދޮރު ނެތް މީހުންނަށް 30ގެ އިމާރާތްކޮށްދިނުމަށް ނިންމައިފަ އެވެ. މީގެ އިތުރަށް އެ މަނިކުފާނުގެ އުފަންދުވަސް ފާހަގަކުރަން އެކި ހަފްލާތައް އަންނަނީ ބާއްވަމުންނެވެ. އަދި އެމެރިކާގެ ކުރީގެ ރައީސުންނާއި މިހާރުގެ ރައީސް ޖޯ ބައިޑެން ވެސް ވަނީ ކާޓާއަށް އުފަންދުވަހުގެ ތަހުނިޔާ ފޮނުއްވައިފަ އެވެ. 

ޕީނަޓް ހައްދާ ދަނޑުވެރިއެއްގެ ގޮތުގައި މަސައްކަތްކުރައްވަމުން ގެންދެވި ކާޓާ ސިޔާސީ މައިދާނަށް ނިކުންނެވީ ސްޓޭޓް ސެނެޓަރެއްގެ ގޮތުގައި 1960ގެ އަހަރުތަކުގަ އެވެ. އޭނާ ރިޔާސީ ދެވަނަ ދައުރަކަށް ވާދަކުރެއްވި ނަމަވެސް ނާކާމިޔާބާ ކުރިމަތިވެ ވަޑައިގަތެވެ. އެއަށް ފަހު، ކާޓާ ގެންދެވީ ގެދޮރުނެތް މީހުންނަށް ގެދޮރު ބިނާކޮށްދެއްވުމާއި އެމެރިކާގެ ފަރާތުން ކިއުބާ އާއި މެދުއިރުމަތީގެ މައްސަތަކުގައި ސުލްހައިގެ މަންދޫބެއްގެ ގޮތުން މަސައްކަތްކުރައްވަމުންނެވެ. އަދި ސްކޫލްތަކާއި ކޮލެޖްތަކުގައި ކިޔަވައިދެއްވައި ފޮތް ލިއުއްވާ ހެއްދެވި އެވެ. އޭނާއަށް ނޯބަލް ސުލްހައިގެ އިނާމުގެ އިތުރުން ގްރެމީ އެވޯޑް ވެސް ލިބިވަޑައިގެންފައިވެ އެވެ.