މާޑޯކްއަށް ފަހު ވިޔަފާރިއާ ހަވާލުވާނެ ބޭފުޅަކު ކަނޑައަޅަން ކޯޓު ހަނގުރާމަ ފަށައިފި

މީޑިއާ މަހުޖަނު ރޫޕާޓް މާޑޯކްއަށް ފަހު އޭނާގެ 14.9 ބިލިއަން ޕައުންޑްގެ ވިޔަފާރިއާ އާއިލާގެ ފަރާތުން ހަވާލުވާނީ ކާކުތޯ ކަނޑައެޅުމުގެ ކޯޓު ހަނގުރާމަ އިއްޔެ އެމެރިކާގައި ފަށައިފި އެވެ.

އެ މައްސަލަ ނިމޭ އިރު، އުމުރުން 93 އަހަރުގެ ބިލިއަނަރު އަވަހާރަވުމަށް ފަހު، ނިއުސް ކޯޕާއި ފޮކްސް ނިއުސްގެ ކޮންޓްރޯލް އޭނާގެ އެންމެ ދޮށީ ތިން ބޭފުޅުންގެ ތެރެއިން އެންމެ ބޮޑު ކޮންޓްރޯލާއި ވޯޓުގެ ބާރު ލިބޭނީ ކާކަށްތޯ ކަނޑައެޅޭނެ އެވެ.

ރިޕޯޓްތައް ބުނާ ގޮތުން މާޑޯކް ބޭނުން ވަނީ 1999 ވަނަ އަހަރު އުފެއްދި އާއިލީ ޓްރަސްޓް އިސްލާހުކޮށް، އޭނާގެ ދޮށީ އެއްބަނޑު އެއްބަފާ ތިން ބެއިންގެ ތެރެއިން، ޕްރޫޑެންސް، އެލިޒަބެތު އަދި ޖޭމްސްގެ "ނުފޫޒެއް" ނެތި ލަޗްލާންއަށް ކޮންޓްރޯލް ލިބޭނެ ގޮތް ހެދުމަށެވެ.

މަޝްހޫރު އާއިލާއަކީ ވަރަށް މަގުބޫލު ޓީވީ ސިލްސިލާ، 'ސަކްސެޝަން'ގެ ކާމިޔާބުގެ ފަހަތުގައިވާ ހިތްވަރެވެ.

ފަސް ކައިވެންޏެއް ކުރައްވާފައިވާ މާޑޯކްގެ ހަގު ދެ ބޭފުޅުން، ގްރޭސް އާއި ކްލޯއީއަށް އެ ޓްރަސްޓްގައި ވޯޓު ދިނުމުގެ ހައްގެއް ނޯވެ އެވެ.

"އަޅުގަނޑުމެންނަށް އެނގިފައިވާ ގޮތުގައި، މި ޕްލޭންގައި މައިގަނޑު ގޮތެއްގައި މަސައްކަތް ކުރަނީ ޕްރޫޑެންސް، ޖޭމްސް އަދި އެލިޒަބެތު މާޑޯކްގެ ދެ ކޮއްކޮއާ އެއް ހަމައަކުން،" އޮސްޓްރޭލިއާގެ ނޫސްވެރިޔާ އަދި ބައޮގްރަފީ ލިޔުންތެރިޔާ ޔަންގް ރުޕާޓް ވޯލްޓާ މާޝް ވިދާޅުވި އެވެ.

"ވޯޓުލުމުގެ ހުރިހާ ބާރެއް" ލަޗްލާންއާ ހަވާލު ކުރެވިދާނެ ކަމަށް އޭނާ ވިދާޅުވި އެވެ.

ބިލިއަނަރު މާޑޯކް 1960ގެ އަހަރުތަކުން ފެށިގެން އޭނާގެ މީޑިއާ އެމްޕަޔާ ބިނާކުރެއްވީ ސިޔާސީ ގޮތުންނާއި އާންމުންގެ ނުފޫޒު ގަދަ ދުނިޔޭގެ މީޑިއާ ބޮޑު ކުންފުންޏެއްގެ ގޮތުގަ އެވެ.

