ސިންގަޕޫރުގެ ކުރީގެ މިނިސްޓަރުގެ މައްޗަށް ކޮރަޕްޝަންގެ ކުށް ސާބިތުވެއްޖެ

ސިންގަޕޫރުގެ ކުރީގެ ޓްރާންސްޕޯޓް މިނިސްޓަރު އެ މަގާމުގައި ހުންނަވައިގެން ހަދިޔާ ހޯއްދެވި ކަމުގެ ކުށް އޭނާގެ މައްޗަށް މިއަދު ސާބިތުވެއްޖެ އެވެ.

އޭނާ ވަނީ ކޯޓުގައި އޭނާގެ ކުށަށް އިއުތިރާފުވެފަ އެވެ.

ސުބްރަމާނިއަމް އިސްވަރަން، 62،ގެ މައްޗަށް ދައުލަތުން ފުރަތަމަ އުފުލީ ކޮރަޕްޝަންގެ ދައުވާ އެވެ. ނަމަވެސް މިއަދު ފަށަން އޮތް ޝަރީއަތުގެ ކުރިން ޕްރޮސެކިއުޓަރުން ވަނީ އެ ދައުވާތަކަށް އިސްލާހު ގެނެސްފަ އެވެ.

ދައުލަތުގެ އޮފިޝަލަކާ ގުޅޭ ކޮރަޕްޝަންގެ މައްސަލައެއް ވަރަށް މަދުން ނޫނީ ސިންގަޕޫރުގައި ނުހިނގަ އެވެ. މާލީ ހަބެއްގެ ގޮތުގައި އަދި ސާފު ތަސައްވުރާ އެކު ފަހުރުވެރިވާ ގައުމަށް އިސްވަރަންގެ މައްސަލަ ވަނީ ބޮޑު ގައުމީ މައްސަލައަކަށް ވެފަ އެވެ.

ހަދިޔާ ލިބުމުގެ ކޮންމެ ތުހުމަތަކަށް އިސްވަރަން މިހާރު ޖޫރިމަނާ ނުވަތަ ދެ އަހަރާ ހަމައަށް ޖަލަށް ލާން ޖެހެ އެވެ.

އިސްވަރަން އަކީ ފާއިތުވި 50 އަހަރުގެ ތެރޭގައި ސިންގަޕޫރު ކޯޓެއްގެ ދައުލަތުގެ އޮފިޝަލެއްގެ މައްޗަށް ޝަރީއަތް ހިންގި ފުރަތަމަ ސިޔާސީ ބޭފުޅާ އެވެ.

އޭނާ އެންމެ ބޮޑަށް މަޝްހޫރުވެފައިވަނީ ސިންގަޕޫރުގައި ފޯމިއުލާ 1 ގްރޭންޑް ޕްރީ ގެނައުމުގައި އަދާކުރެއްވި ދައުރަށެވެ. 

ދައުވާގައި ބުނެފައިވަނީ އޭނާއަށް 403،000 އެމެރިކާ ޑޮލަރަށް ވުރެ ގިނަ އަދަދެއްގެ ފްލައިޓް، ހޮޓެލްގައި ހުރުން، މިއުޒިކަލް އަދި ގްރޭންޑް ޕްރީ ޓިކެޓް ހަދިޔާކޮށްފައިވާ ކަމަށެވެ.

މިދިޔަ ޖެނުއަރީ މަހު ދައުވާ އުފުލިތާ ކުޑަ އިރުކޮޅެއްގެ ތެރޭގައި އިސްވަރަން ވަނީ އެ ހުރިހާ ތުހުމަތަކަށް އިންކާރުކޮށް، ސަރުކާރުގެ މަގާމުން އިސްތިއުފާ ދެއްވައި ނަން ސާފުކުރުމަށް އިސްކަން ދެއްވާނެ ކަމަށް ވިދާޅުވެފަ އެވެ. އެ ދައުވާގައި ބިލިއަނަރު އޮންގް ބެންގް ސެންގްގެ ނަން ހިމެނެ އެވެ.

ސިންގަޕޫރު ގްރޯން ޕްރީގެ ހައްގު އޮންގްގެ އަތުގައި އޮތް އިރު، ރޭސްގެ ސްޓިއަރިން ކޮމިޓީގެ އެޑްވައިޒަރަކީ އިސްވަރަން އެވެ.

އިސްވަރަންއާ އެކު މިދިޔަ އަހަރު އޮންގް ހައްޔަރުކުރި ނަމަވެސް އޭނާގެ މައްޗަށް އެއްވެސް ކުށެއްގެ ދައުވާއެއް އުފުލާފައެއް ނުވެ އެވެ. އިސްވަރަންގެ ޝަރީއަތުގައި ދައުލަތުގެ ހެކިވެރިއެއްގެ ހައިސިއްޔަތުން އޭނާ ބަޔާން ނެގުމަށް އެންމެ ފުރަތަމަ ތާވަލްކުރި އެވެ.

އިސްވަރަންގެ މައްޗަށް އުފުލާފައިވާ މި މައްސަލައަކީ ކޮރަޕްޝަނާއި އަހުލާގީ އަމަލުތަކާ ދެކޮޅަށް ޒަމާނުއްސުރެ ހަރުދަނާ ސިޔާސަތެއް ގެންގުޅެމުން އަންނަ ވެރިކަން ކުރާ ޕީޕަލްސް އެކްޝަން ޕާޓީ (ޕީއޭޕީ)ގެ ސިޔާސަތަށް ކުރިމަތިވި ވަރަށް ބޮޑު ލޮޅުމެކެވެ.

ސިންގަޕޫރުގެ ގާނޫނު ހަދާ މަޖިލީހުގެ މެމްބަރުންނަކީ ދުނިޔޭގައި ވެސް އެންމެ ބޮޑު މުސާރައެއް ލިބޭ ގައުމުތަކުގެ ތެރޭގައި ހިމެނިވަޑައިގަންނަވާ މެންބަރުންނެވެ. ވަޒީރުންނަށް 1 މިލިއަން ސިންގަޕޫރު ޑޮލަރު (758،000 އެމެރިކާ ޑޮލަރު)ގެ އާމްދަނީއެއް ލިބެ އެވެ.

ކުރީގެ ސްޓޭޓް މިނިސްޓަރު ވީ ޓޫން ބޫން 800،00 އެމެރިކާ ޑޮލަރަަށް ވުރެ ގިނަ އަދަދެއްގެ ފައިސާގެ ހިޔާނާތުގެ މައްސަލައެއް ސާބިތުވެ، 1975 ވަނަ އަހަރު ވަނީ 18 މަސްދުވަހަށް ޖަލަށް ލުމަށް ހުކުމްކޮށްފަ އެވެ.