ބަންގާޅުގައި ފެންބޮޑުވެ 20 މީހަކު މަރުވެ، 5 މިލިއަން މީހުން ހާލުގައި ޖެހިއްޖެ

ބަންގްލަދޭޝްގައި ބޯކޮށް ވާރޭވެހި ކޯރުތަކުގައި ފެންބޮޑުވުމުގެ ސަބަބުން 20 މީހުން މަރުވެ، 5.2 މިލިއަނަށް ވުރެ ގިނަ މީހުން ހާލުގައި ޖެހިފައިވާ ކަމަށް ބަންގްލަދޭޝްގެ އޮފިޝަލުން ވިދާޅުވެއްޖެ އެވެ.

ފެންބޮޑުވުމުގެ ސަބަބުން ގިނަ ބަޔަކު އެކަހެރިވެ ކާބޯތަކެއްޗާއި ސާފު ފެނާއި ބޭހާއި ހިކި ފޭރާމަށް ވަރަށް ބޮޑަށް ވަނީ ޖެހިފަ އެވެ. އަދި މަގުތައް ބަންދުވެ، ދުރު ހިސާބުތަކުގެ މީހުން ސަލާމަތްކުރުމަށާއި އެހީތެރިކަން ފޯރުކޮށްދިނުމުގެ މަސައްކަތަށް ވަނީ ހުރަސް އެޅިފަ އެވެ.

ސަރުކާރުގެ ޗީފް އެޑްވައިޒަރު މުހައްމަދު ޔޫނުސް ޓީވީ މެދުވެރިކޮށް ދެއްވި ތަގުރީރުގައި ވިދާޅުވީ ފެންބޮޑުވުމުގެ ސަބަބުން ހާލުގައި ޖެހިފައިވާ މީހުން އާންމު ހާލަތަށް އަވަހަށް އެނބުރި ގެނައުމަށް އަޅަން ޖެހޭ ހުރިހާ ފިޔަވަޅެއް ސަރުކާރުން އަޅާފައިވާ ކަމަށެވެ.

ސުލްހައިގެ އިނާމު ހާސިލްކުރައްވާފައިވާ ޔޫނުސް ވަގުތީ އިންތިގާލީ ސަރުކާާރާ ހަވާލުވެވަޑައިގަތީ ދަރިވަރުން އިސްނަގައިގެން ހިންގި ބަގާވާތަކަށް ފަހު ކުރީގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވައި ގައުމުން ފިއްލެވުމާ ގުޅިގެންނެވެ.

ކޮމިއްލާ ޑިސްޓްރިކްޓްގެ ދަނޑުވެރިއާ އަބްދުލް ހަލީމް، 65، ބުނި ގޮތުގައި އޭނާގެ މަށި ޓެންޓް ގެނބިގެން ދިޔައީ ރޭގަނޑު ދަންވަރު ކުއްލިއަކަށް 10 ފޫޓު އުސްކޮށް ފެންބޮޑުވުމުގެ ސަބަބުން ކަމަށެވެ.

"މުދަލެއް ވެސް އަދި ފެނެއް ވެސް ނެތް. އަވަށްތަކުގެ ތެރޭގައި އުޅޭ މީހުންނަށް އެހީ ހިފައިގެން އައީ ވަރަށް މަދުން. އަމިއްލައަށް މައި މަގު ކައިރިއަށް ގޮސް އެ އެއްޗެހި ނަގަން ޖެހޭނީ،" އޭނާ ރޮއިޓާސްއަށް ބުންޏެވެ.  

ބަންގާޅުގައި ފެންބޮޑުވީ އަވަށްޓެރި އިންޑިއާގައި ޑޭމް ސްލޫއިސް ގޭޓްތައް ހުޅުވުމުން ކަމަށް ބަންގްލަދޭޝްގެ ބައެއް މީހުން ތުހުމަތު ކުރެ އެވެ. ނަމަވެސް އެ ވާހަކަތައް ނިއު ދިއްލީން ދޮގުކުރެ އެވެ.

"މުސްތަގުބަލުގައި ފެންބޮޑުވުމުގެ ހާލަތްތަކުން ރައްކާތެރިވުމަށް އަވަށްޓެރި ގައުމުތަކާ އެކު މަޝްވަރާތައް ފަށައިފިން،" ޔޫނުސް ވިދާޅުވި އެވެ.

ބަންގްލަދޭޝްގެ މޫސުމާ ބެހޭ ގައުމީ އިދާރާއިން ވަނީ މޫސުމީ ވިއްސާރަ ކުރިއަށްދާ ނަމަ ފެންބޮޑުވުމުގެ ހާލަތު ދެމިއޮންނާނެ ކަމުގެ އިންޒާރު ދީފަ އެވެ.

ފެންބޮޑުވެފައިވާ 11 ޑިސްޓްރިކްޓްގެ ގާތްގަނޑަކަށް 3500 ވަގުތީ ހިޔާތަކުގައި 400،000އަށް ވުރެ ގިނަ މީހުން ވަނީ ހިމާޔަތް ހޯދައިފަ އެވެ. އަދި ގާތްގަނޑަކަށް 750 މެޑިކަލް ޓީމެއް ފަރުވާ ދިނުމަށް ހަރަކާތްތެރިވާ އިރު، އަސްކަރިއްޔާ، ވައިގެ އަސްކަރިއްޔާ، ނޭވީ އަދި ބޯޑާ ގާޑް ބަންގްލަދޭޝް އިން ވަނީ މީހުން ސަލާމަތް ކުރުމުގެ މަސައްކަތުގައި އެހީތެރިކަން ފޯރުކޮށްދެމުންނެވެ.

ވޯލްޑް ބޭންކުން 2015 ވަނަ އަހަރު ކުރި އެނަލިސިސްއަކުން ދައްކާ ގޮތުގައި ދުނިޔޭގެ މޫސުމަށް އެންމެ ނުރައްކާވާ އެއް ގައުމު ކަމަށްވާ ބަންގްލަދޭޝްގެ 3.5 މިލިއަން މީހުންނަށް އަހަރަކު ކޯރުތަކުގައި ފެންބޮޑުވުމުގެ ނުރައްކާ އެބައޮތެވެ. ސައިންސްވެރިން ސިފަކުރާ ގޮތުގައި މިފަދަ ނުރައްކާތެރި ހާދިސާތައް އިތުރުވެގެން ދަނީ މޫސުމަށް އަންނަ ބަދަލުތަކުގެ ސަބަބުންނެވެ.

"މިއަހަރުގެ މޫސުމީ ވިއްސާރައިގެ އަސަރު ވަރަށް ބޮޑަށް ގޯސްވެއްޖެ،" ބަންގްލަދޭޝްގެ ކަންޓްރީ ޑިރެކްޓަރު ކަބީތާ ބޯސް ވިދާޅުވި އެވެ. 

"މުޅި މުޖުތަމައުތައް މުޅިން ފެންބޮޑުވެ، ކުޑަކުދިން ހިމެނޭ ގޮތަށް އެތައް މިލިއަން ބަޔަކު މިހާރު ތިބީ ރައްކާތެރި ހިޔާވަހިކަމާއި ފުރާނަ ސަލާމަތްކޮށްދޭ އިންސާނީ އެހީތެރިކަން ބޭނުންވެފައި."