އޭނާގެ ދެ ނިއުސް ކޯޕަރޭޝަންއެއް ހިމެނެ އެވެ. އެ ތަންތަނުން ހިންގާ ތަންތަނުގެ ތެރޭގައި އިނގިރޭސިވިލާތުގެ ޓައިމްސް އަދި ދަ ސަން ހިމެނެ އެވެ. އަދި އެމެރިކާގެ ވޯލް ސްޓްރީޓް ޖާނަލް އާއި ފޮކްސް ނިއުސް ބްރޯޑްކާސްޓްކުރާ ފޮކްސް ނިއުސް ހިމެނެ އެވެ.

ނޫސްވެރިޔާ އެންޑްރޫ ނީލް 2020 ވަނަ އަހަރު ބީބީސީގެ ޑޮކިއުމެންޓްރީ، 'ދަ ރައިޒް އޮފް ދަ މާޑޯކް ޑައިނެސްޓީ'އަށް ދިން އިންޓަވިއުއެއްގައި ބުނެފައި ވަނީ މާޑޯކް އޭނާގެ ދެ ފިރިހެން ދަރިން އެ މީހުން ފުރާވަރަށް އެރުމުގެ ކުރިން ވެސް، އޭނާގެ ފަހަތުން އޭނާގެ ފިޔަވަޅުތަތަކާ އެއްގޮތަށް މަަސައްކަތް ކުރުމަށް ތައްޔާރުކުރަމުން ދިޔަ ކަމަށެވެ.

ސަންޑޭ ޓައިމްސްގެ ކުރީގެ އެޑިޓަރު ވިދާޅުވި ގޮތުގައި ރޫޕާޓް މާޑޯކަށް އާއިލާ އަކީ އަބަދު ވެސް ވަރަށް މުހިންމު އެއްޗެކެވެ.

އެންޑާސް އެނަލިސިސްގެ އިސް ރިސާޗަރު އެލިސް އެންޑާސް ބީބީސީއަށް ވިދާޅުވީ ކޯޓު ހަނގުރާމައަކީ ހަގީގަތުގައި ވިޔަފާރީގެ މަސްލަހަތުތަކާ ގުޅޭ ހަނގުރާމައެއް ކަމަށެވެ.

މީޑިއާ ކުންފުނިތައް ހިންގާ މާޑޯކް އާއިލީ ޓްރަސްޓުން 1999 ވަނަ އަހަރު އެކަމަށް ގޮތެއް ނިންމާފައި އޮތް ކަމަށް ބެލެވެ އެވެ. އެކަމަށް މަގުފަހިކުރަން މާޑޯކް އޭނާގެ އެންމެ ދޮށީ ދަރިންނަށް އޭނާގެ ކުންފުނިތަކުގެ ތެރޭގައި ތަފާތު ވަޒީފާތައް ދިނެވެ.

އެ ޓްރަސްޓުން އާއިލާއަށް އަށް ވޯޓް ދޭއިރު، އެ ވޯޓު ބޭނުންކޮށްގެން ނިއުސް ކޯޕާއި ފޮކްސް ނިއުސްގެ ބޯޑުގައި ވާހަކަ ދެއްކޭނެ އެވެ. އޭގެ ތެރެއިން ހަތަރު ވޯޓު މިހާރު ކޮންޓްރޯލް ކުރައްވަމުން ގެންދަވަނީ މާޑޯކް އެވެ. އޭގެ ތެރެއިން އޭނާގެ ދޮށީ ބޭފުޅުންގެ ތެރެއިން ކޮންމެ ބޭފުޅަކު އެއް ވޯޓް ކޮންޓްރޯލް ކުރެ އެވެ.

ޓްރަސްޓް އެއްބަސްވުމުގައި ބުނެފައި ވަނީ މާޑޯކް އަވަހާރަވުމުން އޭނާގެ ވޯޓް އޭނާގެ ދޮށީ ހަތަރު ދަރިންނަށް ހަމަހަމަކޮށް ލިބޭނެ ކަމަށެވެ.

ނަމަވެސް ހިޔާލު ތަފާތުވުމާއި ސިޔާސީ ވިސްނުމުގެ ސަބަބުން އެ ބޭފުޅުންގެ މެދުގައި ތަފާތުވުންތަކާއި އާއިލީ ނުތަނަވަސްކަމެއް އުފެދިފައިވާ ކަމަށް ބެލެވެ އެވެ.

ފޮކްސް އެންޑް ނިއުސް ކޯޕްގެ ޗެއާމަންކަމުން މީޑިއާ މަހުޖަނު އިސްތިއުފާ ދެއްވީ ލަޗްލާންއަށް ތާއީދު ކުރައްވައިގެންނެވެ. ލަޗްލާން އަކީ އޭނާގެ ބައްޕައާ އެއްކަހަލަ ކަނާތު ފިޔައިގެ ވިސްނުންތަކެއް ގެންގުޅުއްވާ ބޭފުޅެއް ކަމަށް ރިޕޯޓްތައް ބުނެ އެވެ. އަދި އެކަމުގެ ސަބަބުން ޖޭމްސް އާއި އެލިޒަބެތު އަދި ޕްރޫޑެންސް އެކަތިގަނޑަކަށްވެ، ލަޗްލާންއާ ދެކޮޅަށް ހަނގުރާމައެއް އުފައްދާފައިވާ ކަމަށް ރިޕޯޓްތައް ބުނެ އެވެ.

މިބާވަތުގެ އާއިލީ ހަނގުރާމަތައް ގިނަ ފަހަރަށް ނިމެނީ ފައިސާގެ އެއްބަސްވުމަކަށް އައިސްގެންނެވެ. އަދި އެއް ފަރާތަކުން އިސްތިއުނާފު ކުރަން އިހުތިޔާރުކުރާ ނިންމުމަކަށް ހިނގައްޖެ ނަމަ މައްސަލަ ދިގުލައިގެން ވެސް ހިނގައިދާނެ އެވެ.

ޕްރޫޑެންސް އަކީ މާޑޯކްގެ ފުރަތަމަ އަނބިކަނބަލުން ޕެޓްރީޝިއާ ބުކާގެ ދޮށީ ދަރިކަލުންނެވެ.

އެލިޒަބެތު، ލަޗްލާން އަދި ޖޭމްސް އަކީ އޭނާގެ ދެވަނަ އަނބިކަނބަލުން އެނާ މަންއާއަށް ލިބިފައިވާ ބޭފުޅުންނެވެ. އެނާއާ މާޑޯކް ކައިވެނި ކުރައްވައިގެން އުޅުއްވީ 1967 އިން 1999 ވަނަ އަހަރުގެ ނިޔަލަށެވެ.

ގްރޭސް އާއި ކްލޯއީގެ މަންމައަކީ 1999 ވަނަ އަހަރުން ފެށިގެން 2013 ވަނަ އަހަރާ ހަމައަށް ބިލިއަނަރު ކައިވެނިކުރެއްވި ވެންޑީ ޑެންގްގެ ބޭފުޅުންނެވެ.

މާޑޯކްގެ ހަތަރު ވަނަ ކައިވެންޏަކީ 2016 ވަނަ އަހަރު އޭނާ މޮޑެލް ޖެރީ ހޯލްއާ ކުރެއްވި ކައިވެންޏެވެ. އެ ކައިވެނި 2022 ވަނަ އަހަރު ވަނީ ނިމުކަށް އައިސްފަ އެވެ.

އޭނާ ދާދި ފަހުން، މިދިޔަ ޖޫން މަހު އޭނާގެ ފަސް ވަނަ އަނބިކަނބަލުން އެލީނާ ޒުކޯވާއާ ކައިވެނި ކުރެއްވި އެވެ.